1 Juan 3:1-24
3 Hunahunaa an daku gud nga gugma nga iginpakita ha aton han Amay, nga tungod hito gintawag kita nga mga anak han Dios; ngan mga anak gud kita niya. Ito an hinungdan nga an kalibotan diri nakilala ha aton, kay diri ito nakilala ha iya.
2 Mga hinigugma, mga anak na kita yana han Dios, pero diri pa iginpapakita kon magigin ano kita. Maaram kita nga kon ipakita na hiya magigin pariho kita ha iya, kay makikita naton hiya kon ano gud hiya.
3 Ngan an tagsa nga may-ada hini nga paglaom dida ha iya nagpuputli han iya kalugaringon, sugad la nga ito nga usa putli.
4 An tagsa nga nagbubuhat hin sala nagbubuhat liwat hin pagtalapas, salit an sala amo an pagtalapas.
5 Maaram liwat kamo nga kinanhi* hiya basi magkuha han aton mga sala, ngan waray hiya sala.
6 An tagsa nga pirme kahiusa niya diri nagbubuhat hin sala; an nagbubuhat hin sala diri nakita ha iya o nakilala ha iya.
7 Hinigugma nga mga anak, ayaw kamo palimbong ha bisan hin-o; an nagbubuhat han katadongan matadong, sugad la nga hiya matadong.
8 An nagbubuhat hin sala tikang ha Yawa, kay an Yawa nagbubuhat hin sala tikang pa ha tinikangan. Ini an hinungdan nga ginpakanhi an Anak han Dios: basi bungkagon an mga buhat han Yawa.
9 An tagsa nga nagin anak han Dios diri padayon nga nagbubuhat hin sala, kay an Iya binhi* nagpapabilin ha iya, ngan diri hiya makakapadayon pagbuhat hin sala, kay anak hiya han Dios.
10 An mga anak han Dios ngan an mga anak han Yawa nakikilala pinaagi hini nga kamatuoran: An tagsa nga diri nagbubuhat han katadongan diri tikang ha Dios, sugad man an diri nahigugma ha iya bugto.
11 Kay an mensahe nga iyo nabatian tikang ha tinikangan amo ini: kinahanglan higugmaon naton an usa kag usa;
12 diri pariho kan Cain nga nagtikang ha usa nga maraot* ngan nagpatay han iya bugto. Kay ano nga iya ginpatay hiya? Tungod kay an iya mga buhat maraot, pero an mga buhat han iya bugto matadong.
13 Mga kabugtoan, ayaw kamo kahipausa nga an kalibotan nangangalas ha iyo.
14 Maaram kita nga nakatabok kita tikang ha kamatayon ngadto ha kinabuhi, kay nahigugma kita ha kabugtoan. Hiya nga diri nahigugma nagpapabilin nga patay.
15 An padayon nga nasisina ha iya bugto parapamatay, ngan maaram kamo nga waray parapamatay nga may kinabuhi nga waray kataposan.
16 Pinaagi hini nahibaro kita han gugma, kay iya iginhatag an iya kinabuhi* para ha aton; ngan kinahanglan ihatag naton an aton kinabuhi para ha aton kabugtoan.
17 Kondi an bisan hin-o nga may materyal nga panag-iya dinhi hini nga kalibotan ngan nakikita niya nga an iya bugto nanginginahanglan pero diri hiya nagpapakita hin pagpaid ha iya, paonan-o naton masisiring nga nahigugma hiya ha Dios?
18 Hinigugma nga mga anak, kinahanglan maghigugma kita diri la ha pulong o pinaagi han dila, lugod ha buhat ngan kamatuoran.
19 Hito nga paagi mahibabaro kita nga aada kita ha kamatuoran, ngan ha aton kasingkasing magigin kombinsido kita nga an Dios nahigugma ha aton.
20 Ngan bisan kon hukman kita han aton kasingkasing, an Dios mas daku kay ha aton kasingkasing ngan maaram hiya han ngatanan nga butang.
21 Mga hinigugma, kon diri kita hukman han aton kasingkasing, may kagawasan kita ha pakiistorya ha Dios;
22 ngan bisan ano an aton pangaroon ha iya nakakarawat naton, kay gintutuman naton an iya mga sugo ngan ginbubuhat naton an mga butang nga nakakalipay ha iya.
23 Ha pagkamatuod, ini an iya sugo, nga tumoo kita ha ngaran han iya Anak nga hi Jesu-Kristo ngan higugmaon naton an usa kag usa, sugad han sugo nga iya iginhatag ha aton.
24 Dugang pa, an nagtutuman hini nga mga sugo pirme kahiusa niya, ngan hiya kahiusa niya. Pinaagi han espiritu nga iginhatag niya ha aton, maaram kita nga hiya pirme kahiusa naton.
Mga footnote
^ Ha literal, “iginpakita.”
^ Karuyag sidngon, binhi nga may kapas nga magtubo o mamunga.
^ Karuyag sidngon, hi Satanas.
^ O “kalag.”
