Silempwale ni Matewus 13:1-58

  • MAPHWANAPHWANIHO A OMWENE (1-52)

    • Namalima (1-9)

    • Etthu yaamweeriha Yesu ovarela muteko maphwanaphwaniho (10-17)

    • Otaphuleliwa wa niphwanaphwaniho na namalima (18-23)

    • Tiriku ni ntakataka (24-30)

    • Enuku ya emostarta ni efaramenta (31-33)

    • Ovarela wawe muteko maphwanaphwaniho enkwanihera eprofesiya (34, 35)

    • Otaphuleliwa wa niphwanaphwaniho na tiriku ni ntakataka (36-43)

    • Muhakhu woovithiwa ni nluku nootthuneyaxa (44-46)

    • Ntthavi nooruula ihopa (47-50)

    • Itthu sooreera inyowani ni sakhalayi (51, 52)

  • Yesu onnakhoottiwa esidade awe (53-58)

13  Nihiku nene nenne, Yesu aakhuma vaate ni anakilaathi muxerexere mwa ephareya. 2  Muloko mutokotoko wa atthu waamurukurenre waahaatta vantxipale, nto mwaha wa yeeyo, owo aavolowa mpaarkuni anakilaathi ni atthu ootheene yaahala muxerexere mwa ephareya. 3  Nto, aahaaleela itthu sintxipale moorweela mwa maphwanaphwaniho eeraka: “Mwiiwe: Namalima mmoha aavinya anarowa omisa iso sawe. 4  Nto amisaka hiihaale, iso ikina saamorela muxerexere mwa musewe nto apalame yaawa enatxa. 5  Nto iso ikina, saamorenle vamalukuni yahaakhanlaayavo etthaya yintxipale, saamela moowaakuveya mwaha wooweera etthaya yaari vale khayantte. 6  Mene nsuwa noopakaru, saanyaala ni saahoosa mwaha wooweera khasaakhanleno mikakaari. 7  Iso ikina, saamorenle vamiiwani, mene miiwa saahunnuwa sinavuvura iso iye. 8  Iso ikina, saamorela etthaya ya etxaatxira ni saapatxera wiimiha soowiima, ekina yiiminhe soowiima 100 opwaha ele yaalinwe, ekina soowiima 60 opwaha ele yaalinwe, ekina soowiima 30 opwaha ele yaalinwe. 9  Ale eri ni maaru oowiiwa, yiiweke.” 10  Atthareli awe, yaamwaattamela enamukoha: “Mwaha wa heeni munuulumaanyu naawo nvarelaka muteko maphwanaphwaniho?” 11  Owaakhula enre: “Nyuwo munnaakhuleliwa osuwela isiiri sa Omwene wa wiirimu, mene awo hooye. 12  Tivanto, yoole okhanleno onoovahiwa-tho ni owo onookhalano sintxipale, ni ole ohikhanleno mpaka yeeyo oraaweno onimwaakhiwa. 13  Tivawonto kinuulumaaka moorweela mwa maphwanaphwaniho, mwaha wooweera ennoona mene enoona vasiiyoni, enniiwa mene eniiwa vasiiyoni vene nnakhala kheniiwexexa. 14  Nto wa yaawo ennakwanela eprofesiya ya Yesaya yeeyo eneera: ‘Nyuwo muneereke wiiwa mene khamunkela osuwela etthu entaphulelaaya, muneereke woona, mene khamunkela osuwela etthu entaphulelaya ele munoonaanyu. 15  Mirima sa atthu ala ti soowuuma, awo aattiyela maaru aya ni aaputiha maitho aya weera ehooneke ni maitho aya naari ehiiweke ni maaru aya,* weera ehittharuwe erukunuxaka murima aya weera kaavuluxe.’ 16  “Oohakalala ti nyuwo mwaha wooweera maitho anyu ennoona ni maaru anyu enniiwa. 17  Nto kinnooleelani ekhaikhai weera: Maprofeta mantxipale ni atthu axariya, yaatthunexexa vantxipale woona itthu iya nyuwo munoonaanyu, mene khayonne, ni weera yiiwe itthu iya nyuwo muniiwaanyu, mene khayiiwale. 