1 Pedro 4:1-19
4 Salit tungod kay an Kristo nag-antos han tawo pa hiya, magkaada liwat kamo panhunahuna nga pariho han iya panhunahuna, kay an tawo nga nag-antos ha unod binaya na ha mga sala,
2 basi an nabibilin nga panahon han iya kinabuhi sugad nga tawo diri na niya gamiton para ha mga hingyap han mga tawo, kondi ha pagbuhat han kaburut-on han Dios.
3 Kay an panahon nga naglabay igo na para han iyo pagbuhat han kaburut-on han mga nasud, nga amo an mangil-ad nga paggawi,* diri-mapugngan nga maglaw-ay nga hingyap, sobra nga pag-inom, mga karisyohan nga waray-kontrol, paglupigay ha pag-inom, ngan mga idolatriya nga supak ha balaud.
4 Diri nira masabtan kon kay ano nga diri na kamo naupod ha ira ha pagpatakas ha maraot nga pagkinabuhi, salit nagyayakan hira hin maraot mahitungod ha iyo.
5 Pero ito nga mga tawo may baratunon ha iya nga maghuhukom ha mga buhi ngan mga patay.
6 Ha pagkamatuod, ito an hinungdan nga an maopay nga sumat iginpasamwak liwat ha mga patay, basi mabuhi hira uyon ha espiritu sumala ha panhunahuna han Dios, bisan kon ginhukman hira ha unod sumala ha panhunahuna han mga tawo.
7 Pero an kataposan han ngatanan nga butang hirani na. Salit sadang kamo magkaada maopay nga panhunahuna, ngan magin mabinantayon* may kalabotan ha mga pag-ampo.
8 Labaw ha ngatanan, magkaada kamo daku nga gugma ha usa kag usa, kay an gugma nagtatabon hin damu nga sala.
9 Magin maabiabihon kamo ha usa kag usa nga diri nagrireklamo.
10 Sugad la nga an tagsa ha iyo may nakakarawat nga regalo, gamita ito ha pagbulig ha usa kag usa sugad nga maopay nga mga tinaporan han diri-matupngan nga pagkabuotan han Dios, nga iginpapakita ha iba-iba nga paagi.
11 Kon nagyayakan an bisan hin-o, sadang niya buhaton ito sugad nga pagpahayag han mga mensahe tikang ha Dios; kon nagsiserbi ha iba an bisan hin-o, sadang niya buhaton ito nga nasarig ha kusog nga iginhahatag han Dios; basi ha ngatanan nga butang madayaw unta an Dios pinaagi kan Jesu-Kristo. Iya an himaya ngan an gahum ha waray kataposan. Amen.
12 Mga hinigugma, ayaw kamo kahipausa ha nagkakalayo nga mga pagsari nga iyo naieksperyensyahan, nga baga hin diri ordinaryo an nahitatabo ha iyo.
13 Lugod, padayon nga malipay kamo kay nag-aantos liwat kamo han mga pag-antos han Kristo, basi kamo malipay ngan magrayhak liwat kon igpahayag na an iya himaya.
14 Malipayon kamo kon gin-iinsulto kamo tungod ha ngaran han Kristo, kay an mahimayaon nga espiritu, an espiritu mismo han Dios, aada ha iyo.
15 Pero waray bisan hin-o ha iyo an sadang mag-antos sugad hin parapamatay o kawatan o magburuhat hin maraot o nagpipinanlabot ha ginbubuhat han iba.
16 Pero kon may bisan hin-o nga nag-aantos sugad nga Kristiano, diri hiya angay maawod, lugod padayon nga dayawon niya an Dios pinaagi han pagkinabuhi uyon hini nga ngaran.
17 Kay ini an itinanda nga panahon ha paghukom nga magtitikang ha balay han Dios. Yana kon magtitikang ini ha aton, ano an mahitatabo ha mga diri masinugtanon ha maopay nga sumat han Dios?
18 “Ngan kon an matadong nga tawo naghihimakuri pakatalwas, ano an mahitatabo* ha diri-diosnon nga tawo ngan ha makasasala?”
19 Salit an mga nag-aantos tungod ha pagbuhat han kaburut-on han Dios sadang magpadayon pagsarig han ira kalag* ha matinumanon nga Maglalarang samtang nagbubuhat hira hin maopay.
Mga footnote
^ Kitaa an “Mangil-ad nga paggawi” ha Glossary.
^ O “alerto; nagmamata.”
^ Ha literal, “diin hiya mahingangadto.”
^ O “kinabuhi.”
