Silempwale ni Matewus 4:1-25
4 Yesu aakuxiwa ni munepa wootteela aroihiwaka onikareni weera eereriwe ni Diabo.
2 Emalakaru mahiku 40 othana ni ohiyu ahitxiiye etthu, Yesu aavoliwa etala.
3 Vano, Diabo aamwaattamela ni onamweerela: “Waari weera nyuwo mwaana a Muluku, mulamule maluku ala weera ethatuwe ipaawu.”
4 Mene Yesu aamwaakhula: “Yoolempwa weera: ‘Mutthu khankhala ni ekumi mwaha wa epaawu* paahi, mene onnakhala mukumi mwaha wa masu enkhuma mmwaanoni mwa Yehova.’”*
5 Diabo aamukuxa Yesu amuroihaka esidade yootteela* ni aamwiiyaathi nipuro nootepaxa orakama na etemplu.
6 Ni aamweerela: “Waari weera nyuwo mwaana a Muluku, mwiivonyere vathi, woona weera yoolempwa: ‘Muluku onoorumiha malaika awe weera yookosoopeni’ ni ‘Awo enimookaphulani ni matataaya weera manaani anyu ehimane nluku.’”
7 Yesu omwaakhula enre: “Yoolempwa-tho: ‘Ohimweerere Yehova* Muluku aa.’”
8 Woottharelana, Diabo aamukuxera Yesu vamwaako woorakama ni aamoonihera imwene sootheene sa mulaponi ni ovuwa wa imwene iyo.
9 Ni aamweerela: “Kinimoovahani itthu sootheene iya mwakikokhorelaru onaamukhala vakhaaniini paahi.”
10 Nto Yesu, aamweerela: “Okhume va Satana! Woona weera yoolempwa: ‘Mmukokhoreleke Yehova* Muluku anyu, ni munvareleke muteko yooworu paahi.’”
11 Vano, Diabo aamuhiya Yesu ni yaahoowa malaika enamukhavihera.
12 Asuwelakaru weera Yohani aatthukiwa okateya, owo aavinya anarowa oGalileya.
13 Akhumakaru oNazareti, aarowa okhala oKafarnawu, muxerexere mwa ephareya ya mittetthe sa oZabuloni ni oNeftali.
14 Weera ekwanele masu a profeta Yesaya, yeera:
15 “Nyuwo atthu a elapo ya oZabuloni ni ya oNeftali, munkhala waattamela musewe onrowa ophareya, ekhopela ekina ya mooloko Yordani, oGalileya enkhala atthu a ilapo ikina!
16 Atthu yaakilanthi vapiphini yaahoona waara otokweene, ale yaari vamuuttuuxini wa okhwa, waahaakhumelela waara.”
17 Ovinyera etempu ene yeele, Yesu aapatxera olaleya eeraka: “Murukunuxe mirima sanyu, Omwene wa wiirimu wohaattamela.”
18 Eettaka muxerexere mwa ephareya ya oGalileya, owo aamoona Simoni oniitthaniwa-tho Pedru ni munnawe Andreya. Awosa yaavonyera ntthavi mphareya, woona weera yaari anamatotha a ihopa.
19 Ni owo aaweerela: “Mukitthare miyo, weera kookhaliheni anamatotha aatthu.”
20 Moowaakuveya, awosa yaahiya matthavi aya ni yaamutthara Yesu.
21 Eheettale seetthu, Yesu aawoona-tho atthu eeli yaawo yaari mutthu ni munnawe: Yakobe ni munnawe iitthaniwa Yohani yaawo yaari anamwane a Zebedeyo. Awosa yaari mpaarkuni erehererakasa matthavi aya vamoha ni apapaya, aZebedeyo. Nto Yesu aawiitthana.
22 Moowaakuveya, awosa yaamuhiya paarku vamoha ni apapaya, enamutthara Yesu.
23 Owo aaheetteetta muttetthe wootheene wa oGalileya, axuttihaka musinakooka, alaleyaka mitthenka sooreera sa Omwene ni alamihaka iretta sootheene sa atthu.
24 Itthu iye Yesu aapakaawe, saahiiwanyeya mpaka elapo yootheene ya wa aSiria. Tivanto, aawiiheriwaawe atthu yaavoreiwa iretta soovirikana, anamatxiini, alipa eetxiletxile, oorakala ni annaalamiha yaawo.
25 Tivawonto, muloko mutokotoko wa atthu waakhuma oGalileya, oDekapoli, oYerusalemu, oYudeya ni okhopela wa mooloko Yordani, wannamutthara.
