1. Nuuni ufayttanaadan oottiya dummabay aybee?

YIHOOWA asaa qooday gujjiyogaa siyiyoogee keehi ufayssees! Zillaytti nuuni Geeshsha Maxaafaa xannaˈissidoogeetu qooday 10,000,000⁠ppe daro. Hegee tumukka Xoossaa asay ba pooˈuwaa pooˈissiyoogaa bessiyaaba! Qassi Godaa Kahuwaa Baalan nuuni mokkido, eranawu koyiya daro miiloone asaa qoppa. Eti yaatiyoogan, Xoossay wozuwaa giigissiyoogan nuna siiqido siiquwaabaa erana danddayoosona.—1 Yoh. 4:9.

2, 3. (a) ‘Saluwan pooˈiya xoolinttedan’ pooˈenna mala nuna diggennabay aybee? (b) Yesuusi Maatiyoosa 5:14-16n yootidobaara gayttidaagan, nuuni ay beˈanee?

² Kumetta saˈan deˈiya Yihoowa asay daro qaalaa haasayees. Gidikkokka, nuuni nu Aawaa Yihoowa issippetettan sabbennaadan hegee diggenna. (Ajj. 7:9) Nu qaalay ayba gidin woy nuuni awan deˈinkka, nuuni alamiyaa ‘asaa giddon saluwan pooˈiya xoolintte’ mala.—Pili. 2:15.

³ Nuuni beˈiyo dichchaynne issippetettay, qassi ubbatoo naagi uttanawu baaxetiyoogee nuuni Yihoowa bonchchissanaadan maaddees. Hegee waanidi haniyaakko, ha huuphe  yohuwan pilggana.—Maatiyoosa 5:14-16 nabbaba.  

4, 5. (a) Sabbakiyoogaappe hara aybin nu pooˈuwaa pooˈissana danddayiyoo? (b) Nu keha eeshshay waatidi goˈˈana danddayii? (Doomettan deˈiya misiliyaa xeella.)

⁴ “Ooninne ha attida wodiyan ba pooˈuwaa pooˈissana xayikko . . . Godawu ammanettiya tumanchcha asa gidana danddayenna.” Hegee Tamme 1, 1925 Wochiyo Keelan, “Xuman Pooˈiya Pooˈuwaa” giya huuphe yohuwan kiyida qofa. He huuphe yohoy hegaa qonccissiiddi, “I saˈan deˈiya asawu mishiraachchuwaa yootiyoogaaninne ba deˈoy pooˈuwaa ogiyaara maayanaadan oottiyoogan yaatana bessees” yaagiis. Nuuni nu pooˈuwaa pooˈissiyo issi ogee mishiraachchuwaa yootiyoogaanne asaa erissiyo ashkkara oottiyoogaa gidiyoogee tuma. (Maa. 28:19, 20) Hegaa bollikka, nuuni Kiristtaanetuppe koyettiyaagaadan deˈiyoogan Yihoowa bonchchissana danddayoos. Nuuni haasayissiyoogeetinne ogiyaara kanttiyaageetikka nu eeshshaa akeekoosona. Nuuni laggedan pashkki giyoogeenne wozanappe sarotiyoogee nuuni oonakko, qassi ay mala Xoossawu goynniyaakko darobaa qonccissees.

⁵ Yesuusi ba erissiyo ashkkarata, “Soo geliiddi sarotite” yaagiis. (Maa. 10:12) Yesuusinne I kiittidoogeeti darotoo sabbakiyo heeran asay erenna asa ba soo shoobbiyoogee oorattaba gidenna. Ha wodiyan, darosan hegaa mala meezee baawa. Gidikkokka, neeni issi uraa soo ayssi biidaakko pashkki gaada loˈˈo hanotan yootiyoogee, darotoo izaawa qofissidabaa woy I yiillotidobaa zarbbissees. Erettiiddi darotoo ufayssiya hanotan pashkki giyoogee keehi loˈˈo. Ishatinne michchoti xuufiyaa wottiyo gaariyaa goˈettidi dabaaban markkattiyo wodekka hegee loˈˈo gidiyoogee beettees. Neeni dabaaban hegaadan sabbakiyo wode pashkki gaada sarotiyo wode asay ufayttiyoogaa akeekana danddayaasa. Hegee eti nuukko shiiqidi xuufiyaa ekkanaadan denttettana danddayees. Ne keha eeshshaykka asaara haasayaa doommanaadan maaddana danddayees.