18  “Vanonto mwiiwe etthu entaphulelaaya niphwanaphwaniho na mulopwana ole aala iso sawe. 19  Mutthu oniiwa mitthenka sa Omwene, mene ohiniiwexexa onnawa Mutakhali onnamwaakha ele yaalinwe vamurimani vawe, ela eri eso yaalinwe muxerexere mwa musewe. 20  Mmiso ole waamorenle vamalukuni, onaathoonyera atthu ale eneera yiiwa masu a Muluku, moowaakuveya enaakhulela moohakalala. 21  Mwa yeeyo, nnaamweera ohikhanleno mikakaari, onnavirelela okhala mwa etempu vakhaaniini, mene yakhumelela maxupo naari ottharatthariwa mwaha wa masu a Muluku, onnamora.* 22  Eso yaamorenle va miiwani enaathoonyera atthu ale eniiwa masu a Muluku, mene mwaha wootthunaxa itthu sa elapo ela* ni woototha wa mihakhu ennavuvura masu awo yiiwalaaya nto kheniimiha soowiima. 23  Eso yaamorenle vatthayani ya etxaatxira emmuthoonyera mutthu ole oniiwa masu a Muluku onasuwela etthu entaphulelaaya, nto onniimiha soowiima 100 opwaha ele yaalinwe, mukina 60 mukina 30.” 24  Yesu aahaaleela atthu niphwanaphwaniho nikina eeraka: “Omwene wa wiirimu pooti olikanxeriwa ni mulopwana anle mmiso wooreera mmatta mwawe. 25  Vano atthu ekonaka aahoowa mwiittani anamisamo ntakataka mutirikuni ni anapwaha. 26  Emaara tiriku aathapuruwaawe naakhumelela-tho ntakataka, 27  nto, akaporo amwaneene ematta ennawa enamukoha: ‘Pwiya, nyuwo khamwanle mmiso wooreera mmatta mwanyu? Vanonto ntakataka ninkhuma woowiini?’ 28  Owaakhula enre: ‘Mwiittani aka opanke eyo’. Akaporo yaamukoha yeeraka: ‘Vano napheleke ntakataka nne?’ 29  Owaakhula enre: ‘Hooye, muhirowe, mwaha wooweera mwaarowaka ophela ntakataka, munomphela tiriku vamoha.’ 30  Muhiyeke sunnuweke vamoha mpaka ophiya etempu yoohepha, yaphiya vale etempu eyo, miyo kinooweerela alipa oohepha weera ephele toko ntakataka etthuke mavisi weera yahise, avinyaka nto, emuhepheke tiriku yamuheleke vantathani vaka.’” 31  Yesu aahaaleela niphwanaphwaniho nikina eeraka: “Omwene wa wiirimu onoolikana ni enuku ekhaanini ya emostarta mulopwana okunxaawe onaala mmatta mwawe. 32  Enuku eyo, erookhalaru ekhaanini opwaha inuku sootheene, mene yunnuwa vale, ennakhala mwiri mutokotoko, nto apalame a wiirimu ennawa enapaka ipuru saya mutamphini mwaya.” 33  Aahaaleela niphwanaphwaniho nikina eeraka: “Omwene wa wiirimu onoolikana ni efaramenta muthiyana okunxaawe anatakansera ni miphimo miraru sa ephepa, vano ephepa eyo yaanyaruwa yootheene.” 34  Yesu aahima itthu sootheene avarihelaka muteko maphwanaphwaniho. Mweekhaikhai, khayaavo etthu aahimaawe woohikhala niphwanaphwaniho, 35  weera ekwanele masu aprofeta yaawo yeera: “Kinkela wuulumaka kivarelaka muteko maphwanaphwaniho, kinaahime itthu saavithinwe okhumela ephattuwelo.”* 36  Aamwarakaru atthu, aavolowa mpaani, atthareli awe yaamwaattamela enamweerela ha: “Munitaphulele niphwanaphwaniho na ntakataka na mmatta.” 