1 Timoteo 1:1-20
1 Tikang kan Pablo, nga apostol ni Kristo Jesus pinaagi han sugo han Dios nga aton Paratalwas ngan ni Kristo Jesus nga aton paglaom,
2 para kan Timoteo nga totoo nga anak ha pagtoo:
Makarawat mo unta an diri-matupngan nga pagkabuotan, kalooy, ngan kamurayawan tikang ha Dios nga Amay ngan kan Kristo Jesus nga aton Ginoo.
3 Sugad la nga gin-aghat ko ikaw nga magpabilin ha Efeso han tikadto ako ha Macedonia, ito liwat an akon igin-aaghat ha imo yana, basi sidngan mo an pipira nga diri hira magtutdo hin iba nga doktrina,
4 ngan diri liwat maghatag hin atensyon ha buwa nga mga istorya ngan ha katulinan. Nakakarag la hito an panahon, ngan nakakaaghat la hin mga pakiana nga nagkikinahanglan hin pagsaliksik, ngan waray kalabotan ha mga igintatagana han Dios nga nakakaparig-on han pagtoo.
5 Katuyoan gud hini nga instruksyon an paghigugma tikang ha limpyo nga kasingkasing ngan tikang ha maopay nga konsensya ngan tikang ha sinsero nga pagtoo.
6 Tungod kay ginbabalewaray ito han iba, nakikigbahin hira ha waray pulos nga iristorya.
7 Karuyag nira magin magturutdo han balaud, pero diri nira nasasabtan an ira ginyiyinakan o an mga butang nga ira gud gin-iinsister.
8 Yana maaram kita nga an Balaud maopay kon husto* an pag-aplikar hito han usa
9 nga nakakasantop nga an balaud ginhimo, diri para ha matadong nga tawo, kondi para ha mga matinalapason ngan rebelyoso, mga diri-diosnon ngan makasasala, mga diri maunungon,* mga parapasipara, mga parapamatay hin mga amay, mga iroy, ngan hin iba nga tawo,
10 mga imoral,* kalalakin-an nga nakikighilawas ha igkasi-lalaki, mga kidnaper, mga buwaon, mga diri nagtutuman hin saad, ngan ha bisan ano nga nakontra ha maopay* nga katutdoan
11 nga uyon ha mahimayaon nga maopay nga sumat nga igintapod ha akon han malipayon nga Dios.
12 Nagpapasalamat ako kan Kristo Jesus nga aton Ginoo nga naghatag ha akon hin gahum, kay gintagad ako niya nga matinumanon pinaagi ha paghatag ha akon hin sagrado nga buruhaton,
13 bisan kon hadto parapasipara ako, paratimaraot, ngan nanmamaltrato nga tawo. Pero bisan pa hito, ginkalooyan ako tungod han akon kaignorante ngan kawaray pagtoo.
14 Ngan an diri-matupngan nga pagkabuotan han aton Ginoo hura nga nakarawat ko upod an pagtoo ngan gugma pinaagi kan Kristo Jesus.
15 Totoo gud ngan angay toohan ini nga mga pulong: Hi Kristo Jesus kinanhi ha kalibotan basi talwason an mga makasasala. Ha ira ngatanan ako an pinakamakasasala.
16 Bisan pa hito, ginkalooyan ako basi pinaagi ha akon, sugad nga pinakamakasasala, maipakita ni Kristo Jesus an iya bug-os nga hilawig nga pagpailob sugad nga susbaranan han mga magpapakita hin pagtoo ha iya basi magkaada kinabuhi nga waray kataposan.
17 Yana pasidunggan ngan paghimayaon unta ha waray kataposan an Hadi ha kadayonan nga waray kamatayon, diri-nakikita, ngan an amo la nga Dios. Amen.
18 Ini nga instruksyon iginhahatag ko ha imo, Timoteo nga anak ko, uyon ha mga tagna mahitungod ha imo, basi pinaagi hini magpadayon ka ha maopay nga pakig-away,
19 ngan matipigan mo an pagtoo ngan maopay nga konsensya, nga ginbalewaray han iba ngan nagresulta ha kawara han ira pagtoo pariho han kalunod hin barko.
20 Pariho hito hira Himeneo ngan Alejandro, ngan igintubyan ko hira kan Satanas basi pinaagi han disiplina matutdoan hira nga diri magpasipara ha Dios.
Mga footnote
^ Ha literal, “uyon ha balaud.”
^ O “waray mahigugmaon nga pagkabuotan.”
^ Kitaa an footnote ha 1Co 5:9.
^ O “makapahimsog.”
