1 Timoteo 4:1-16
4 Pero an giniyahan han Dios nga pulong matin-aw nga nasiring nga maabot an panahon nga an iba mabaya ha pagtoo, kay magpipinamati hira ha nakakalimbong nga mga kapahayagan ngan katutdoan han mga demonyo,
2 pinaagi han pagkahipokrito han mga tawo nga nagbibinuwa, nga an konsensya nagbanhod na sugad han ulat nga nahimo han nagbabaga nga puthaw nga panmarka.
3 Igdidiri nira an pag-asawa ngan susugoon an mga tawo nga maglikay ha mga pagkaon nga hinimo han Dios basi may-pagpasalamat nga kaunon han mga may pagtoo ngan husto nga pagsabot ha kamatuoran,
4 kay an tagsa nga hinimo han Dios maopay, ngan waray sadang isalikway kon ginkakarawat ito nga may pagpasalamat,
5 kay ginbaraan ito pinaagi han pulong han Dios ngan han pag-ampo para hito.
6 Pinaagi han paghatag hini nga sagdon ha kabugtoan, magigin maopay ka nga ministro ni Kristo Jesus, usa nga gintutdoan pinaagi han mga pulong han pagtoo ngan han maopay nga katutdoan nga ginsusunod mo hin maopay.
7 Pero isalikway an waray pulos ngan buwa nga mga istorya nga pariho han gin-iistorya han lagas nga kababayin-an. Lugod, bansaya an imo kalugaringon nga an imo tumong amo an pagpauswag han debosyon ha Dios.
8 An pag-ehersisyo may gutiay nga kapulsanan, pero an debosyon ha Dios mapulsanon ha ngatanan nga butang, kay nagsasaad ito hin kinabuhi yana ngan ha tidaraon.
9 Totoo gud ngan angay toohan hin bug-os ito nga mga pulong.
10 Tungod hito maduruto nga nagbubuhat kita ngan nangangalimbasog gud, kay naglalaom kita ha buhi nga Dios, nga Paratalwas han ngatanan nga klase hin tawo, labi na han mga matinumanon.
11 Padayon nga ihatag ngan itutdo ini nga mga sugo.
12 Ayaw gud pasagdi nga minuson ka han bisan hin-o tungod han imo pagin batan-on. Lugod, ha mga matinumanon magin susbaranan ka ha imo pagyakan, paggawi, gugma, pagtoo, ngan kaputli.
13 Tubtob nga umabot ako, padayon nga buhata an imo gimaopayi ha pagbasa ha publiko, ha pagsagdon, ngan ha pagtutdo.
14 Ayaw pabay-i an regalo nga iginhatag ha imo pinaagi han igintagna, han igintungbaw ha imo han grupo han mga tigurang an ira mga kamot.
15 Pamalandonga ini nga mga butang, ngan tagi ini hin bug-os nga atensyon, basi makita gud han mga tawo an imo pag-uswag.
16 Pirme tagi hin atensyon an imo kalugaringon ngan an imo pagtutdo. Ipadayon ini nga mga butang, kay kon buhaton mo ini, matatalwas ka ngan an mga namamati ha imo.
