Silempwale ni Matewus 8:1-34
8 Akhuruwakaru vamwaako, atthu antxipale yaapatxera omutthara.
2 Vano namakokho mmoha aamwaattamela ni anamukokhorela ohoolo wawe, aneera: “Apwiya, mwatthuna vale, mukilamihe.”
3 Nto, Yesu aahookola ntata nawe ni anamutava mulopwana ole eeraka: “Miyo kinnatthuna! Weera mulame.” Moohipisa mulopwana ole, aalama.*
4 Yesu aamweerela: “Mwiikosoope weera muhimuleele mutthu etthu ela, mene murowe mwiisooneihe wa anamakeya ni mwavahe yoovaha Mose aahimmaawe weera awo esuwele weera moolamihiwa.”
5 Ariki ophiyaru oKafarnawu, mutokweene mmoha aanakhotto aamwaattamela ananvekela nikhavihero
6 amweerelaka: “Pwiya, kaporo aka orimwiisaatalela owaani, onoovoreiwa ni khanwera weetta nave ennamuxupa vantxipale.”
7 Yesu aamweerela: “Kaphiyaru iwo, kinoomulamiha.”
8 Mutokweene aanakhotto aamwaakhula: “Pwiya nkiphwanenle owaakhelani owannyaka, mweere ohima paahi masu ooweera kaporo aka alame ni owo onoolama.
9 Miyo-tho mutthu kinlamuliwa, nave-tho kookhalano anakhotto kinaalamulaaka. Kamweerela mmoha: ‘Orowe!’ Owo onnarowa, ni kamweerela mukina: ‘Owe!’ Owo onnawa, ni kamweerela kaporo aka: ‘Opake ela!’ Owo onnapaka.”
10 Yesu iiwakaru masu a mulopwana ole, aatikhiniheya vantxipale ni aahaaleela atthu ale yaamutthara: “Miyo kinnooleelani ekhaikhai weera: wIsraeli wootheene nkimphwannye mutthu orinono nroromelo ntokotoko ompwaha mulopwana ola.
11 Miyo kinnooleelani weera, atthu antxipale enaaweele ninkhuma nsuwa ni onkela nsuwa ni eneekilaathi vameesani vamoha Moomweneni wa wiirimu ni Abrahamu, Isaki ni Yakobe,
12 mene ayuda,* eroromelihinwe waakhela Omwene, enrowa ovonyeriwa vaate mpiphini, ni ti weiwo enrowaaya winla ni okhuuriha maino aya.”
13 Vano, Yesu aamweerela mutokweene aanakhotto: “Murooke. Ni eweereeleni moovarihana ni nroromelo moonihenraanyu.” Ewoora ene yeele, kaporo a mutokweene ole aanakhotto aalammaawe.
14 Yesu aphiyakaru owannyawe Pedru, aaphwannye apwiya-mwaana awe Pedru yiisaatalenleene evoreiwaka efeepere.*
15 Nto Yesu aahaavara ntata ni efeepere yaahaamaala, ni yaavinya enapatxera omwaapeela yootxa.
16 Wiilakaru, Yesu aawiiheriwa atthu antxipale yaarino eretta ya matxiini ni aahoomola minepa iyo soonanara ni masu mamoha ni aahaalamiha atthu ootheene yaavoreiwa.
17 Eyo yeereñye weera ekwanele masu a profeta Yesaya yaawo eneera: “Yoowo okunxe ni otenxe ikwerere sahu.”
18 Emaara Yesu aawonnaawe atthu emurukurenreene, aahaaruma atthareli awe weera erowe ekhopela ekina ya ephareya.
19 Ni mulipa oolepa mmoha aamwaattamela anamweerela: “Muhusiha, kinimoottharani nipuro nri poothe muneeraanyu murowewo.”
20 Mene Yesu omwaakhula enre: “Akhwatte aakhalano mitxupha* ni apalame aakhalano ipuru, mene Mwaana a Mutthu khaano empa.”
21 Nto mutthareli mukina aamweerela: “Apwiya, mukaakhulele weera kaavithe toko apapaka.”
22 Yesu omwaakhula enre: “Nvirelele okitthara, mwaahiye alipa ookhwa evithanaka yaaworu.”
23 Yesu anwela paarku ni atthareli awe yaamutthara.
24 Evinyakaru, yaahoopa epheyo etokotoko mpaka paarku ohalela okhuneeliwa* ni mutekuteku wa maahi, mene Yesu eera akonaka.
25 Nto atthareli awe yaarowa onvinxa yeeraka: “Apwiya, munivuluxe nihanle vakhaaniini okhwa!”
26 Mene Yesu aaweerela: “Mwaha wa heeni munoovaanyu atthu a nroromelo vakhaaniini?” Vano, Yesu aavinya anaximwela epheyo ni ephareya. Avinyaka vaavo waakhala omaaleleya otokotoko.
27 Atthareli yoonakaru etthu ele aapankaawe waawuuma owanoni* ni yaaheera: “Mulopwana heeni yoola? Oniiweleliwa ni epheyo mpaka ni ephareya.”
28 Emaara aaphiñyaawe ekhopela ekina ya ephareya, muttetthe wa oGadara, alopwana eeli yaarino minepa soonanara yaakhuma munikhukuni* ni yaarowa okumana ni Yesu. Awosa yaari oowali, khaavo mutthu iileva ovira ephiro ele.
29 Ni yaapatxera okhuwela yeeraka: “Nyuwo Mwaana a Muluku, muntthuna eheeni ni hiyo? Mwaawenle onihooxa ehinaaye ophiya etempu ahu?”
30 Ottayi wa vaavale, naakhala nipuro saaraayavo ikuluwe sintxipale sitxihiwaka.
31 Hiihaale, mademooniyu yaapatxera omutxonttela Yesu yeeraka: “Mwanoomola vale, munoomolele mukuluweni, iye sintxa iwe.”
32 Ni aaweerela: “Muroweke!” Ni minepa soonanara saakhuma moowaakuveya inavolowa mukuluweni ni ikuluwe saahiirihela mphareya, sinakhwela mwemmo.
33 Atthu yaatxiha ikuluwe yaatthawa ni yaaphiñyaaya osidade yaahima itthu sootheene seereñye ohela mpuwa ele yaaweerenle asilopwana eeli ale yaarino minepa soonanara.
34 Nto atthu ootheene a esidade ele yaarowa okumana ni Yesu, emphwanyakaru yaamutxonttelela weera akhume muttetthe ole.
Footnotes
^ Eyo tiiyo, yammalela makokho.
^ Ayuda naari neere anamwane a Omwene enhimmwa ayuda yahaakhulenle eparakha ya okhala oopatxera weerela eparte ya olamulela vamoha ni Yesu.
^ Naari: “yaapwexaka erutthu yootheene.”
^ Naari: “mittupha.”
^ Naari: “oneelihiwa, ottattihiwa.”
^ Naari: “yaatikhiniheya.”
^ Naari: “mmahiyeni.”