6. Issi cima aqo laggeti bantta haggaazuwaa waatidi aassidonaa?

⁶ Inggilizen issi cima aqo laggeti sooppe soo biidi haggaazennaadan sahoy eta diggiis. Eti bantta keettaa penggen bantta pooˈuwaa pooˈissanawu qofaa qachchidosona. Heeran deˈiya issi timirtte keettaappe bantta naata efaanawu yelidaageeti aadhdhiyo saatiyan eti Geeshsha Maxaafaa qofay deˈiyo amarida xuufeta xaraphpheezan wottoosona. Daroti eranawu koyidi Yelagati Oychchiyo Oyshaa—Oosuwan Peˈiya Zaaruwaa, Paydo 1⁠nne 2, qassi brooshuretakka ekkidosona. Eta gubaaˈiyan deˈiya issi aqinyiyaa he aqo laggetuura sabbakiyoogaa doommaasu. A pashkki giyoogeenne he aqo laggeti wozanappe baaxetiyoogee issi aaway Geeshsha Maxaafaa xannaˈanawu eeno gaanaadan denttettiis.

7. Intte biitti yiyaageeta waatada maaddana danddayay?

⁷ Mata layttappe haa simmin, daro biittata beteti zuloosona. He asati Yihoowanne A halchchuwaa eranaadan maaddanawu ay oottana danddayay? Intte biitti yiya asatuppe daroti haasayiyo qaalan sarotaa koyro tamaarana danddayaasa. Yaatanawu, JW Language appee nena maaddana danddayees. Hegaa bollikka, eta ufayssana danddayiya amarida qaalata tamaariyoogee loˈˈo. Yaatada, jw.org saytiyaa eta erissada yan eta qaalan deˈiya dumma dumma biidotanne xuufeta bessana danddayaasa.—Zaa. 10:19.

8, 9. (a) Saaminttawu gidduwan shiiqiyo shiiquwan nuna maaddiyaabaa ay demmiyoo? (b) Naati shiiquwan zaaranaadan yelidaageeti waatidi maaddana danddayiyoonaa?

 ⁸ Nuuni haggaazuwan loytti ayfana mala, Yihooway Deˈuwaanne Haggaazuwaa SHiiquwaa siiquwan giigissiis. He shiiquwan nuuni demmiyo maaddiya kaaletoy nuuppe daroti zaarettidi oychchanawunne Geeshsha Maxaafaa xannaˈissanawu xalanaadan maaddees.

⁹ Nu naati shiiquwan zaariyoogaa shiiquwaa koyro yiya daroti akeekidosona. Yelidaageetoo, intte naati bantta wozanaappe zaaranaadan tamaarissiyoogan eti bantta pooˈuwaa pooˈissanaadan maaddite. Eti wozanappe yootiyo qoncce qofay eranawu koyidi yiida imattati tumaa akeekanaadan issi issitoo maaddiis.—1 Qor. 14:25.

10. So asaa goynoy issippetettaa minttanawu waati maaddii?

¹⁰ Ne pooˈuwaa pooˈissiyo hara ogee sooninne gubaaˈiyan issippetettay minnanaadan oottiyoogaa. Yelidaageeti So Asaa Goynuwaa ubbatoo goynnanaadan giigissiyoogee hegaa oottana danddayiyo issi oge. Daroti aginaa giddon issitoo JW Brodkastingiyaa beˈoosona. Hegaa beˈi simmidi odettida qofaa waati oosuwan peeshshanaakko tobbiyoogee loˈˈo. Yelidaageeti so asaa goynuwaa kaalettiyo wode guutta naˈassinne yelaga naˈassi koshshiya kaaletoy issi mala gidennaagaa hassayana bessees. Xannaˈiyo xuufiyaa qofaa so asaa ubbaa goˈˈiya hanotan oosuwan peeshshiyo ogiyaa qonccissite.—Maz. 148:12, 13.

11-13. Ubbaykka waatidi gubaaˈiyaa issippetettaa minttananne harati bantta pooˈuwaa pooˈissanaadan maaddana danddayiyoo?

