1 Pedro 1:1-25
1 Tikang kan Pedro, nga apostol ni Jesu-Kristo, para ha temporaryo nga mga residente nga nagpatlaag ha Ponto, Galacia, Capadocia, Asia, ngan Bitinia, nga mga pinili
2 uyon ha hinbabaroan nga daan han Dios nga Amay, nga mga ginbaraan pinaagi han baraan nga espiritu, ha katuyoan nga magin masinugtanon hira ngan mawisikan han dugo ni Jesu-Kristo:
Mahura unta kamo han diri-matupngan nga pagkabuotan ngan kamurayawan.
3 Pagdayawon unta an Dios ngan Amay han aton Ginoo nga hi Jesu-Kristo, kay uyon ha iya daku nga kalooy ginpahinabo niya nga ig-anak utro kita nga may buhi nga paglaom pinaagi han pagkabanhaw ni Jesu-Kristo tikang ha mga patay,
4 ngan may panurundon nga diri-nadudunot ngan waray-hugaw ngan diri-nalubad. Igin-andam ito ha langit para ha iyo,
5 nga ginpuproteksyonan han Dios pinaagi han iya gahum kay may pagtoo kamo. Ginpuproteksyonan kamo para ha katalwasan nga igpapahayag ha kataposan nga peryodo han panahon.
6 Tungod hini nagrarayhak gud kamo, bisan kon ha halipot nga panahon bangin nagsasakit kamo tungod han magkalain-lain nga pagsari,
7 basi an nasarihan nga kalidad han iyo pagtoo, nga mas marahalon kay han bulawan nga nadadaot bisan kon ginsarihan* na ha kalayo, makahatag unta ha iyo hin kadayawan ngan himaya ngan dungog kon igpahayag na hi Jesu-Kristo.
8 Bisan kon waray pa gud niyo hiya makita, hinigugma niyo hiya. Bisan kon diri niyo hiya nakikita yana, nagpapakita kamo hin pagtoo ha iya ngan nagrarayhak gud kamo nga may diri-maisaysay ngan daku nga kalipay,
9 kay sigurado kamo nga makakarawat niyo an katalwasan han iyo kalag* tungod han iyo pagtoo.
10 May kalabotan hito nga katalwasan, maduruto nga nagpakiana ngan nag-usisa hin maopay an mga propeta nga nanagna mahitungod han diri-matupngan nga pagkabuotan nga para ha iyo.
11 Padayon nga nag-usisa hira kon ano nga espisipiko nga panahon o kon ano nga klase hin panahon mahitatabo an iginpasabot han espiritu nga aada ha ira mahitungod han Kristo, kay abanse nga ginpapamatud-an han baraan nga espiritu an mga pag-antos han Kristo ngan an himaya katapos hito.
12 Iginpahayag ha ira nga nagsiserbi hira diri ha ira kalugaringon, kondi ha iyo, may kalabotan han iginpahibaro ha iyo yana han mga nagpasamwak ha iyo han maopay nga sumat pinaagi han baraan nga espiritu nga iginpadara tikang ha langit. Mahitungod hito nga mga butang, an mga anghel interesado gud mahibaro.
13 Salit andama an iyo hunahuna para ha buruhaton, ngan tipigi an iyo maopay nga panhunahuna; ibutang an iyo paglaom ha diri-matupngan nga pagkabuotan nga ipapakita ha iyo kon igpahayag na hi Jesu-Kristo.
14 Sugad nga masinugtanon nga mga anak, ayaw na kamo pagpamolde* ha mga hingyap niyo hadto tungod han iyo kaignorante,
15 lugod, magin baraan kamo ha ngatanan nga panggawi niyo, pariho ha Usa nga Baraan nga nagtawag ha iyo,
16 kay ini an iginsurat: “Kinahanglan magin baraan kamo, kay ako baraan.”
17 Dugang pa, kon nangangaro kamo hin bulig ha Amay nga waray ginpapaurog kon naghuhukom uyon ha ginbubuhat han kada tagsa, gumawi kamo nga may kahadlok ha panahon han iyo pagin temporaryo nga residente.*
18 Kay maaram kamo nga diri pinaagi han nadadaot nga mga butang, sugad han silber o bulawan, nga gintalwas kamo tikang ha iyo waray pulos nga pagkinabuhi nga iginpasa ha iyo han iyo kaapoy-apoyan.*
19 Lugod gintalwas kamo pinaagi han presyoso nga dugo han Kristo, nga pariho han dugo han kordero nga waray-depekto ngan putli.
20 Ha pagkamatuod, ginpili na hiya han Dios antes pa han tinikangan han kalibotan, pero iginpakita hiya ha kataposan han mga panahon para ha iyo kaopayan.
21 Pinaagi ha iya nagin mga tumuroo kamo ha Dios nga nagbanhaw ha iya tikang ha mga patay ngan naghatag ha iya hin himaya; basi tumoo ngan maglaom kamo ha Dios.
22 Yana nga ginputli na niyo an iyo mga kalag pinaagi han iyo pagkamasinugtanon ha kamatuoran nga tungod hito kamo may-ada minagburugto nga gugma nga diri-hipokrito, kinasingkasing nga maghigugmaay gud kamo ha usa kag usa.
23 Kay ginpahinabo nga ig-anak utro kamo, diri pinaagi han nadudunot, kondi han diri-nadudunot nga binhi, pinaagi han pulong han buhi ngan waray kataposan nga Dios.
24 Kay “an ngatanan nga tawo pariho hin tanom, ngan an ngatanan nga ira himaya pariho hin bukad han tanom; an tanom nalalaya, ngan an bukad nahuhulog,
25 pero an pulong ni Jehova nagpapadayon ha waray kataposan.” Ngan ini nga “pulong” amo an maopay nga sumat nga iginpasamwak ha iyo.
Mga footnote
^ O “ginputli.”
^ O “kinabuhi.”
^ O “pagpahiuyon.”
^ O “dayo nga residente.”
^ O “iginpasa pinaagi han tradisyon.”
