1 Timoteo 2:1-15
2 Una ha ngatanan, igin-aaghat ko nga an mga pangamuyo, mga pag-ampo, mga pakimalooy, ngan mga pagpasalamat himoon para ha ngatanan nga klase hin tawo,
2 para ha mga hadi ngan ha ngatanan nga may hitaas nga katungdanan,* basi padayon nga magkinabuhi kita nga mamingaw ngan murayaw nga may bug-os-kasingkasing nga debosyon ha Dios ngan pagkaseryoso.
3 Maopay ini ngan makalilipay pagkit-on han aton Paratalwas, an Dios,
4 nga an kaburut-on matalwas an ngatanan nga klase hin tawo ngan magkaada husto nga kahibaro ha kamatuoran.
5 Usa la an Dios, ngan usa la an tagapamutnga* ha Dios ngan ha katawohan, an tawo nga hi Kristo Jesus,
6 nga naghatag han iya kalugaringon sugad nga katugbang nga lukat para ha ngatanan—papamatud-an gud ini ha itinanda nga panahon.
7 Basi mapamatud-an ini, ginpili ako nga magin parasangyaw ngan apostol, usa nga magturutdo han mga nasud mahitungod han pagtoo ngan kamatuoran. Nagsusumat ako han kamatuoran, diri ako nagbubuwa.
8 Salit hingyap ko nga ha tagsa nga lugar an mga lalaki padayon nga mag-ampo, nga maunungon nga gin-aalsa an mga kamot ngadto ha Dios, ngan waray kangalas ngan mga debate.
9 Sugad man, hingyap ko nga an mga babaye magpahusay ha ira kalugaringon pinaagi han desente nga pamado, nga may dignidad ngan maopay nga panhunahuna, diri pinaagi han mga estilo ha pagsalapid han buhok ngan pagsul-ot hin mga bulawan o perlas o mahal hinduro nga bado,
10 kondi ha paagi nga angay ha kababayin-an nga nagpapahayag hin debosyon ha Dios, pinaagi han mag-opay nga buhat.
11 An babaye sadang maghilom samtang gintututdoan, ngan bug-os nga magpasakop.
12 Diri ko gintutugotan an babaye nga magtutdo, o magdominar ha lalaki, lugod magpabilin hiya nga hilom.
13 Kay hi Adan an una nga ginhimo, sunod hi Eva.
14 Labot pa, hi Adan waray malimbongi, kondi an babaye amo gud an nalimbongan ngan nagin makasasala.
15 Pero titipigan hiya nga talwas pinaagi ha pagpanganak, basta magpadayon hiya ha pagtoo, gugma, ngan pagkabaraan nga may maopay nga panhunahuna.