¹¹ Yelagati gubaaˈiyaa issippetettay minnanaadan, qassi yaatiyoogan harati bantta pooˈuwaa pooˈissanaadan minttettanawu waatana danddayiyoonaa? Neeni yelaga Kiristtaane gidikko, cimatussi qoppanawu halchchiyoogee loˈˈoba. Eti daro laytti haggaaziyoogan demmidobaa yootana mala bonchchuwan oychchana danddayaasa. Hegee nena minttettana, qassi intte pooˈuwaa kaseegaappe aatti pooˈissanaadan nenakka etakka denttettana. Hegaa bollikka, nuuni ubbay SHiiquwaa Addaraashan shiiqiyaageeta mokkanawu halchchoos. Neeni yaatiyoogee issippetettaa minttees, qassi shiiquwaa yiida imattatikka bantta pooˈuwaa pooˈissanawu koyanaadan  denttettana danddayees. Neeni geella uttiyoosaa bessaydda etawu pashkki gaana danddayaasa. Eti boorassenna mala haratuura eretissanawu mala.

¹² Haggaazuwaa shiiquwaa kaalettiyo maatay neessi imettikko, cimidaageeti haggaazanaadan loytta maaddana danddayaasa. Eta hanotaara giigiya mootti etawu deˈii? Issi issi hanotan, eti asatettan banttana maaddana danddayiya yelagaara haggaazanaadan oottana danddayaasa. Qassi sahoy darobaa ootissenna ishatu woy michchotu hanotaa akeekiyoogaa bessana danddayaasa. Ee, neeni akeekan qoppiyoogee meezee deˈin xayin, yelagikka cimikka mishiraachchuwaa mishettidi yootanaadan maaddana danddayees.—Wog. 19:32.

¹³ Mazamuraawee, “Ishantti issippetettan de7iyoogee aiba lo77obeenne ufaissiyaabee!” yaagiis. (Mazamure 133:1, 2 nabbaba.) Issippe deˈiyoogee Yihoowawu goynniya harati eta loˈˈobaˈwu denttettanaadan Israaˈeelata keehi maaddiis. Hegee sawiyaanne ufayssiya, tiyiyo zaytiyaa mala. Neeni issippetettaa minttiya loˈˈobawu ne ishatanne michchota denttettanawu murttiyoogee loˈˈoba. Neeni yaataydda deˈikko hegee ufayssiyaaba. Hegaa ‘dooya bessada,’ woykko kaseegaappe gujjada, qassi ubbatoo oottana danddayay?—2 Qor. 6:11-13.

14. Ne shooron ne pooˈoy pooˈanaadan ay oottana danddayay?

¹⁴ Geeshsha Maxaafaa tumaa pooˈoy ne shooron pooˈanaadan kaseegaappe aaruwan baaxetiyoogee shin? Neeni kehabaa haasayiyoogeenne oottiyoogee issi shooroy tumaa dosanaadan oottana danddayees. Nena hagaadan oychcha: ‘Ta shooroti tana waati xeelliyoonaa? Ta keettaanne gibbiyaa geeshshatettan ta shooron loˈˈo leemiso gidiyaanaa? Ta huuphen qoppada harata maaddiyaanaa?’ Hara ishatuuranne michotuura haasayaydda eta dabbota, shoorota, etaara oottiyaageeta woy tamaariyaageeta eta kehatettaynne loˈˈo eeshshay waati maaddidaakko oychchiyoogee loˈˈo. Neeni loˈˈobaa siyana danddayaasa.—Efi. 5:9.

15. Naagi uttiyoogee keehi koshshiyoy aybissee?

¹⁵ Nu pooˈuwaa gujji pooˈissanawu baaxetiyo wode, nuuni qoppiyoobaykka maaddees. Yesuusi ba erissiyo ashkkarata, “Naagi uttite” giidi zaari zaari zoriis. (Maa. 24:42; 25:13; 26:41) Nuuni “iita waayee” gamˈˈidi yaana, I yiyoogee attenna shin nu wodiyan yeenna giidi qoppikko, eesuwan sabbakanawu qoppokko. (Maa. 24:21) Nu pooˈoy nu shooron pholqqu giyoogaa aggidi, xilqqi gaananne ubba qassi xayana danddayees.

