LOꞌꞌO KAWOTETTAA HAARUWAA

“Saluwaa Xoossai mulekka kunddenna, hara asaukka imettenna kawotettaa essana. He eqqida kawotettai he kawotettata ubbaa gaaceretti xaissana; shin i merinau eqqidi daana.”—Daaneela 2:44.

Xoossaa Kawotettay saluwan deꞌiya ayso. He Kawotettan haaranaadan doorettida Yesuus Kiristtoosi, asaa haaro ubbaa xayssidi, Xoossaa shenee salo xallan gidennan, saꞌankka hananaadan oottana. (Maatiyoosa 6:9, 10) Ha haaroy “nu Godaanne nuna ashshiya Yesuus Kiristtoosa merinaa kawotettaa” gidiyo gishshau, asaa haaruwaa awugaaninne laamettenna. Sarotettay merinau deꞌana.—2 PHeexiroosa 1:11.

WORDDO HAYMAANOOTEE XAYANA

“Seexaanai ba huuphen poo7⁠o kiitanchcha milatanau ba meraa laammees. Hegaa gishshau, Seexaanaa ashkkarati xillotettaa ashkkarata milatanau bantta meraa laamerettikko, hegee gitabaa gidenna; eti wurssettan bantta oosuwaa malaa ekkana.”—2 Qoronttoosa 11:14, 15.

Worddo haymaanootee Dabloosa ooso gidiyoogee erettana; qassi saꞌaappe muleera xayana. Haymaanootee asay asaa ixxanaadaaninne woranaadan oottiyoobay ubbay attana. Hegee ‘worddotenna deꞌo Xoossaa’ siiqiya ubbay “ayyaanaaninne tumatettan” ‘issi ammanuwan’ au goynnanaadan oottana. Hegee sarotettaanne issippetettaa ehaana.—1 Tasalonqqe 1:9; Efisoona 4:5; Yohaannisa 4:23.

ASAA NAATI POLO GIDANA

“Xoossai ba huuphen etaara de7ana. . . . Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7⁠enna. Aissi giikko, ceegabai xayiis.”—Ajjuutaa 21:3, 4.

 Xoossaa Yihooway, asaa naatu gishshau ba shemppuwaa aatti immida, ba Naꞌaa Yesuus Kiristtoosa baggaara hegaa polana. (Yohaannisa 3:16) Yesuusa kaaletuwan asaa naati polo gidana. “Xoossai ba huuphen etaara” deꞌiyo gishshau, tugga ubbay xayana; qassi i “eta aifiyaappe afutta ubbaa quccana.” Asaa nagaraynne tuggay mata wode xayana; “xilloti biittaa laattananne yan merinau de7ana.”—Mazamure 37:29.

IITA AYYAANATI XAYANA

“Kiitanchchai [Yesuus Kiristtoosi] miimminttiyaa, he ceega shooshshaa, xalahe halaqaa woi Seexaanaa giyoogaa oiqqiis; oiqqidi sha7⁠u laittau qachchiis. Kiitanchchai ciimma ollan a yeggidi, . . . asa zareta naa77anttuwaa balettenna mala, he ciimma ollaa qulppi gorddidi attamiis.”—Ajjuutaa 20:2, 3.

Seexaanaynne daydanttati qashettidi, aynne oottennaadan “ciimma ollan” yegettiyo wode eti gattiyo qoho ubbay attana. Eti asaa naata haaranau oottiyo iitabay attana. Seexaanaanne iita ayyaanatu qohoy baynna alamiyan deꞌiyoogee ay keena woppissiyaabee!

‘WURSSETA GALLASSAY’ AADHANA

‘Wurssetta gallassay’ Yesuusi yootido ‘iita waayiyan’ polettana. I, “Sa7ai merettoosappe hachchi gakkanaashin de7⁠ibeennabainne qassi hagaappe sinttaukka mule de7⁠enna iita waayee he wode de7ana” yaagiis.—Maatiyoosa 24:21.

Hegaappe kase hani erenna bashshay gakkiyo gishshau, he waayee wolqqaama gidana. Hegee “Armmageedoona” geetettiya, ‘Ubbaappe Wolqqaama Xoossaa gita gallassaa olan’ kuuyettana.—Ajjuutaa 16:14, 16.

Suurebaa dosiya, ubbasan deꞌiya asay ha iita alamee xayiyo wodiyaa yeemotti naagees. Xoossaa Kawotettaa haaruwan eti demmana anjjotuppe amaridaageeta beꞌa.

XOOSSAY DAROBAA OOTTANA

‘Zawi baynna daro asay’ sarotettay kumido ooratta alamiyan deꞌana: Xoossaa Qaalay, qoodanau danddayettenna ‘zawi baynna daro asay’ ‘daro waayiyaappe’ attidi xilloti deꞌana ooratta alamiyan deꞌanaagaa yootees. (Ajjuutaa 7:9, 10, 14; 2 PHeexiroosa 3:13) Eti ‘Xoossaa dorssaa, saꞌaa nagaraa xayssiya,’ Yesuus Kiristtoosa baggaara atotettaa demmidoogaa yootana.—Yohaannisa 1:29.

Xoossaa timirttee daro goꞌꞌaa demissana: Ooratta alamiyan “sa7ai GODAA eriyoogan kumana.” (Isiyaasa 11:9) Asa ubbaara saruwan, qassi heeraa moorennan deꞌiyoogaa gujjin, darobaa Xoossaappe tamaarana. Xoossay, “Taani GODAI, ne Xoossai, nena maaddiyaabaa tamaarissiyaagaa. Neeni baanau bessiya ogiyankka nena kaalettiyai tana” yaagidi qaalaa geliis.—Isiyaasa 48:17.

Nuuni siiqiyo hayqqidaageeti duufuwaappe denddana: Yesuusi saꞌan deꞌiyo wode, ba dabbuwaa Alꞌꞌaazara hayquwaappe denttiis. (Yohaannisa 11:1, 5, 38-44) Yaatiyoogan, Xoossaa Kawotettaa haaruwan i hegaa keehi aahuwan oottanaagaa bessiis.—Yohaannisa 5:28, 29.

Sarotettaynne xillotettay merinau darana: Kiristtoosa haaruwan, makkalabay deꞌenna. Hegaa waati eriyoo? Yesuusi asaa wozanan deꞌiyaabaa beꞌana danddayiyoogaa eriyo gishshataassa; i he eraa goꞌettidi xillotanne nagaranchata pirddana. Bantta iita ogiyaappe simmanau koyennaageeti Xoossay ehiyo ooratta alamiyan deꞌana danddayokkona.—Mazamure 37:9, 10; Isiyaasa 11:3, 4; 65:20; Maatiyoosa 9:4.

Nuuni beꞌidobay, sinttappe yaana maalaalissiya wodiyaa xeelliyaagan Geeshsha Maxaafan deꞌiya daro hiraagatuppe qoodan qii guutta. Xoossaa Kawotettay saꞌaa haariyo wode, ‘sarotettay’ merinau darana. (Mazamure 37:11, 29) Asaa naati unꞌꞌettanaadan oottida azzanuwaunne tuggau gaaso gidiya ubbabay xayana. Xoossay, “Taani ubbabaa ooraxissais. . . . Taani haasayiyoogee ammanettiyaagaanne tuma” yaagidi qaalaa gelido gishshau, hegee polettanaagaa ammanettana danddayoos.—Ajjuutaa 21:5.