Silempwale ni Matewus 21:1-46
-
Yesu onnavolowa ntoko Mwene oYerusalemu (1-11)
-
Yesu onnatteeliha etemplu (12-17)
-
Mwiri wa efiiku onnuulumeliwa (18-22)
-
Yesu onnakohiwa woohima sa ikuru simmukhavihera (23-27)
-
Niphwanaphwaniho na anamwane eeli (28-32)
-
Niphwanaphwaniho na anamalima anamwiiva (33-46)
-
Nluku nookhoottiwa ni anamateka (42)
-
21 Emaara yaattamelaaya ophiya oYerusalemu, yaaphiya muttetthe wa oBetefage, vamwaako sa Oliveira. Nto Yesu aahaaruma atthareli awe eeli,
2 ni aaweerela: “Murowe muttetthe ole onooneya, ni munomphwanya puuru mwaamuthiyana atthukinweene areene ni mwaaxaana awe. Mwaataphule ni mukiwiihere.
3 Wakhala weera mutthu onimookohani etthu, mmweerele weera: ‘Apwiya enimwaahaawelasa.’ Ni mutthu owo onimoohiyani weera mwaawiihe.”
4 Eyo yeereñye weera ekwanele masu aprofeta yaawo eneera:
5 Mmuleele mwaana mwaamuthiyana a oSiyoni: ‘Moone! Mwene anyu onnawa, owo toowiiyeviha, ni onwa anwenleene puuru, aani, mwaaxaana a puuru.’”
6 Atthareli ale yaarowa ni yaapaka moovarihana ni moota Yesu aarummaawe.
7 Awosa yanwiiha puuru ole vamoha ni mwaaxaana awe, yaahaatala ikuwo saya vasulu va puuru ole ni Yesu anwela puuru mwaaxaana.
8 Ni atthu antxipale yaahaatala ikuwo saya mmuseweni ni akina yannathikila makukhu a miri enaatala mmuseweni.
9 Atthu yaari ohoolo wawe ni ale yaamutthara, yannakhuwela yeeraka: “Txontte Muluku, ninnoovekelani, munvuluxe Mwaana a Davidi! Ooreeriwa ti yoole onwa mwa nsina na Yehova!* Txontte Muluku, ninnoovekelani munvuluxe, nyuwo munkhala wiirimu!”
10 Yesu aphiyakaru oYerusalemu, atthu a esidade yootheene yaanyakuleleya ni yanneera: “Mutthu ola, taani?”
11 Atthu yannaakhula yeeraka: “Ola Yesu, profeta oNazareti, wa oGalileya!”
12 Yesu avolowakaru mutemplu, aawoomola atthu ootheene yaatumiha ni yaathuma itthu mutemplu ni aakunttula imeesa sa atthu yaatxentxiha musurukhu ni ikatera sa atthu yaatumiha ipompa.*
13 Ni aaweerela: “Yoolempwa weera: ‘Empa aka enrowa osuweliwa okhala empa ya mavekelo,’ mene nyuwo mumpaka nipuro naanamwiiya.”
14 Nave-tho areene mutemplu mmwe, atthu oohoona ni oorakala yaamwaattamela, onaalamiha.
15 Asitokweene aanamakeya ni alipa oolepa, yoonakaru itthu sootikhiniha Yesu aapankaawe ni moota anamwane yaakhuwelaaya mutemplu yeeraka: “Txontte Muluku, ninnoovekelani, munvuluxe Mwaana a Davidi!”, awo yaanyoonyiwa.
16 Ni yaamweerela: “Munniiwa etthu anamwane enhimaaya?” Yesu owaakhula enre: “Aani, kinniiwa. Khamutonko osoma masu eneera: ‘Mmwaano mwa anamwane ni anamwane enaamwa, ookumiha masu oottottopela?”
17 Ni, aahiyaka ottuli, aakhuma esidade ele anarowa oviriha ohiyu oBetania.
18 Oxeexelo emaara aatthikaawe osidade iwe, aavoliwa etala.
19 Owo aahoona mwiri wa efiiku oreene muxerexere mwa musewe, aarowa woona waari weera sookhalamo soowiima, nto khaaphwannye etthu, mene aaphwannye paahi makukhu ni aaheera: “Ohiimihe-tho veeli soowiima.” Ni mwiri wa efiiku ole waahuuma moowaakuveya.
20 Atthareli yoonakaru eyo, waawuuma owanoni ni yaaheera: “Moota heeni mwiri ola wa ifiiku wuumalaaya moowaakuveya?”
21 Yesu owaakhula enre: “Miyo kinnooleelani ekhaikhai weera: ‘Wakhala weera munookhalano nroromelo ni muhinahovela, khaiyene paahi munkela owera opaka etthu ela kipakenlaaka mwiri ola wa efiiku mene mpaka nyuwo munimweerela mwaako ola opheleye va ni wiivonyere mphareya’, nto eyo, enimweereya.
