Silempwale ni Matewus 14:1-36
14 Etempu ene yeele, Herodi aahiiwa suulummwaka woohima sa miteko Yesu aapankaawe
2 vano aaweerela anamuteko awe: “Ola, Yohani Mpatisa. Oroovinyererihiwa mookhwaani, tivanto onweraawe ovara miteko iya sootikhiniha.”
3 Herodi* ene tiyoola aamutthukinhe Yohani anamuroiha okateya, mwaha wa Herodiya mwaarawe Filipe munnawe Herodi;
4 mwaha wooweera, Yohani annamweerela weera: “Khamunaakhuleliwa omuthela Herodiya.”
5 Nnaamweera Herodi aatthuna omwiiva Yohani, owo annawoova atthu, mwaha wooweera atthu awo yaamoona Yohani ntoko profeta.
6 Mene nihiku na aniversaariyu* a Herodi, mwaana mwaamuthiyana a Herodiya, aahiina ohoolo wa atthu yaawompwale ni aamusiveliha vantxipale Herodi,
7 mpaka ommana natiri weera aamunvaha itthu sootheene eeraawe avekele.
8 Aseseriwaka ni ameyawe, owo aamweerela ha mwene: “Mukivahe va, muru wa Yohani Mpatisa mparathoni.”
9 Mwene nnaamweera aariipinwe murima, owo aalamula weera innyereriwe muru. Aapanke eyo mwaha wa natiri ammannaawe ohoolo wa atthu ootheene yaawompwale.*
10 Nto aaruma weera ahitiwe Yohani mukateya.
11 Muru ole waakuxiwa mparathoni ni aahinnyereriwa mwali ole ni owo aaroiha wa ameyawe.
12 Atthareli a Yohani yaahoowa enakuxa murutthu awe enarowa ovitha mmahiye, avinyaka yaarowa omuleela Yesu.
13 Yesu iiwakaru eyo, anwela paarku anakhuma nipuro nne, anarowa nipuro noohikhala atthu weera akhale meekhaawe. Nto muloko wa atthu osuwelakaru eyo, waamutthara weettaka vathi okhumaka osidade.
14 Akhuruwakaru mpaarkuni, Yesu aawoona atthu antxipale; ni aahaamorela ikharari ni aahaalamiha atthu yaavoreiwa.
15 Mene, emaara waaxekuwaaya atthareli awe yaamwaattamela enamweerela: “Nipuro nna noorakamelana ni mittetthe simakinwe, ni va, wooxekuwa. Vanonto mwaamware atthu ala weera eroweke mmawaani yathume yootxa.”
16 Mene Yesu owaakhula enre: “Alasa khentthuneya orowa mmawaani, mwaavahe nyeenyu yootxa weera etxe.”
17 Omwaakhula yenre: “Hiyo khanaanono yootxa va, sihikhanle ipaawu sinku ni ihopa iya piili.”
18 Yesu aaweerela: “Nwiihe va.”
19 Ni aaruma weera muloko ole wa atthu okilaathi vamalaxini. Nto aakuxa ipaawu sinku ni ihopa iye piili, aaweha wiirimu anavekela. Ni akawanyakaru ipaawu, aahaavaha atthareli awe, atthareli awe yaahaavaha atthu.
20 Vano, atthu ootheene yaahootxa mpaka ovona. Ni yaattottela ipaawu saahanle mpaka osara mittanka 12.
21 Atthu yaatxiiye, yaaphiyera 5.000 alopwanaru paahi, nihaakontariki athiyana ni anamwane.
22 Nto, moohipisa, Yesu aahaaruma atthareli awe okela mpaarkuni weera ehooleke ekelaka ekhopela ekina ya ephareya, owo aahala aamwaraka atthu.
23 Aamwarakaru atthu, Yesu aawela omwaako meekhaawe weera avekele. Waamwiilaru ninlelo owo eera areene wuuwu meekhaawe.
24 Paarku aarakamela* vantxipale omokoni, annamaniwa ni mutekuteku mutokotoko wa maahi mwaha wooweera aakela yaakhumaayawo epheyo.
25 Oyaaka nooxa,* Yesu aarowa okumana naawo eettaka vasulu va maahi a ephareya.
26 Atthareli emoonakaru Yesu eettaka vasulu va maahi a ephareya, yaahoova vantxipale ni yaaheera: “Malavi aala! Ni yaakhuwela vantxipale ni woova.”
27 Moowaakuveya Yesu aaweerela: “Mulipe murima, ti miyo muhoove.”
28 Pedru aaheera: “Apwiya, mwaareene ti nyuwo, mukilamule weera kiwe okumana ni nyuwo keettaka vasulu va maahi.”
29 Yesu aamweerela: “Nweeke!” Pedru aakhuma mpaarkuni aneetta vasulu va maahi arooka wa Yesu.
30 Onnaawe epheyo weera yaari yoowuupa, aahoova. Nave apatxerakaru oneela aakhuwela: “Apwiya, mukivuluxe!”
31 Moowaakuveya, Yesu aahookola ntata ananvarela Pedru ni aamweerela: “Nyuwo* a nroromelo vakhaaniini, mwaha wa heeni onhovelaawe?”
32 Avolowakaru mpaarkuni, epheyo yaamaala.
33 Nto ale yaari mpaarkuni yaamukokhorela* yeeraka: “Mweekhaikhai nyuwo Mwaana a Muluku.”
34 Emalihakaru olapuwa ephareya, yaakhuruwa oJenesareti.
35 Atthu a nipuro nne emusuwelakaru, yaaruma olaleya muttetthe wootheene. Ni muloko wa atthu yaamuroihela atthu ootheene yaavoreiwa.
36 Ni yannamutxonttelela weera awaakhulele otava mukhwipi mwa maleya awe. Ni atthu ootheene ale yaatava maleya awe, yannalama.
Footnotes
^ Eyo tiiyo, Herodi Antipa. Nwehe masu oowiiwanyeihiwa.
^ Eyo tiiyo, nihiku Herodi aakwanihaawe iyaakha.
^ Naari: “yaatxa ni yoowo.”
^ Ni Ekereku: “istaatiyu sintxipale.” Estaatiyu emoha yaakhala imeetru 185.
^ Naari: “Okhuma ewoora ya 3 mpaka okhuma wa nsuwa ewoora ya 6.”
^ Naari: “Mulopwana.”
^ Naari: “yaamuttittimiha.”
