1 Juan 5:1-21
5 An tagsa nga natoo nga hi Jesus an Kristo anak han Dios, ngan an tagsa nga nahigugma ha nagpahinabo han pag-anak nahigugma ha iya igin-anak.
2 Hinigugma naton an mga anak han Dios kon hinigugma naton an Dios ngan ginbubuhat an iya mga sugo.
3 Kay an gugma ha Dios nangangahulogan nga tumanon naton an iya mga sugo; ngan an iya mga sugo diri mabug-at,
4 kay an tagsa* nga anak han Dios nakakadaog han kalibotan. Ngan tungod han aton pagtoo, nadaog naton an kalibotan.
5 Hin-o an nakakadaog han kalibotan? Diri ba hiya nga natoo nga hi Jesus an Anak han Dios?
6 Ini hiya, hi Jesu-Kristo, an kinanhi pinaagi han tubig ngan dugo; diri pinaagi han tubig la, kondi pinaagi han tubig ngan dugo. Ngan ginpapamatud-an ito han espiritu, kay an espiritu naghahatag hin totoo nga pamatuod.
7 Kay tulo an naghahatag hin pamatuod,
8 an espiritu, an tubig, ngan an dugo, ngan nagkakauruyon ini nga tulo.
9 Kon kinakarawat naton an pamatuod han mga tawo, mas labaw pa an pamatuod han Dios. Kay nagpapamatuod an Dios mahitungod han iya Anak.
10 An tawo nga natoo ha Anak han Dios natoo ha pamatuod nga iginsumat ha iya. An tawo nga waray pagtoo ha Dios naghihimo ha Dios nga buwaon, kay diri hiya natoo ha pamatuod han Dios mahitungod han iya Anak.
11 Ngan ini an pamatuod han Dios, nga gintagan kita niya hin kinabuhi nga waray kataposan, ngan ini nga kinabuhi nakakarawat naton pinaagi han iya Anak.
12 An nakarawat ha Anak may-ada hini nga kinabuhi; an diri nakarawat ha Anak han Dios waray hini nga kinabuhi.
13 Iginsusurat ko ini ha iyo basi hibaroan niyo nga kamo nga natoo ha ngaran han Anak han Dios may kinabuhi nga waray kataposan.
14 Ngan nasarig kita nga bisan ano an aton aroon uyon ha kaburut-on han Dios, namamati hiya ha aton.
15 Dugang pa, tungod kay maaram kita nga namamati hiya ha aton anoman an aton gin-aaro, sigurado kita nga makakarawat naton an aton mga gin-aaro ha iya.
16 An bisan hin-o nga makakita ha iya bugto nga nagbubuhat hin sala nga diri makamaratay, kinahanglan mag-ampo para ha iya, ngan tatagan hiya han Dios hin kinabuhi, oo, an mga diri nakakasala hin makamaratay. Pero may sala nga makamaratay. Mahitungod hito nga sala, diri ako nasiring ha iya nga mag-ampo para ha nagbubuhat hito.
17 An ngatanan nga diri-matadong nga buhat sala; pero may sala nga diri makamaratay.
18 Maaram kita nga an tagsa nga tawo nga nagin anak han Dios diri nagbubuhat hin sala, ngan ginbabantayan hiya han Anak han Dios, ngan an usa nga maraot waray mahihimo ha iya.*
19 Maaram kita nga tikang kita ha Dios, pero an bug-os nga kalibotan kontrolado han gahum han usa nga maraot.
20 Kondi maaram kita nga kinanhi an Anak han Dios, ngan gintagan kita niya hin hilarom nga pagsabot* basi magkaada kita hin kahibaro mahitungod han totoo nga Dios. Ngan pinaagi han iya Anak nga hi Jesu-Kristo, kita kahiusa niya. Hiya an totoo nga Dios ngan an burabod han kinabuhi nga waray kataposan.
21 Hinigugma nga mga anak, maglikay kamo ha mga dios-dios.
Mga footnote
^ Ha literal, “ngatanan.”
^ O “diri makakakapot hin marig-on ha iya.”
^ Ha literal, “pagsantop; abilidad ha paghunahuna.”
