Silempwale ni Matewus 7:1-29
7 “Muhiye waathoriha atthu akina weera muhithorihiwe.
2 Mweekhaikhai, moota munaathorihaanyuno atthu akina, munrowa othorihiwa moota ene mmoharu; ni murinko munvarelaanyu muteko weera mwaarinkeleno atthu akina, onkela ovareliwa muteko yooweene-tho weera murinkeliweno nyuwo-tho.
3 Mwaha wa heeni munwehaanyu ekokhola eri mmaithoni mwa munninyu, mene muhinwera oweha weera mookhalano ekhukulu mmaithoni mwanyu?
4 Naari, munwera hayi omweerela munninyu: ‘Hootti kookumiheni ekokhola mmaithoni mwanyu’, nyuwo mwaneenaanyu mureeneno ekhukulu mmaithoni mwanyu?
5 Namootha! Mpatxere toko okumiha ekhukulwaanyu eyo mmaithoni mwanyu mmo, avinyaka munoowera woona moota wookumiha ekokhola mmaithoni mwa munnanyu.
6 “Muhaavahe alapwa itthu sootteela,* naari muhivonyere ikuluwe itthu sanyu sootthuneya weera iyo sihinyikale naari alapwa ehirukunuwe ni yoolumeeni.
7 “Mulipihereke oveka, muni nvahiwe; ni mulipihereke waasa, muni mphwanye; ni mulipihereke omana nsele, muni muhuleliwe;
8 woona weera ootheene ale envekela, ennavahiwa; ni ootheene ale enaasa ennaphwanya; ni ootheene ale emmana nsele, ennahuleliwa.
9 Taani a nyuwo oneera mwanawe anvekelaka epaawu ananvaha nluku?
10 Naari taani a nyuwo oneera mwanawe anvekelaka ehopa, ananvaha enowa?
11 Vanonto, waari weera nyuwo atthu oowuumeene murima munnawera waavaha anamwane anyu itthu sooreera yavekela vale, nankha Atiithi anyu eri wiirimu, khayaavaha itthu sooreera ale enaavekela?
12 “Tivanto, itthu sootheene sinoosivelani opakeliwa naatthu akina, nyuwo-tho mwaapakeleke awo. Tiyeeyo Malamulo ni Maprofeta enhimaaya.
13 “Nvolowe mulako woophureya, mwaha wooweera mutokweene mulako woowunnuwa, mene, musewe onroiha wookhwaani, nto owo mulako envolowaaya atthu antxipale.
14 Nto mulako ni musewe onroiha weekumini, ti woophureya, nto atthu vakhaaniini temphwanya mulako ni musewe owo.
15 “Mwiikosoope ni maprofeta oowootha yaawo enwaattamelani nyuwo yiisooneihaka ntoko iputtiputthi, mene mmurimani mwaya miitxi sooluwa.
16 Munimwaasuwela awo mwaha wa soowiima saya.* Neereke onnawereya orukula iwuuva vamwirini va miiwa, naari orukula ifiiku vamalaxini?
17 Vamoha-moharu, mwiri wootheene wooreera, oniimiha soowiima sooreera, ni mwiri wootheene woonanara, oniimiha soowiima soonanara.
18 Mwiri wooreera khoniimiha soowiima soonanara naari mwiri woonanara khoniimiha soowiima sooreera.
19 Mwiri wootheene ohiniimiha soowiima sooreera onnathikiliwa onavonyeriwa vamooroni.
20 Tivanto, moorweela mwa soowiima saya, nyuwo munimwaasuwela atthu awo.
21 “Khaiyene ootheene ale eneera: ‘Apwiya, Apwiya,’ eneera evolowe Moomweneni wa wiirimu, hooye, mene ale paahi empaka yootthuna ya Atiithi aka eri wiirimu, eneera evolowe.
22 Antxipale enookeerela nihiku nene nenno: ‘Apwiya, Apwiya, khaniprofetisanri mwa nsina nanyu, naari khanoomonle minepa soonanara mwa nsina nanyu ni khanivanre miteko sintxipale sootikhiniha mwa nsina nanyu?’
23 Miyo kinkela oweerela ha: ‘Nkoosuwenlenisa! Mukipwaherevo va, nyuwo muhintthara malamulo!’
24 “Vano, ole oniiwa masu aka, avinyaka anavarela muteko, onoolikana ni mulopwana amiruku otenke empa awe vamwala.
25 Yaarupa epula, yaasareya maahi ni yaahoopeliwa epheyo yoowuupa, menento empa ele khayaamonre mwaha wooweera yaatekinwe vamwala.
26 Mene ootheene ole oniiwa masu aka ohinvarela muteko, onoolikana ni mulopwana mulolo otenke empa awe veehaavani.
27 Ni yaarupa epula, yaasareya maahi ni yaahoopeliwa epheyo yoowuupa, nto empa eyo yaamora ni omora waya, yaamonre yootheene.”
28 Yesu amalihakaru ohima itthu sootheene iya, yookhumelelaaya yaari yooweera atthu yaatikhiniheya mwaha wa moota aaxuttihaawe,
29 woona weera owo aaxuttiha ntoko mutthu aavahinwe owera ni Muluku, ohiya ntoko alipa oolepa.
