1 Pedro 2:1-25
2 Salit isalikway niyo an ngatanan nga karaotan, panlimbong, pagkahipokrito, kaawa, ngan an ngatanan nga klase han paglibak.
2 Pariho hin igin-anak pa la nga bata, maghingyap kamo han puro nga gatas tikang ha pulong han Dios, basi pinaagi hito magtubo kamo ngan matalwas,
3 kay naeksperyensyahan* niyo nga an Ginoo buotan.
4 Samtang nahirani kamo ha iya, nga amo an buhi nga bato nga iginsalikway han mga tawo, pero ginpili han Dios ngan presyoso ha iya,
5 kamo mismo sugad nga buhi nga mga bato gintindog nga magin espirituwal nga balay basi magin baraan nga mga saserdote, basi pinaagi kan Jesu-Kristo maghatag kamo hin espirituwal nga mga halad nga naruruyagan han Dios.
6 Kay an Kasuratan nasiring: “Kitaa! Nagbubutang ako ha Sion hin bato nga pinili, usa ka presyoso nga pundasyon nga pandugtong nga bato ha eskina, ngan an bisan hin-o nga natoo hito diri gud mapapakyas.”
7 Salit presyoso hiya ha iyo, kay mga tumuroo kamo; pero ha mga diri natoo, “ini mismo nga bato nga iginsalikway han mga magtirindog nagin pandugtong nga bato ha eskina,”
8 ngan “bato nga hiparakdolan ngan daku nga bato nga nakakatumba.” Nahipapakdol hira kay diri hira masinugtanon ha pulong. Ito an kataposan nga dadangatan han sugad hito nga mga tawo.
9 Kondi kamo “ginpili nga lahi, mga hadi nga saserdote, baraan nga nasud, ngan katawohan nga espesyal nga panag-iya han Dios, basi ipasamwak niyo ha bisan diin an pagkaharangdon” han usa nga nagtawag ha iyo tikang ha kasisidman ngadto ha iya urusahon gud nga kalamrag.
10 Kay hadto diri kamo katawohan han Dios, pero yana katawohan na kamo niya; hadto waray kamo kalooyi, pero yana ginkakalooyan na kamo.
11 Mga hinigugma, sugad nga mga estranghero ngan temporaryo nga mga residente, gin-aaghat ko kamo nga maglikay pirme ha makasasala nga mga hingyap nga nakikig-away ha kalag.
12 Padayon nga manggawi kamo hin maopay ha butnga han mga nasud, basi kon mag-akusar hira nga magburuhat kamo hin maraot, magin mga testigo hira han mag-opay nga buhat nga ira nakita ha iyo, ngan sugad nga resulta, pagdayawon nira an Dios ha adlaw han iya pag-usisa.
13 Tungod ha Ginoo, magpasakop kamo ha ngatanan nga may awtoridad:* ha hadi sugad nga hitaas an katungdanan
14 o ha mga gobernador sugad nga iya mga ginsugo ha pagsirot ha mga nagbubuhat hin maraot ngan pagdayaw ha mga nagbubuhat hin maopay.
15 Kay kaburut-on han Dios nga pinaagi han iyo pagbuhat hin maopay, mapahilom niyo an diri-makatadunganon nga mga tawo nga nag-iistorya hin waray pulos.
16 Sugad nga mga tawo nga may kagawasan, ayaw paggamita an iyo kagawasan sugad nga tahob ha pagbuhat hin sayop, lugod gamita ito sugad nga mga uripon han Dios.
17 Pasidunggi niyo an ngatanan nga klase hin tawo, higugmaa an ngatanan nga kabugtoan, kahadluki an Dios, ngan pasidunggi an hadi.
18 An mga surugoon sadang magpasakop nga may kahadlok ha ira mga agaron, diri la ha mga maopay ngan makatadunganon, kondi ha mga makuri liwat lipayon.
19 Kay angay gud han kumendasyon an usa kon nag-iilob hiya hin kakurian* ngan nag-aantos hin kawaray-hustisya tungod han pangalimbasog nga pirme magin limpyo an iya konsensya ha atubangan han Dios.
20 Ano an kapulsanan kon nag-iilob kamo hin pagmaltrato* tungod han pakasala? Pero kon nag-iilob kamo hin kakurian tungod han pagbuhat hin maopay, makaruruyag gud ito ha Dios.
21 Ha pagkamatuod, tungod hito gintawag kamo, kay bisan an Kristo nag-antos para ha iyo ngan nagbilin ha iyo hin susbaranan basi sundon niyo hin maopay an iya mga pitad.
22 Waray hiya nabuhat nga sala, waray liwat limbong dida ha iya baba.
23 Han gin-iinsulto hiya, waray hiya bumulos hin pag-insulto. Han nag-aantos hiya, waray hiya manarhog, lugod iginsarig niya an iya kalugaringon ha usa nga naghuhukom ha matadong nga paagi.
24 Pinaagi han iya kalugaringon nga lawas gindara niya ha kahoy an aton mga sala, basi matalwas kita ha mga sala ngan mabuhi ha pagbuhat han matadong. Ngan “pinaagi han iya mga samad natambal kamo.”
25 Kay pariho kamo hin nanhisimang nga mga karnero; kondi yana binalik na kamo ha paraataman* ngan paramangno han iyo mga kalag.
Mga footnote
^ Ha literal, “natilawan.”
^ O “institusyon.”
^ O “kabidoan; kasakit.”
^ Ha literal, “suntok.”
^ Kitaa an “Paraataman” ha Glossary.
