Silempwale ni Matewus 20:1-34
-
Anamuteko envara ematta ya ewuuva ni enaakhela musurukhu woolikana (1-16)
-
Mwa ekwaha ekina-tho okhwa wa Yesu onnalaiheriwa ohinaaye weereya (17-19)
-
Ovekela okilaathela mapuro oottittimiheya Moomweneni (20-28)
-
Yesu ooveleela ekumi awe weera aavuluxe atthu antxipale (28)
-
-
Alipa oohoona eeli ennalamihiwa (29-34)
20 “Omwene wa wiirimu onoolikana ni mwaneene ematta aavinnye oxeexelo anarowa owaasa anamuteko weera evare muteko ematta awe ya ewuuva.
2 Avaanelakaru naawo waaliva etenaariyu* emoha va nihikuni, aahaarumiha okela ematta awe ya ewuuva.
3 Ewoora yeettelaka 9, aakhuma anarowa omerkaatu, aahaaphwanya atthu akina yeemenleene ehikhanleno muteko woovara,
4 ni aaweerela: ‘Nyuwo-tho murowe omatta waka, mene miyo kinimooreerelani murima.’
5 Moowi hiiho, awosa yaarowa. Ni aatthikelawo-tho ewoora ya 12 ni 15, aapaka etthu emoha-moharu.
6 Ni ewoora ya 17, owo aakhuma ni aahaaphwanya atthu akina vale yeemenleene ehivaraka etthu, aahaakoha: “Mwaha wa heeni muraanyu va nihiku nootheene nna muhivaraka etthu?”
7 Yaamwaakhula: ‘Mwaha wooweera khaavo onivanhe muteko woovara.’ Ni aaweerela: ‘Nyuwo-tho muroweke ematta aka ya ewuuva.’
8 Wiilalaaya, mwaneene ematta aamweerela mulipa oowaaweha-weha anamuteko: ‘Nwiitthane anamuteko ni mwaalive musurukhu aya, mwaapatxeraka waaliva oomalihera ophiya, ni mwaamaliheraka waaliva oopatxera ophiya.’
9 Ale yiitthanelinwe ovara muteko ewoora ya 17, yaahoowa mutthu ti mutthu aaliviwa etenaariyu* emoha.
10 Nto, ephiyakaru ekwaha yooliviwa anamuteko oopatxera, awosa yuupuwela weera yaakela oliviwa musurukhu muntxipale, mene yaalivinwe etenaariyu* emoha mutthu ti mutthu.
11 Yoonakaru weera yaalivinwe etenaariyu emoha, yaapatxera omukhupanya mwaneene ematta
12 ni yaamweerela: ‘Alasa evanre ewoora emoha paahi, nnaamweera vareene hiiho, nyuwo mwaalinve musurukhu woolikana ni hiyo nivilenle nsuwa nootheene nna na olelo!’
13 Nto amwaakhulaka mmoha aanamuteko ale aamweerela: ‘Nthamwene, nkootxentxerenle. Khaiyene naavaanenle wooliva etenaariyu* emoha?
14 Mukuxeke eri yaawinyu ni mpwaheke, miyo kintthuna onvaha ola oomalihera ntoko nyuwo.
15 Keereke nkaanono etireitu yoopakela* itthu saka etthu kintthunaaka? Naari, neereke muri ni nrima mwaha wooweera kirimwaareerela murima awo?’
16 Nto, oomalihera enkela okhala oopatxera, ni oopatxera enkela okhala oomalihera.”
17 Ekelaka oYerusalemu, Yesu aahaakuxera atthareli awe 12 nipuro noohikhala atthu, ni yeettaka hiihaale mmuseweni, aaweerela:
18 “Mwiiwe, ninkela oYerusalemu ni Mwaana a Mutthu onimwinnyereriwa mmatatani mwa asitokweene aanamakeya ni mwa alipa oolepa ni awo enoomwiiva
19 ni enonveleela mmatatani mwa amalapo weera empuhere,* onwaxula ni omwiiva vamwirini mene onookela ovinyererihiwa nihiku nanaararu.”
20 Nto, yaamwaattamela amwaarawe Zebedeyo ni anamwane aya emukokhorelaka ohoolo wawe, yanvekela etthu.
21 Owo aahaakoha: “Muntthuna eheeni?” Awo omwaakhula yenre: “Kinvekela weera mwakilaathi Moomweneni mwanyu, anamwane aka ala eeli mmoha akilaathi moono anyu woolopwana mukina woothiyana.”
22 Yesu owaakhula enre: “Nyuwosa khamusuwenle etthu munvekelaanyu. Neereke munoowurera ekoopho yeeyo kihanlaaka owurera?” Omwaakhula yenre: “Aani.”
23 Yesu aaweerela: “Mweekhaikhai, munoowurera ekoopho aka, mene okilaathi moono aka woolopwana naari woothiyana, khaiyene muritti aka. Mapuro ala, ta atthu ale Atiithi aka yaathanlenlaaya.”
24 Atthareli akina 10 esuwelakaru eyo, yaahaanyoonyeriwa atthareli eeli ale yaapanke eyo.
25 Mene Yesu aawiitthana atthareli awe ootheene ni aaweerela: “Nyuwosa moosuwela weera anamalamulela a mulaponi enaalamulela atthu ntoko entthunelaaya ni asitokweene ennavarela muteko ikuru saya weera yaawere atthu.
26 Nto eheereye hiiha wa nyuwo. Mene ole ontthuna okhala mutokweene variyari vanyu, ontthuneya okhala kaporo anyu,
27 ni ole ontthuna okhala oopatxera variyari vanyu, ontthuneya weera akhale kaporo anyu,
28 hiiho-tho, Mwaana a Mutthu, owiiye khaiyene weera avareliweke muteko, mene weera aavareleke muteko atthu ni oveleela ekumi awe ntoko nlivo weera aavuluxe atthu antxipale.”
29 Ekhumaka oYeriko, muloko mutokotoko wa atthu, waamutthara.
30 Nto, alopwana eeli yahoona yaakilanthi muxerexere mwa musewe, yiiwakaru weera Yesu anvira nipuro nne, yaakhuwela yeeraka: “Apwiya, mwaana a Davidi, munimorele ikharari!”
31 Mene muloko wa atthu, waahaaximwela oweerelaka, mmaale. Mene awo, yaamweera ovirelela okhuwela vantxipale yeeraka: “Apwiya, mwaana a Davidi, munimorele ikharari!”
32 Vano, Yesu aaheemela anawiitthana aakohaka ha: “Muntthuna weera koopakeleni eheeni?”
33 Yaamwaakhula yeeraka: “Apwiya, nintthuna weera maitho ahu ehuleye.”
34 Yesu, aahaamorela ikharari ni aahaatava maitho aya, ni awo yaatthikela woona moowaakuveya ni emmutthara.