16, 17. Neeni ubbatoo naaga uttanawu ay oottana danddayay?

¹⁶ Ha wayssiya wodee iiti iiti biyo wode, nuuni ubbay naagi uttana koshshees. Yihooway likke ba keerido wodiyan denddana. Hegee aynne sirissenna. (Maa. 24:42-44) Hegee gakkanaashin, ubbatoo danddayan naaga utta. Xoossaa Qaalaa ubba galla nabbaba, qassi woosan minna. (1 PHe. 4:7) Ubbatoo naagi uttiyoogaaninne bantta pooˈuwaa pooˈissiyoogan bantta deˈuwan ufayttiya ishatunne michchotu loˈˈo leemisuwaa qoppa. Issi loˈˈo leemisoy, Hosppune 15, 2012 Wochiyo Keelan (Amaarattuwaa), sinttaa 18-21n, “Laappun Tammu Layttawu Ayhuda Asa Maayuwaa Oyqqiyoogaa” giya huuphe yohuwan deˈiyaagaa.

¹⁷ Minttettiya oosoynne laggetettay ne deˈuwan kumo. Hegan neeni keehi ufayttana, qassi neeyyo wodee eesuwan aadhdhidaba milatana. (Efi. 5:16) Xeetu layttappe kase, nu ishantti oosuwan buusidi darobaa oottidosona. SHin Yihooway kaalettin, nuuni ha wodiyan hegaappe daruwaa oottida. Kase qoppanawukka danddayettennaagaa keenaa nu pooˈuwaa pooˈissoos.

18, 19. Nuuni naagi uttanaadaaninne minnanaadan cimati waati maaddiyoonaa? Leemisuwaa yoota.

 ¹⁸ Nuuni nagaranchcha gidiyoogee Yihoowa ufayssiya ogiyan ayyo haggaazanawu diggennaagaa eriyoogee nu ammanuwaa minttiyaaba. Yaanido gishshawu, Yihooway “imota” gidida attuma asata, gubaaˈe cimata immidoogaa nashsha. (Efisoona 4:8, 11, 12 nabbaba.) Issi cimay nena oychchanawu yiyo wode, I yootiyo aadhdhida eraaninne zoriyan goˈetta.

¹⁹ Maayettanawu metootida azinaynne machiyaa oychchin, Inggilize biittan naaˈˈu cimati eta maaddidosona. Machchiyaa ayyaanaaban bawu lagge gidida uraara waaxettabeennabadan qoppaasu. Azinay I loˈˈo asttamaare gidennaagaanne so asaa goynuwaa ubbatoo goynnanaadan hanotaa giigissibeennaagaa ammaniis. Cimati he aqo laggeti Yesuusi leemiso gidiyoobaa qoppanaadan oottidosona. Yesuusi ba erissiyo ashkkaratussinne etawu koshshiyaabawu qoppiis. Azinay Yesuusa leemisuwaa kaallanaadan he cimati zoridosona. Machchiyaa qassi danddayanchcha gidanaadan minttettidosona. He aqo laggeti bantta naaˈˈu naatuura so asaa goynuwaa goynnanawu waatanaakko maaddiyaabaakka cimati zoridosona. (Efi. 5:21-29) Guyyeppe he azinay oottidobawu cimati A galatidosona. I minnanaadaaninne ba machcheessi ayyaanaaban loˈˈo huuphe gidanawu geeshsha ayyaanan ammanettanaadankka cimati A minttettidosona. Cimati he so asawu siiquwan qoppidoogeenne eta kaafidoogee eti bantta pooˈuwaa pooˈissanaadan maaddiis.

20. Ne pooˈuwaa pooˈissiyo wode ay demmanaagaa ammanettana danddayay?

²⁰ Mazamuraawee, Yihoowassi “yayyiyaageetinne a ogiyan hemettiyaageeti ubbai” ufayttiyoogaa yootiis. (Maz. 128:1) Neeni harati Xoossawu haggaazanaadan shoobbiyoogan, issippetettaa minttiyaabaa oottiyoogaaninne ubbatoo naaga uttiyoogan ne pooˈuwaa pooˈissiyo wode, keehi ufayttana. Harati ne loˈˈo oosuwaa beˈana, qassi daroti nu Aawaa bonchchanaadan hegee denttettana.—Maa. 5:16.