22 Ni itthu sootheene munkelaanyu ovekela mureeneno nroromelo, munimwaakhela.”
23 Avolowakaru mutemplu, emaara aaxuttiha awe, yaamwaattamela asitokweene aanamakeya ni asitokweene aayuda enamukoha: “Ni ikuru heeni munweraanyu opaka itthu iya? Ni taani oovanheni ikuru sene seiya?”
24 Yesu aawaakhula eeraka: “Miyo-tho kinimookohani etthu emoha. Mwakaakhula vale, kinimooleelani ikuru heeni sinkikhavihera owera opaka itthu iya:
25 Opatiso wa Yohani, waakhuma woowi? Wa Muluku,* naari wa atthu?” Awosa yaapatxera wuuluma yaaworu yeeraka: “Waakhula neera: ‘Waakhuma wa Muluku, owo onrowa oneerela ha: ‘Mwaha wa heeni nto, muhimwaakhulenlaanyu?’
26 Mene, neera vale: ‘Waakhuma wa atthu,’ niwooveke atthu ala, mwaha wooweera atthu yaamoona Yohani ntoko profeta.”
27 Nto mwaha wa yeeyo, omwaakhula Yesu yenre: “Khanisuwenle.” Yesu aaweerela: “Miyo-tho nkinooleelani ikuru heeni sinkikhavihera owera ovara itthu iya.”
28 “Munoonela hayi? Mulopwana mmoha aakhalano anamwane eeli, amwaattamelaka oopatxera aamweerela: ‘Mwanaka, olelo murowe mwavare muteko ematta ya ewuuva.’
29 Owo omwaakhula enre: ‘Nkinrowa.’ Mene muhoolo mwaya, aattharuwa anarowa.
30 Aamwaattamela mwaana anaaveeli ni anamweerela etthu emoha-moharu, waakhula enre: ‘Aani, kinoorowa.’ Mene khaaronwe.
31 Wa anamwane ala eeli, taani opanke yootthuna ya atiithi awe? Awosa yaahaakhula: “Oopatxera.” Yesu aaweerela: “Kinnoororomelihani weera alipa ooliviha mpostu ni anamararuwa, enrowa okhala oopatxera ovolowa Moomweneni wa Muluku, nyuwo muhinaaye.
32 Mwaha wooweera, Yohani aahoowa owooniherani ephiro ya exariya menento nyuwo khamwaamuroromenle. Nto alipa ooliviha mpostu ni anamararuwa, yaamuroromela. Nnaamweera monne itthu sootheene iya, nyuwo khamwaattharunwe mpaka ophiyera omuroromela.
33 Mwiiwe niphwanaphwaniho nikina: Aakhala mulopwana mmoha aarino ematta ya iwuuva, aapaka mukuso arukureerihaka ematta awe ni aathipa nlitti noowattela iwuuva nave aateka empa* yoorakamela musulu, nto muhoolo mwaya, aahaahiyera anamalima ematta ele, ni anarowa elapo ekina.
34 Vano, iwuuva siitthwalaaya, mwaneene ematta, aahaarumiha akaporo awe wa anamalima weera yakuxe soowiima sawe.
35 Anamalima ale, yaahaavara akaporo ale yaarummwale, mmoha yaamwiiva, mukina yammana ni mukina yanvonya maluku.
36 Ni aahaarumiha akaporo akina antxipale waapwaha oopatxera mene yaahaapakela etthu emoha-moharu.
37 Okhwipi waya, aahaarumihelasa mwanawe, eeraka: ‘Enoomuttittimiha mwanaka.’
38 Anamalima ale emoonakaru mwaana, yaahuuluma yaaworu yeeraka: ‘Ola tonrowa ohiyeriwa ematta ela. Nkawani, nrowe nimwiive weera nihaleno yoohiyeriwaawe!’
39 Nto awosa, yanvara enamukumihera vaate va ematta ele ya iwuuva ni enamwiiva.
40 Vanonto, mwaneene ematta awa, onkela waapakela eheeni anamalima ale?”
41 Ni awosa, yaamwaakhula yeeraka: “Mwaha woonanara waya murima, owo onkela waanyaanya moomalela ni onkela owinnyerera ematta ele anamalima akina, yaawo eneera emwinnyerereke soowiima sawe etempu yoophwanelela.”
42 Yesu aaweerela: “Nyuwosa khamunasome mwa Soolepa masu eneera: ‘Nluku anamateka yaakhonttaaya, naakhalihiwa nluku noolipiha empa, nluku nno ninkhuma wa Yehova,* ni ti yootikhiniha vamaithoni vahu’
43 tivawonto kinooleelaakani weera munimwaakhiwa Omwene wa Muluku, weera evahiwe amalapo yaawo eneera yiimiheke soowiima sa Omwene owo.
44 Nave-tho ole onkela omorela nluku nno onimwinteya. Ni ole ninkela ommorela nluku nno, onoonyaanyeya.”
45 Asitokweene aanamakeya ni afarisi yiiwakaru maphwanaphwaniho ale, yaasuwela weera aahima yaawo.
46 Nnaamweera yaatthuna onvara, awosa yannoova muloko mutokotoko wa atthu, mwaha wooweera muloko wa atthu waamoona Yesu ntoko profeta.
