1 Juan 1:1-10
1 Nagsusurat kami ha iyo mahitungod ha iya nga amo an pulong nga naghahatag hin kinabuhi, nga nagtikang ha tinikangan, nga amon hinbatian, nakita han amon mga mata, amon gin-obserbaran ngan amon nakaptan.
2 (Oo, iginpakita an kinabuhi nga waray kataposan ngan nakita namon ito, ngan ginpapamatud-an ngan iginsusumat namon ha iyo an kinabuhi nga waray kataposan nga nagtitikang ha Amay ngan iginpakita ito ha amon.)
3 An amon nakita ngan hinbatian iginsusumat liwat namon ha iyo, basi makaupod* liwat namon kamo. Dugang pa, hini nga aton pag-urupod, an Amay ngan an iya Anak nga hi Jesu-Kristo kaupod naton.
4 Salit iginsusurat namon ini basi malipay kita hin bug-os.
5 Ini an mensahe nga amon hinbatian ha iya ngan amon iginpapahibaro ha iyo, nga an Dios kalamrag ngan waray gud kasisidman ha pagin kahiusa niya.
6 Kon magsiring kita: “Nakikig-upod kita ha iya,” pero padayon nga naglalakat kita ha kasisidman, nagbibinuwa kita ngan diri nagbubuhat uyon ha kamatuoran.
7 Kondi, kon naglalakat kita ha kalamrag sugad la nga Hiya mismo aada ha kalamrag, nagkakaurupod gud kita, ngan an dugo han iya Anak nga hi Jesus naglilimpyo ha aton ha ngatanan nga sala.
8 Kon magsiring kita: “Waray kita sala,” ginlilimbongan naton an aton kalugaringon, ngan an kamatuoran waray ha aton.
9 An Dios maunungon ngan matadong, salit kon aton igsumat an aton mga sala, papasayloon kita niya ha aton mga sala ngan lilimpyohan kita ha ngatanan nga pagkadiri-matadong.
10 Kon magsiring kita: “Waray kita makasala,” aton hiya ginhihimo nga buwaon, ngan an iya pulong waray ha aton kasingkasing.
Mga footnote
^ O “magin kaangbit.”