37  Yesu owaakhula enre: “Mulopwana onaala iso sooreera Mwaana a Mutthu, 38  ematta elapo, mmiso wooreera anamwane a Omwene, ntakataka anamwane a mutakhali, 39  ni mwiittani aaliye ntakataka, Diabo, etempu yoohepha, etempu enaattamelaaya emalihero ya itthu soonanara sa elapo ela* ni alipa oohepha, malaika. 40  Tivawonto, ntoko hiihaale ntakataka nintthukiwaaya nivisi weera nihisiwe vamooroni, enrowa weereya etthu emoha-moharu omamalihero wa itthu soonanara sa elapo ela.* 41  Mwaana a Mutthu onooruma malaika awe weera aakumihe Moomweneni mwawe ootheene ale anaakwattuliha akhwaaya ni ale empaka itthu soonanara. 42  Ni enimwaavonyera vamooroni, ni ti weiwo enrowaaya winla ni okhuuriha maino aya. 43  Etempu ene yeeyo, anaxariya enimwaara ntoko nsuwa Moomweneni mwa Atiithi aya. Ale eri ni maaru oowiiwa, yiiweke. 44  “Omwene wa wiirimu onoolikana ni muhakhu ovithinwe mmatta, mulopwana mmoha ophwannyaawe onavitha veeli, nto mwaha woohakalala, aarowa otumiha itthu sootheene aaraaweno anarowa othuma ematta ele. 45  “Nave-tho, Omwene wa wiirimu onnalikana ni nanakoso ooweetteetta onaasaasa maluku ooreeraxa.* 46  Aphwanyakaru nluku nno nootthuneyaxa, aatumiha itthu sawe sootheene anarowa othuma nluku nno. 47  “Nave-tho, Omwene wa Muluku, onoolikana ni ntthavi* nivonyerinwe mphareya nirunle ihopa sa moota-moota. 48  Vano saasareñyaaya ihopa, saapuruleliwa muxerexere mwa ephareya enakilaathi enapatxera othanla ihopa sooreerela ehelaka mmuttankani ni soohireera enariha. 49  Ti hiiha enkelaaya weereya emalihero ya itthu soonanara sa elapo ela* yaattamelaka omala. Malaika enimwaamwalamwaxa atthu oonanara murima ni anaxariya, 50  ni enimwaavonyera vamooroni atthu oonanara murima, ni ti weiwo enrowaaya winla ni okhuuriha maino aya. 51  “Moosuwela itthu sintaphulelaaya itthu iya?” Waakhula yenre: “Aani.” 52  Nto Yesu aahaaleela awo: “Ole ori muhusiha ni ohusihinwe nnene woohima sa Omwene wa wiirimu, onoolikana ni mwaneene vaate onkumiha mmuhakhuni mwawe itthu sooreera inyowani ni sa khalayi.” 53  Yesu amalihakaru ohima maphwanaphwaniho ala, aapwaha. 54  Aphiyakaru esidade awe,* Yesu aapatxera waaxuttiha atthu musinakookani mwaya, mene yaatikhiniheya enahima ha: “Mulopwana ola ophwannye woowiini osuwela nno ni owera opaka miteko iya sootikhiniha? 55  Ola khaiyene mwaana a kalipinteiru? Ni ameyawe kheniitthaniwa Maria, munnawe Yakobe, Yosefe, Simoni ni Yuda? 56  Ni asirokorawe ootheene, khaiyene ti yaala eri ni hiyo? Vanonto, ola aaphwanya woowiini itthu sootheene iya?” 57  Tivanto, awo khiyaamuroromenle.* Mene Yesu aahaaleela ha: “Khaavo profeta onttittimihiwa muttetthe awe naari owannyawe.” 58  Nto mwaha woohikhalano waya nroromelo, Yesu khaapanke miteko sintxipale sootikhiniha muttetthe ole.

Footnotes

^ Yanniiwa ni maaru aya mene khayaavarela muteko ele yiiwaaya.
^ Naari: “onnakwattuliwa.”
^ Apaale: “ephattuwelo ya elapo.”
^ Naari: “epeerola yooreeraxa.”
^ Naari: “ntxera.”
^ Naari: “muttetthe awe.”
^ Naari: “yaakwattuwa mwaha wa yoowo.”

Copyrights for this publication