1 Timoteo 3:1-16
3 Masasarigan ini nga mga pulong: Kon an bisan hin-o nga lalaki nagtatalinguha pagkab-ot hin pribilehiyo sugad nga paramangno, maopay nga buhat an iya gintitinguha.
2 Kon sugad, an paramangno kinahanglan waray ikasaway, usa la an asawa, kontrolado an paggawi, maopay an panhunahuna, organisado, maabiabihon, kwalipikado ha pagtutdo,
3 diri parahubog, diri bayolente,* lugod makatadunganon, diri makiawayon, diri mahigugmaon ha kwarta,
4 lalaki nga nagmamangno hin maopay ha iya panimalay, ngan an iya mga anak seryoso gud nga nagpapasakop;
5 (kon an bisan hin-o nga lalaki diri maaram magmangno han iya panimalay, paonan-o niya mamangnoan an kongregasyon han Dios?)
6 diri bag-o la nga nakombirte, kay bangin magpahitaas hiya ngan kumarawat hin paghukom nga pariho han nakarawat han Yawa.
7 Dugang pa, kinahanglan liwat nga maopay an iya reputasyon ha mga taga-gawas, basi diri hiya mawad-an hin dungog ngan malit-ag han Yawa.
8 Sugad man, an mga ministeryal nga surugoon kinahanglan seryoso, diri iba-iba an gin-iistorya,* diri nagpapatakas pag-inom hin bino, diri nagtitinguha nga makabentaha ha hakugnon ngan malimbong nga paagi,
9 ngan may limpyo nga konsensya nga gintitipigan an sagrado nga tinago nga amo an pagtoo.
10 Sadang liwat hira sarihan anay kon angay hira hini nga pribilehiyo, katapos puydi na hira mag-alagad sugad nga mga ministro, kay waray naiaakusar ha ira.
11 An kababayin-an liwat kinahanglan seryoso, diri parapakaraot, kontrolado an paggawi, ngan matinumanon ha ngatanan nga butang.
12 An mga ministeryal nga surugoon kinahanglan usa la an asawa, ngan nangunguna hin maopay ha ira mga anak ngan ha ira panimalay.
13 Kay an kalalakin-an nga nag-aalagad ha maopay nga paagi nagkakaada maopay nga reputasyon ngan daku nga kagawasan ha pagyakan mahitungod han ira pagtoo kan Kristo Jesus.
14 Iginsusurat ko ini ha imo, bisan kon naglalaom ako nga diri mag-iiha makada na ako ha imo,
15 basi kon maatrasado ako, maaram ka kon paonan-o magawi ha panimalay han Dios, nga amo an kongregasyon han buhi nga Dios, an harigi ngan pundasyon han kamatuoran.
16 Oo, an sagrado nga tinago mahitungod hini nga debosyon ha Dios importante gud: ‘Nagin tawo hiya, iginpahayag nga matadong han nagin espiritu utro, kinadto ha mga anghel, iginsangyaw ha mga nasud, gintoohan han kalibotan, ngan mahimayaon nga ginkarawat ha kahitas-an.’
