1 Pedro 5:1-14
5 Salit sugad nga igkasi-tigurang, nga testigo han mga pag-antos han Kristo ngan igkasi-umarangbit han himaya nga igpapahayag, ginhahangyo* ko an mga tigurang dida ha iyo:
2 Atamana an panon han Dios nga igintapod ha iyo, diri nga napipiritan kamo, kondi kinaburut-on; diri tungod ha hingyap nga makabentaha ha malimbong nga paagi, lugod tungod han hingyap nga magserbi;
3 diri nagmamayor-mayor ha mga panag-iya han Dios, lugod magin mga susbaranan ha panon.
4 Ngan kon igpahayag na an nangunguna nga paraataman, makakarawat niyo an diri-nalubad nga korona han himaya.
5 Ha pariho nga paagi, kamo nga burobata nga kalalakin-an, magpasakop kamo ha edaran nga kalalakin-an. Ngan igsul-ot niyo ngatanan an pagkamapainubsanon, kay an Dios nakontra ha mga mapahitas-on, pero nahatag hiya ha mga mapainubsanon hin diri-matupngan nga pagkabuotan.
6 Salit magpasakop kamo ha gamhanan nga kamot han Dios, basi pagpahitas-on kamo niya pag-abot han panahon;
7 samtang iyo iginpapasa ha iya an ngatanan niyo nga kabaraka, kay napaid hiya ha iyo.
8 Tipigi an iyo maopay nga panhunahuna, ngan magin mabinantayon. An iyo kaaway nga amo an Yawa naglilinakat-lakat pariho hin nagngungurob nga leon, nga nagpipinamiling hin lalamyon.
9 Pero atohi niyo hiya, magmarig-on ha iyo pagtoo, kay maaram kamo nga an sugad hito nga mga pag-antos gin-iilob liwat han ngatanan nga kabugtoan niyo ha bug-os nga kalibotan.
10 Kondi katapos niyo mag-antos hin madaliay, an Dios nga puno han diri-matupngan nga pagkabuotan, nga nagtawag ha iyo ngadto ha iya waray kataposan nga himaya kahiusa han Kristo, amo an magtatapos han pagbansay ha iyo, magpaparig-on ha iyo, ngan magpapakusog ha iyo.
11 An gahum aada ha iya ha waray kataposan. Amen.
12 Pinaagi kan Silvano, nga para ha akon usa nga matinumanon nga bugto, nagsurat ako ha iyo hin halipot basi parig-unon kamo ngan tagan hin sinsero nga pamatuod nga amo ini an totoo nga diri-matupngan nga pagkabuotan han Dios. Magpabilin kamo nga marig-on dida hito.
13 Hiya* nga aadto ha Babilonya, nga pinili pariho ha iyo, nangungumusta ha iyo, sugad man hi Marcos nga akon anak.
14 Pagkumustahay kamo pinaagi hin harok, ha pagpahayag han iyo gugma.
Kamo ngatanan nga kahiusa han Kristo magkaada unta hin kamurayawan.
Mga footnote
^ O “gin-aaghat.”
^ Ini nga pronoun ha Griego nagtutudlok ha babaye ngan nagsisimbolo han kongregasyon ha Babilonya.
