1 Pedro 3:1-22
3 Ha pariho nga paagi, kamo nga mga asawa, magpasakop kamo ha iyo bana, basi kon may bisan hin-o nga diri masinugtanon ha pulong, makabig hira bisan waray pulong pinaagi han iyo panggawi,
2 tungod kay mga testigo hira nga nakakita han iyo putli nga panggawi nga may daku nga respeto.
3 An iyo pagpahusay kinahanglan diri ha gawas la—an pagsalapid han buhok ngan pagsul-ot hin bulawan nga mga alahas o mga bado—
4 lugod an iyo pagpahusay sadang magin ha kasingkasing, nga amo an iyo sulod nga pagkatawo, pinaagi han diri-nadadaan nga pampahusay nga amo an kalmado ngan malumo nga disposisyon, nga presyoso gud ha pagkita han Dios.
5 Kay sugad hito an pagpahusay han baraan nga kababayin-an hadto nga naglaom ha Dios, nga nagpasakop hira ha ira bana,
6 sugad kan Sarah nga nagsugot kan Abraham, nga gintawag niya nga “ginoo.” Ngan kamo magigin iya mga anak, kon padayon kamo nga magbuhat hin maopay ngan diri magpadaog han kahadlok.*
7 Kamo nga mga bana, padayon nga tratara liwat hin maaramon* an iyo asawa. Tagi hin dungog an babaye sugad nga mas maluya nga surudlan, kay pariho kamo manurunod han diri-matupngan nga regalo nga kinabuhi, basi diri maulang an iyo mga pag-ampo.
8 Ha kataposan, magkaurosa kamo ngatanan ha iyo panhunahuna, ipakita an pagpaid ha iba, an minagburugto nga gugma, an malumo nga kalooy, ngan pagpaubos.
9 Ayaw pagbulos hin maraot ha maraot o hin insulto ha insulto. Lugod, paghatag hin bendisyon ha iba, kay tungod hini ginpili kamo, basi makakarawat kamo hin bendisyon.
10 “An bisan hin-o nga nahigugma ha kinabuhi kinahanglan magpugong han iya dila ha pagyakan hin maraot ngan han iya im-im ha pagyakan hin limbong.
11 Kinahanglan bayaan niya an maraot ngan buhaton an maopay; bilngon niya an kamurayawan ngan ipadayon ito.
12 Kay an mga mata ni Jehova nagkikita ha mga matadong, ngan an iya mga talinga namamati ha ira pangamuyo; pero hi Jehova* nakontra ha mga nagbubuhat hin maraot.”
13 Ha pagkamatuod, hin-o an makakadaot ha iyo kon aktibo kamo ha pagbuhat hin maopay?
14 Pero bisan kon mag-antos kamo tungod han katadongan, malipayon kamo. Kondi ayaw kahadlok han ira nahahadlokan, ngan ayaw liwat kamo kalisang.
15 Lugod, ha iyo kasingkasing kilalaha nga an Kristo amo an Ginoo ngan baraan hiya, ngan magin andam pirme kamo ha pagdepensa ha atubangan han ngatanan nga nangangaro hin basihan han iyo paglaom, pero ginbubuhat ito ha malumo nga paagi ngan may daku nga respeto.
16 Tipigi an maopay nga konsensya, basi kon pagyaknan kamo hin maraot ha bisan ano nga paagi, an mga nagyayakan kontra ha iyo maawod tungod han iyo maopay nga panggawi sugad nga mga sumurunod han Kristo.
17 Kay kon kaburut-on han Dios nga mag-antos kamo tungod kay nagbubuhat kamo hin maopay, mas maopay ito kay han mag-antos kamo tungod ha pagbuhat hin maraot.
18 Kay bisan an Kristo namatay hin makausa la para ha mga sala, usa nga matadong nga tawo para ha mga diri-matadong, basi giyahan kamo ngadto ha Dios. Ginpatay hiya sugad nga tawo,* pero ginbanhaw hiya sugad nga espiritu.
19 Ha sugad nga kahimtang kinadto liwat hiya ngan nagsangyaw* ha mga espiritu nga priso,
20 nga nagin diri-masinugtanon hadto ha mga adlaw ni Noe han mapailubon nga naghinulat an Dios, samtang ginhihimo an arka, nga pinaagi hito pipira la ka tawo, walo nga kalag, an gintalwas ha tubig.
21 An bawtismo, nga katugbang hito, nagtatalwas liwat ha iyo yana, (diri pinaagi ha pagkuha han hugaw ha unod, kondi pinaagi han paghangyo ha Dios nga magkaada maopay nga konsensya,) pinaagi han pagkabanhaw ni Jesu-Kristo.
22 Aada hiya ha too nga kamot han Dios, kay kinadto hiya ha langit; ngan iginpasakop ha iya an mga anghel ngan mga awtoridad ngan kagamhanan.
Mga footnote
^ O “diri mahadlok ha bisan ano nga hinungdan ha kahadlok.”
^ O “pakitaan hira hin konsiderasyon; pagsabot.”
^ O “an nawong ni Jehova.”
^ Ha literal, “ha unod.”
^ O “nagpahayag hin mensahe han paghukom.”
