Vhakriste vha tenda uri Yesu o fela zwivhi zwa vhathu vhoṱhe. (1 Petro 3:18) Fhedzi u tshidzwa zwi fhira u sokou tenda uri Yesu ndi Mutshidzi. Madimoni a a zwi ḓivha uri Yesu ndi “Murwa wa Mudzimu,” fhedzi a khou ḓo fheliswa, ha nga tshidzwi.—Luka 4:41; Yuda 6.

•  Ndi fanela u ita mini uri ndi tshidzwe?

•  Hu pfi mini nga “Thabelo Ya Muitazwivhi”?

•  “Thabelo Ya Muitazwivhi” yo thoma ngafhi?

•   Ni fanela u tenda uri Yesu o ṋekedza vhutshilo hawe a tshi itela zwivhi zwashu. (Mishumo 16:30, 31; 1 Yohane 2:2) Zwenezwi zwi katela u tenda uri Yesu o vha e muthu wa vhukuma na uri zwine Bivhili ya zwi amba nga hae ndi ngoho.

•   Gudani zwine Bivhili ya zwi funza. (2 Timotheo 3:15) Bivhili i amba uri muapostola Paulo na Silasi vho vhudza mulindi wa dzhele uri: “Tenda Murena Yesu, ndi hone u tshi ḓo tshidzwa.” Nga murahu ha zwenezwo, vha thoma u mu vhudza “ipfi ḽa Yehova.” a (Mishumo 16:31, 32) Zwenezwi zwi sumbedza uri mulindi wa dzhele o vha a si nga si tende Yesu arali o vha a sa pfesesi Ipfi ḽa Mudzimu. O vha a tshi tea u vha na nḓivho yo teaho i bvaho Maṅwaloni.—1 Timotheo 2:3, 4.

•   Rembuluwani. (Mishumo 3:19) Ni tea u rembuluwa kana u ḓisola kha zwithu zwo khakheaho zwe na zwi humbula na u zwi ita tshifhingani tsho fhiraho. Vhaṅwe vha ḓo zwi vhona uri no rembuluwa musi ni tshi litsha u ita zwithu zwine Mudzimu a si zwi fune na ita ‘zwithu zwine zwa sumbedza uri no rembuluwa.’—Mishumo 26:20.

•   Ni tea u lovhedzwa. (Mateo 28:19) Yesu o amba uri vhane vha ḓo vha vhafunziwa vhawe vha ḓo lovhedzwa. Mulindi wa dzhele we ra amba nga hae mathomoni, o lovhedzwa. (Mishumo 16:33) Musi muapostola Petro a tshi fhedza u funza gogo ḽa vhathu ngoho nga ha Yesu, ‘vhe vha takalela zwe a amba vho lovhedzwa.’—Mishumo 2:40, 41.

•   Itani zwine Yesu a amba. (Vhahevheru 5:9) Vhane vha “ita zwoṱhe” zwe Yesu a ri laya vha zwi sumbedza nga nḓila ine vha tshila ngayo uri vha vhatevheli vhawe. (Mateo 28:20) Vha vha ‘vhaiti vha zwine ipfi ḽa amba zwone, hu si vhapfi fhedzi.’—Yakobo 1:22.

•   Konḓelelani u swika vhufheloni. (Marko 13:13) Vhafunziwa vha Yesu vha “tea u konḓelela” uri vha kone tshidzwe. (Vhahevheru 10:36) Sa tsumbo, muapostola Paulo o thetshelesa nga vhuronwane zwoṱhe zwe Yesu a laya nahone o dzula a tshi fhulufhedzea kha Mudzimu. O konḓelela a ita zwenezwi u bva musi a tshi vha Mukriste u swika a tshi fa.—1 Vhakorinta 9:27.

 Kha dziṅwe kereke vhathu vha rabela thabelo dzi ngaho sa “Thabelo Ya Muitazwivhi” na “Thabelo Ya U Tshidzwa.” Vhane vha khou rabela vha tshi shumisa dzenedzo thabelo vha a tenda uri vha na tshivhi na uri Yesu o fela zwivhi zwavho. Vha ita na u humbela uri Yesu a dzhene mbiluni dzavho kana vhutshiloni havho. Fhedzi Bivhili a i ambi nga ha “Thabelo Ya Muitazwivhi” kana u ri ṱuṱuwedza uri ri i shumise.

 Vhaṅwe vha humbula uri muthu a nga vha na vhungoho ha uri u ḓo tshidzwa nga murahu ha u dovholola “Thabelo Ya Muitazwivhi.” Fhedzi u rabela a zwi ambi uri muthu u ḓo tshidzwa. Ri dzula ri tshi khakha nga nṱhani ha u sa fhelela. (1 Yohane 1:8) Ndi ngazwo Yesu o funza vhatevheli vhawe uri vha dzule vha tshi rabela uri vha hangwelwe zwivhi. (Luka 11:2, 4) Zwiṅwe hafhu, vhaṅwe Vhakriste vhe vha vha vha tshi nga vha vho tshila tshoṱhe vho xelelwa nga ḽeneḽo fhulufhelo ngauri vho litsha u shumela Mudzimu.—Vhahevheru 6:4-6; 2 Petro 2:20, 21.

 Vhaḓivhi vha zwo iteaho kale a vha tendelani zwi tshi ḓa kha uri “Thabelo Ya Muitazwivhi” yo thoma ngafhi. Vhaṅwe vha amba uri yo thoma musi hu tshi thoma tshigwada tsha Vhaporotesitante. Vhaṅwe vha tenda uri yo thoma u shumiswa musi hu tshi thoma dzikereke ntswa nga vho 1700 na vho 1800. Naho zwo ralo, Bivhili a i tikedzi yeneyo thabelo nahone yo fhambana na zwine Bivhili ya funza.