Silempwale ni Matewus 19:1-30
19 Yesu amalihakaru ohima itthu iya, aakhuma oGalileya anarowa mwiilaano* wa oYudeya, ekhopela ekina ya mooloko Yordani.
2 Muloko mutokotoko wa atthu, waamutthara ni owo aahaalamiha.
3 Afarisi akina yaamwaattamela Yesu etthunaka omweerera, yaamukoha: “Neereke mulopwana onnaakhuleliwa waahiya amwaarawe mwaha wa nthowa nri poothe?”
4 Yesu owaakhula enre: “Khamusomme weera ole aapattunxe atthu woopatxerani, ampattunxe mulopwana ni muthiyana?
5 Ni aaheera: ‘Tivawonto mulopwana onkelaawe waahiya apapawe ni ameyawe ni onrowa okhala vamoha ni amwaarawe, ni ooweeli aya, enrowa okhala erutthu emoha paahi?’
6 Nto ovinyera vaavaawo, khasikhanle irutthu piili* menento erutthu emoha paahi. Tivawonto, ele Muluku ophitaanyalaawe, mutthu ahimwalanihe.”
7 Vano yaamukoha: “Mwaha wa heeni Mose aahimmaawe weera mulopwana anvaheke mwaariye edokumentu ya omwalana ni amoomoleke?”
8 Owo owaakhula enre: “Waari mwaha woowuuma wanyu murima Mose aakhulenlaawe weera mmwalaneke ni asaarinyu, mene woopatxerani khaiyene waari hiiho.
9 Miyo kinnooleelani weera ole ommwalana ni amwaarawe, ohikhanle mwaha wa okonihana woohireerela,* ni onamuthela muthiyana mukina, mutthu owo onooraruwa.”
10 Atthareli yaaheera: “Wakhala weera ti yeeyo eneereya mulopwana ni amwaarawe phataari ohithela.”
11 Yesu aaweerela: “Khaiyene atthu ootheene annawera opaka ele kinhimaaka mene enwera opaka ti yaale paahi evahinwe ni Muluku.
12 Akina eri oohithela, mwaha wooweera eyarinwe hiiho ni akina eri oohithela mwaha wooweera aroopakiwa* ni atthu, aakhala ale anthanla ohithela mwaha wa Omwene wa wiirimu. Ole onaakhulela okhalano ekumi moota ene yoola, apakeke eyo.”
13 Vanonto, aawiiheriwa anamwane weera aareelihe* ni aavekelele, mene atthareli yaahaakhoottihera atthu weera ehimuroihele Yesu anamwane.”
14 Yesu aaweerela: “Muhaakhoottihere anamwane owa wa miyo, woona weera, Omwene wa wiirimu ti wa atthu ale enkhala ntoko anamwane ala.”
15 Owo aawiiyaathera matata awe ni aakhuma nipuro nne.
16 Mutthu mmoha, aamwaattamela Yesu anamukoha ha: “Muhusiha, etthu heeni yooreera kintthuneyaaka opaka weera kiphwanye ekumi yoohimala?”
17 Yesu aamwaakhula amukohaka: “Heeni munkikohaanyu woohima sa itthu sooreera? Ompaka itthu sooreera Muluku,* mwaatthunaka okhalano ekumi yoohimala, mwiiweleleke malamulo.”
18 Owo aamukoha Yesu: “Malamulo heeni?” Yesu aamwaakhula: “Muhiive, muhiraruwe, muhiiye, muhimukhalele onamoona woowootha mukhwiinyu,
19 mwaattittimihe apapinyu ni ameyanyu; ni mmusiveleke mukhwiinyu ntoko muniisivelaanyuno mwaneenaanyu.”
20 Mmiravo ole aamweerela Yesu: “Miyo kinnakwanihera malamulo ala ootheene, enkihalela eheeni?”
21 Yesu aamweerela: “Mwaatthunaka okhala oomalela, murowe mwatumihe itthu sanyu sootheene, ni musurukhu ene mwaavahe atthu oohaawa, mwapaka eyo, munookhalano muhakhu wiirimu. Ni nwe mukhale mutthareli aka.”
22 Iiwakaru masu ale, mmiravo ole aapwanhe ariipinweene murima mwaha wooweera aakhalano itthu sintxipale sa weerutthuni.*
23 Nto Yesu aaweerela atthareli awe: “Miyo kinnooleelani ekhaikhai weera: Onookela okhala wooxupa namuhakhu ovolowa Moomweneni wa wiirimu.
24 Kinnooleelani-tho weera: Ti wookhweya ekamelu ovira va mwiitheni wa sinkano, ohiya namuhakhu ovolowa Moomweneni wa Muluku.”
25 Atthareli yiiwakaru eyo, yaatikhiniheya ni yaaheera: “Taaninto aneera avuluxiwe?”
26 Yesu aahaawehexexa awo anaweerela: “Vamaithoni vaatthu eyo ti yoohiwereya, mene vamaithoni va Muluku, itthu sootheene ti soowereya.”
27 Pedru aahaakhula amukohaka ha: “Nkawehani, noohiya itthu sootheene nnoottharani nyuwo Apwiya. Vanonto, ninrowa waakhela eheeni?”
28 Yesu aawaakhula: “Kinnooleelani ekhaikhai weera: Etempu itthu sinkelaaya otthikiheriwa okhala inyowani, Mwaana a Mutthu akilaathi veehitxeni yoowaara, nyuwosa munoorowa okilaathi ihitxe 12 ni munoorowa othoriha mahimo 12 a ana a Israeli. Woona weera mwa atthareli aka.
29 Ni ootheene ole anaahiye empaawe, asinnawe, asirokorawe, apapawe, ameyawe, anamwane awe naari ematta awe, mwaha wa nsina naka, onimwaakhela itthu sintxipale ni onoophwanya ekumi yoohimala.
30 “Antxipale eri oopatxera enkela okhala oomalihera; ni antxipale eri oomalihera enkela okhala oopatxera.
