1 Timoteo 6:1-21
6 An mga nagpapas-an han yugo han pagkauripon sadang magpadayon ha pagtagad ha ira mga agaron nga takos han bug-os nga pagpasidungog, basi an ngaran han Dios ngan an iya katutdoan diri gud pakarauton.
2 Dugang pa, an mga uripon nga may mga agaron nga tumuroo diri magpakita hin kawaray-respeto ha ira, kay mga bugto hira. Lugod, sadang hira magserbi hin mas kinaburut-on, kay an nagpapahimulos han ira maopay nga serbisyo mga tumuroo ngan hinigugma gud.
Padayon nga itutdo ini nga mga butang ngan ihatag ini nga mga sagdon.
3 Kon may bisan hin-o nga nagtututdo hin iba nga doktrina ngan diri nauyon ha maopay nga instruksyon tikang ha aton Ginoo nga hi Jesu-Kristo ngan ha katutdoan nga uyon ha debosyon ha Dios,
4 nagpapahitaas hiya ngan waray nasasabtan nga bisan ano. Mahilig gud hiya ha mga diskusyon ngan mga debate mahitungod han mga pulong. Ito an mga gintitikangan han kaawa, araway, nakakasakit nga mga pulong, ngan magraot nga suspetsa,
5 pirme nga pagdiskusyon mahitungod han gudtiay nga butang han mga tawo nga nadaot an panhunahuna ngan nawad-an han kamatuoran, tungod kay naghuhunahuna nga an debosyon ha Dios usa nga paagi ha pakabentaha.
6 Ha pagkamatuod, daku gud an bentaha han debosyon ha Dios, kon kontento kita ha kon ano an may-ada kita.
7 Kay han natawo kita ha kalibotan waray kita gindara, ngan kon mamatay kita waray liwat kita madadara.
8 Salit magin kontento kita ha pagkaada hin ginkakaon, ginsusul-ot, ngan gin-uukyan.
9 Pero an mga determinado magin riko nahuhulog ha pagsulay ngan ha lit-ag ngan ha damu nga linurong ngan nakakasakit nga mga hingyap nga nag-uunlod ha mga tawo ha kabungkagan ngan kadaot.
10 Kay an gugma ha kwarta usa nga gamot han ngatanan nga klase hin nakakadaot nga mga butang, ngan ha pagtinguha hini nga gugma an iba nahisisimang tikang ha pagtoo ngan ginbubuno an ira kalugaringon hin damu nga kasakit.
11 Pero ikaw, O surugoon han Dios, paglikay hini nga mga butang. Lugod, ipadayon an katadongan, debosyon ha Dios, pagtoo, gugma, pagpailob, ngan pagkamalumo.
12 Pakig-away han maopay nga pakig-away para ha pagtoo, kapti hin marig-on an kinabuhi nga waray kataposan nga tungod hito gintawag ka ngan nagpamatuod hin maopay ha publiko ha atubangan han damu nga testigo.
13 Ha atubangan han Dios, nga nagtitipig nga buhi han ngatanan nga butang, ngan ni Kristo Jesus, nga sugad nga saksi nagpamatuod hin maopay ha publiko ha atubangan ni Ponsio Pilato, ginsusugo ko ikaw
14 nga tumanon an sugo ha putli ngan waray ikasaway nga paagi tubtob ha pagpakita* han Ginoo nga hi Jesu-Kristo.
15 Ha itinanda nga panahon para hito, magpapakita an malipayon ngan amo la nga Gamhanan, an Hadi han mga nagmamando sugad nga hadi ngan Ginoo han mga nagmamando sugad nga ginoo,
16 an amo la nga imortal, nga nag-uukoy ha diri-nadadaop nga kalamrag, nga waray tawo nga nakakita o makakakita. Pasidunggan unta hiya ngan magpabilin an iya gahum ha kadayonan. Amen.
17 Sagdoni an mga riko hini nga sistema nga diri magpahitaas, ngan diri sumarig ha waray-kasigurohan nga karikohan, kondi ha Dios, nga hura nga nagtatagana ha aton han ngatanan nga butang nga aton nalilipayan.
18 Sidnga hira nga buhaton an maopay, magin hura ha mag-opay nga buhat, magin mahinatagon, ngan andam ha pagpaangbit,
19 kay ha pagbuhat hito, nagtitirok hira hin bahandi para ha ira kalugaringon, usa nga maopay nga pundasyon para ha tidaraon, basi makaptan nira hin marig-on an totoo nga kinabuhi.
20 Hinigugma ko nga Timoteo, bantayi an igintapod ha imo, ngan likayi an waray pulos nga iristorya nga supak ha kon ano an baraan ngan an nagkakasumpaki nga mga ideya han buwa nga “kahibaro.”
21 Kay tungod ha pagparayaw han sugad nga kahibaro, an iba binaya ha pagtoo.
Makarawat unta niyo an diri-matupngan nga pagkabuotan.
Mga footnote
^ O “pagpakita han gahum.”
