Silempwale ni Matewus 10:1-42
10 Nto Yesu, aawiitthana atthareli awe 12 ni aahaavaha owera woowoomola minepa soonanara ni olamiha iretta ni ikwerere sootheene.
2 Masina aarummwa 12, taala: Simoni iitthaniwa Pedru ni munnawe Andreya; Yakobe, mwaana a Zebedeyo ni munnawe Yohani;
3 Filipe ni Bartolomewu; Tome ni Matewus, namaliviha mpostu; Yakobe, mwaana Alfeyo; ni Tadeyo;
4 Simoni Mukanani;* ni Yuda Iskarioti, yoowo anvarinhe Yesu muhoolo mwaya.
5 Yesu aahaarumiha arummwa ala 12, aavahaka miruku iya: “Muhitthare misewe sa amalapo naari muhivolowe esidade ya asamariya.”
6 Menento, muroweke paahi waasa iputtiputthi sa empa ya ana a Israeli siriheñye.
7 Munrowaanyuwo, mwalaleyeke mitthenka iya: ‘Omwene wa wiirimu wohaattamela.’
8 Mwaalamihe aretta, mwaavinyererihe alipa ookhwa, mwaalamihe anamakokho, mwawoomoleke mademooniyu. Nyuwo mwaakhenle ya mahala nvaheke-tho ya mahala.
9 Muhihele mmurupani* mwanyu onheliwa musurukhu, ewooru, epratha naari ekhoopiri.
10 Muhikuxe murupa wa eyootxa ya mukwaha naari soowara ikina naari mano isantaaliya, nnakhala muttootto, woona weera ole onvara muteko onnaphwanela ovahiwa yootxa.
11 “Esidade naari muttetthe ori wootheene munkelaanyu ovolowa, nwaaseke atthu* entthuna wiiwa mitthenka, ni mukhale vaate vaya vawo mpaka nihiku munkelaanyu ovinya.
12 Mwaphiya vale vaate, mpatxereke owuulumiha atthu a veemusini vawo.
13 Wakhala weera asineene vaate ennatthuna wiiwa mitthenka, murettele mukunxaanyu okhale naawo. Mene wakhala weera khentthuna wiiwa, murettele owo wootthikeleni.
14 Wakhala weera mutthu khanwaakhelani naari khantthuna wiiwa mitthenka mukunxaanyu, mwaakhumaka vale vaate vawo naari esidade eyo, mutatheke ntthupi mmanaanini mwanyu.
15 Miyo kinnooleelani ekhaikhai weera: Itthu sinkela weereya esidade ela nihiku noothoriha sinkela okhala sootepa oxupa opwaha itthu sinkela weereya oSodoma ni oGomora.
16 “Nkoonani! Kinnoorumihani ntoko iputtiputthi variyari va miitxi. Tivawonto, mukhale ootxentxera ntoko inowa, mene oomaala ntoko epompa.*
17 Mwiikosoope ni atthu, enimooroihani otripunaale ni woowaxulani musinakookani mwaya.
18 Ni munooroihiwa ohoolo wa makovernatore ni mamwene mwaha wa miyo. Weera mukhale anamoona aka wa yaawo ni wa amalapo.
19 Nto, mwaroihiwa vale otripunaale, muhixupeye ni etthu munkelaanyu ohima naari moota woohima, mwaha wooweera ewoora ene yeeyo, munooleeliwa etthu munkelaanyu ohima.
20 Mwaha wooweera, khaiyene tinyeenyuru paahi munuuluma, mene munepa wootteela wa Atiithi anyu tonkela wuuluma woovarelakani muteko nyuwo.
21 Opwaha mwa yeeyo, munna ananveleele munnawe weera iiviwe, paapa ananvaherere mwanawe, ni anamwane enoopakavo etthu weera asitiithi aya yiiviwe.
22 Mene nyuwosa muneereke wiittiwa ni atthu ootheene mwaha wa nsina naka. Mene ole aneera avilele mpaka okhwipi, onoovuluxiwa.
