1 Juan 4:1-21
4 Mga hinigugma, ayaw pagtuod ha tagsa nga giniyahan nga mensahe,* lugod siguroha kon an giniyahan nga mga mensahe tikang ha Dios, kay damu an buwa nga mga propeta nga nakikita ha kalibotan.
2 Hibabaroan niyo kon an mensahe tikang ha Dios hini nga paagi: An tagsa nga giniyahan nga mensahe nga nagpapahayag nga hi Jesu-Kristo kinanhi sugad nga tawo, tikang ha Dios.
3 Pero an tagsa nga mensahe nga diri nagpapahayag mahitungod kan Jesus diri tikang ha Dios. Dugang pa, ito an mensahe han antikristo nga iyo nabatian nga maabot, ngan yana aada na ito ha kalibotan.
4 Hinigugma nga mga anak, tikang kamo ha Dios, ngan nagdaog kamo kontra hito nga mga tawo, kay hiya nga kahiusa niyo mas gamhanan kay ha iya nga kahiusa han kalibotan.
5 Tikang hira ha kalibotan, salit an ira ginyayakan tikang ha kalibotan ngan an kalibotan namamati ha ira.
6 Tikang kita ha Dios. An nakilala ha Dios namamati ha aton; an diri tikang ha Dios diri namamati ha aton. Hito nga paagi, masasabtan naton an kaibahan han giniyahan nga mensahe han kamatuoran ngan han buwa nga mensahe.
7 Mga hinigugma, padayon nga higugmaon naton an usa kag usa, kay an gugma tikang ha Dios, ngan an tagsa nga nahigugma anak han Dios ngan nakilala ha Dios.
8 An diri nahigugma diri nakilala ha Dios, kay an Dios gugma.
9 An gugma han Dios iginpahayag ha aton hini nga paagi, han ginpakanhi han Dios ha kalibotan an iya bugtong* nga Anak basi makarawat naton an kinabuhi pinaagi ha iya.
10 Iginpahayag ini nga gugma, diri tungod kay ginhigugma naton an Dios, kondi tungod kay ginhigugma kita niya ngan ginpakanhi an iya Anak sugad nga halad ha pagpahiuli para ha aton mga sala.
11 Mga hinigugma, kon sugad hito an paghigugma ha aton han Dios, kinahanglan higugmaon liwat naton an usa kag usa.
12 Waray pa nakakita ha Dios ha bisan san-o. Kon padayon nga higugmaon naton an usa kag usa, padayon nga makakaupod naton an Dios ngan makikita ha aton an iya hingpit nga gugma.
13 Maaram kita nga pirme kahiusa kita niya ngan hiya kahiusa naton, kay iya iginhatag ha aton an iya espiritu.
14 Dugang pa, nakita namon mismo ngan ginpapamatud-an namon nga ginpakanhi han Amay an iya Anak sugad nga Paratalwas han kalibotan.
15 An Dios pirme kahiusa han nagpapahayag nga hi Jesu-Kristo Anak han Dios, ngan hiya kahiusa han Dios.
16 Ngan aton hinbaroan nga hinigugma kita han Dios ngan kombinsido kita hito.
An Dios gugma, ngan an padayon nga nahigugma pirme kahiusa han Dios, ngan an Dios pirme kahiusa niya.
17 Hito nga paagi makikita ha aton an hingpit nga gugma, basi magkaada kita kagawasan ha pagyakan ha adlaw han paghukom, kay dinhi ha kalibotan pariho kita ha iya.*
18 Ha gugma waray kahadlok, lugod an hingpit nga gugma nakakawara han kahadlok, kay an kahadlok nakakapugong ha aton. Ha pagkamatuod, an nahahadlok diri hingpit an gugma.
19 Pero nahigugma kita kay una hiya nga naghigugma ha aton.
20 Kon may magsiring: “Nahigugma ako ha Dios,” pero nasisina ha iya bugto, buwaon hiya. Kay an diri nahigugma ha iya bugto nga iya nakikita, diri makakahimo paghigugma ha Dios nga diri niya nakikita.
21 Ngan ini an iya sugo ha aton, nga an nahigugma ha Dios kinahanglan maghigugma liwat ha iya bugto.
Mga footnote
^ Ha literal, “espiritu.”
^ O “an amo la nga anak nga direkta nga ginhimo han Dios.”
^ Karuyag sidngon, hi Jesu-Kristo.
