1 Juan 2:1-29
2 Hinigugma ko nga mga anak, iginsusurat ko ini ha iyo basi diri kamo makasala. Pero kon may bisan hin-o nga makasala, may parabulig kita nga kaupod han Amay, an matadong nga hi Jesu-Kristo.
2 Hiya an halad ha pagpahiuli* para ha aton mga sala, pero diri la para ha aton kondi para liwat ha mga sala han bug-os nga kalibotan.
3 Kon padayon nga gintutuman naton an iya mga sugo, nagpapakita ito nga kilala naton hiya.
4 An nasiring: “Kilala ko hiya,” pero diri nagtutuman han iya mga sugo, buwaon, ngan an kamatuoran waray dida hito nga tawo.
5 Kondi an bisan hin-o nga nagtutuman gud han iya pulong, ito nga tawo nagpapakita han perpekto nga gugma han Dios. Pinaagi hini maaram kita nga kahiusa kita niya.
6 An nasiring nga pirme hiya kahiusa niya kinahanglan padayon liwat nga maglakat sugad han paglakat niya.
7 Mga hinigugma, an akon iginsusurat ha iyo diri bag-o nga sugo kondi daan nga sugo nga nakarawat niyo ha tinikangan. Ini nga daan nga sugo amo an pulong nga iyo nabatian.
8 Dugang pa, nagsusurat ako ha iyo hin bag-o nga sugo nga iya gintuman ngan gintutuman liwat niyo, kay an kasisidman nagtitikawara ngan an totoo nga kalamrag nasanag na.
9 An nasiring nga aada hiya ha kalamrag pero nangangalas ha iya bugto aada ha kasisidman tubtob yana.
10 An nahigugma ha iya bugto nagpapabilin ha kalamrag, ngan waray hiparakdolan dida ha iya.
11 Pero an nangangalas ha iya bugto aada ha kasisidman ngan naglalakat ha kasisidman, ngan diri hiya maaram han iya kakadtoan, kay ginbuta han kasisidman an iya mga mata.
12 Hinigugma nga mga anak, nagsusurat ako ha iyo, kay an iyo mga sala ginpasaylo na tungod han iya ngaran.
13 Mga amay, nagsusurat ako ha iyo, kay iyo nakilala hiya nga nakada na tikang pa ha tinikangan. Mga batan-on nga kalalakin-an, nagsusurat ako ha iyo, kay iyo gindaog an usa nga maraot. Mga anak, nagsusurat ako ha iyo, kay iyo nakilala an Amay.
14 Mga amay, nagsusurat ako ha iyo, kay iyo nakilala hiya nga nakada na tikang pa ha tinikangan. Mga batan-on nga kalalakin-an, nagsusurat ako ha iyo, kay makusog kamo ngan nagpapabilin ha iyo kasingkasing an pulong han Dios ngan gindaog niyo an usa nga maraot.
15 Ayaw niyo higugmaa an kalibotan o an mga butang ha kalibotan. Kon an bisan hin-o nahigugma ha kalibotan, diri hiya nahigugma ha Amay;
16 kay an ngatanan nga aada ha kalibotan—an hingyap han unod ngan an hingyap han mga mata ngan an paghambog han mga gintatag-iya han usa—diri tikang ha Amay, kondi tikang ha kalibotan.
17 Dugang pa, an kalibotan mawawara pati an mga hingyap hito, pero hiya nga nagbubuhat han kaburut-on han Dios magpapadayon ha waray kataposan.
18 Hinigugma nga mga anak, ini na an kataposan nga oras, ngan sugad han iyo hinbatian nga maabot an antikristo,* damu na nga antikristo an nakikita bisan yana; tungod hito maaram kita nga ini na an kataposan nga oras.
19 Kaupod naton hira hadto pero binulag hira ha aton, kay diri hira pariho ha aton;* kay kon pariho hira ha aton, waray unta hira bumulag ha aton. Pero binulag hira basi maipakita nga diri ngatanan pariho ha aton.
20 Ngan ginpili* kamo han usa nga baraan, ngan kamo ngatanan may kahibaro.
21 Nagsusurat ako ha iyo, diri tungod kay diri kamo maaram han kamatuoran, kondi tungod kay maaram kamo hito, ngan tungod kay waray buwa nga nagtitikang ha kamatuoran.
22 Hin-o an buwaon, diri ba hiya nga nagninigar nga hi Jesus an Kristo? Amo ini an antikristo, hiya nga nagninigar han Amay ngan han Anak.
23 An tagsa nga nagninigar han Anak diri inuuyonan han Amay. An nagpapahayag hin pagtoo ha Anak inuuyonan han Amay.
24 Pero kamo, kinahanglan tipigan niyo an iyo nabatian tikang ha tinikangan. Kon iyo titipigan an iyo nabatian tikang ha tinikangan, magpapadayon kamo nga kahiusa han Anak ngan han Amay.
25 Dugang pa, kinabuhi nga waray kataposan an iya iginsaad ha aton.
26 Iginsusurat ko ha iyo ini nga mga butang mahitungod ha mga nangangalimbasog pagpasimang ha iyo.
27 Pero mahitungod ha iyo, ginpili kamo han Dios pinaagi han baraan nga espiritu, ngan ini nga espiritu aada pirme ha iyo, ngan diri na kamo kinahanglan tutdoan han bisan hin-o. An pagpili niya totoo ngan diri buwa, ngan nagtututdo ha iyo han ngatanan nga butang. Magpadayon kamo nga kahiusa niya sugad la han igintutdo ha iyo han espiritu.
28 Salit yana, hinigugma nga mga anak, magpadayon kamo nga kahiusa niya, basi kon ipakita na hiya ha panahon han iya presensya, magkaada unta kita kagawasan ha pagyakan ngan diri magpahirayo ha iya tungod ha kaawod.
29 Tungod kay maaram kamo nga matadong hiya, makakasiguro kamo nga an ngatanan nga nagbubuhat han katadongan anak han Dios.
Mga footnote
^ O “paagi ha pakigmurayaw; pagbayad han sala.”
^ Kitaa an “Antikristo” ha Glossary.
^ O “diri naton kagrupo.”
^ Ha literal, “gindihogan.” Kitaa an “Pagdihog” ha Glossary.