23 Mwaatthara-tthariwaka esidade emoha, mutthaweleke esidade ekina; kinnooleelani ekhaikhai weera: Khamummaliha weetta mittetthe sootheene sa wIsraeli, Mwaana a Mutthu ahinaaye owa.
24 “Naskola khanaapwaha aprusoore awe ni kaporo khanaapwaha apwiya awe.
25 Naskola onkela okosoopiwa ntoko prusoore awe. Ni kaporo onkela okosoopiwa ntoko pwiya awe. Wakhala weera atthu ennamwiitthana mwaneene vaate okhala Belzebu,* neereke atthu a vaate vawo khenkela wiitthaniwa hiiho?
26 Tivawonto, muhiwoove atthu awo, mwaha wooweera khiyaavo etthu ekhuneelinwe eneera ehikhunuliwe, ni khiyaavo esiiri eneera ehisuweliwe.
27 Ele kinooleelaakani weephiini, mwaaleeleke vanlakani ni sootheene munaapeliwaanyu, mulaleyeke mureene vasulu vampa.
28 Muhiwoove ale ekhanle oowiivani, mene khenwera wookhoottiherani okhala ni ekumi* muhoolo, menento mmooveke ole orino owera woowoonyaanyani oGehena.
29 Ephera khentumihiwa ni musurukhu vakhaaniini?* Mene naari emoha ya yeele khemmorela vathi Atiithi anyu ehisuwenle.
30 Menento mpaka maihi ootheene a mmuruni mwanyu, aakontariwa.
31 Tivanto, muhooveke, nyuwo tootthuneyaxa opwaha iphera sintxipale.
32 “Mutthu ootheene onkela ohima vaatthuni weera ookisuwela, miyo-tho kinoohima wa Atiithi aka weera koomusuwela.
33 Mene ole onrowa okikhootta vaatthuni, ni miyo-tho, kinoomukhootta ohoolo wa Atiithi aka eri wiirimu.
34 Muhuupuwele weera kaawiihale murettele elapo ela ya vathi, hooye. Mene miyo kiwiihale ohiiwanana ohiya murettele.
35 Mene kiwiihale ohiiwanana: mwaana mwaamulopwana ni apapawe, mwaana mwaamuthiyana ni ameyawe, muthiyana ootheliwa ni apwiya mwaana awe.
36 Mweekhaikhai, amwiittani awe mutthu, enrowa okhala amusi awe.
37 Ole onaasivela atiithi awe ni ameyawe okipwaha miyo, khamphwanela okhala mutthareli aka, nave-tho ole ommusivela mwanawe mwaamulopwana naari mwaamuthiyana okipwaha miyo, khamphwanela okhala mutthareli aka.
38 Ole ohinaakhulela okuxa mwiri wa nihaaxero* ni ohinaakhulela okitthara, khaphwanenle okhala mutthareli aka.
39 Mene ole oneerera ovuluxa ekumi awe onooyeleela, mene ole oneera ayeleele ekumi awe mwaha wa miyo, onoophwanya ekumi awe.
40 “Ale enwaakhelani ennakaakhela-tho miyo, ni ale enkaakhela miyo, ennawaakhela ale ekirumme.
41 Ole ommwaakhela profeta mwaha wookhala profeta, onimwaakhela ntthuvelo na profeta, ni ole ommwaakhela mulopwana oororomeleya mwaha wookhala oororomeleya, onimwaakhela ntthuvelo na mutthu oororomeleya.
42 Ole onanvahe maahi oowura ooriira mmoha aasikhaani ala, kinnooleelani ekhaikhahi weera: Mutthu owo khanrowa oyeleela nlivo nawe.”
Footnotes
^ Naari: “Nanthiti.”
^ Naari: “mmusakoni.”
^ Atthu enhimmwa va, ti yaale yeera ewaakheleke nnene atthareli ale yaarummwale ni Yesu.
^ Naari: “ekhuntta.”
^ Nna nsina nikina na Satana.
^ Nwehe masu oowiiwanyeihiwa.
^ Nwehe masu oowiiwanyeihiwa.
