Vhurifhi Ha Yuda 1:1-25
1 Nṋe Yuda, mulanda wa Yesu Kristo, murathu wa Yakobo,+ ndi khou ṅwalela vho nangwaho+ vhane vha funwa nga Mudzimu Khotsi na vho tsireledzwaho uri vha vhe na Yesu Kristo, ndi ri:+
2 Ngavhe Mudzimu a tshi ni khathutshela, u ni funa na u ita uri ni vhe na mulalo nga ho engedzeaho.
3 Vhafunwa, naho ndo vha ndi tshi ṱoḓa u ni ṅwalela nga ha nḓila ine Mudzimu a ḓo ri tshidza ngayo,+ ndo vhona zwo tea u ni ṅwalela na u ni ṱuṱuwedza uri ni dzule ni na lutendo kha Mudzimu,+ lwe lwa ṋewa vhakhethwa luthihi nahone lwa tshoṱhe.
4 Ndi ni ṅwalela zwenezwi, ngauri vhaṅwe vhanna vho dzhena vhukati haṋu ni sa zwi ṱhogomeli samusi Maṅwalo o zwi amba u bva kale uri vha ḓo haṱulwa; vhenevho vhanna a vha ofhi Mudzimu, vha ita tshivhi vha sa shoni*+ vha tshi humbula uri Mudzimu u ḓo vha sumbedza vhuthu vhuhulu, a vha fhulufhedzei kha Yesu Kristo muṋe washu muthihi na Murena washu.+
5 Naho ni tshi ḓivha zwenezwi zwithu nga vhuḓalo, ndi tama u ni humbudza uri Yehova* o tshidza vhathu vhawe shangoni ḽa Egipita,+ nga murahu a fhelisa vha sa tendi.+
6 Na vharuṅwa vhe vha pfuluwa vhudzuloni havho nge vha si fushee nga vhuimo havho,+ o vha vhea lwa tshoṱhe swiswini ḽihulu u swika vha tshi haṱulwa nga ḓuvha ḽihulu.+
7 Na vhathu vha Sodoma na Gomora na miḓi i re tsini, vho ḓifara luvhi nga zwa vhudzekani* nga ho kalulaho, vha ita zwa vhudzekani nga nḓila i songo teaho.+ Vho pfiswa vhuṱungu lwa tshoṱhe nga u fhiswa nga mulilo, uri zwi vhe tsumbo ya u ri sevha.+
8 Naho vhenevho vhanna vha tshi ḓivha zwenezwi, vha dzula vha tshi humbula zwithu zwivhi, vha ḓifara nga nḓila i songo kunaho, vha nyadza vhavhusi, vha sasaladza vha re na vhugala.+
9 Mikaele+ muhulwane wa vharuṅwa+ ho ngo sema Diabolo+ musi vha tshi khou lwela tshitumbu tsha Mushe,+ fhedzi o ri: “Ngavhe Yehova* a tshi u kaidza.”+
10 Vhenevho vhanna vha sasaladza zwoṱhe zwine vha si zwi pfesese.+ Vha nga zwipuka zwi sa koni u humbula,+ vha bvela phanḓa vha tshi ḓitshinya.
11 Zwi ḓo vha vhifhela ngauri vho tevhela nḓila ya Kaini,+ vha gidimela u edzisa vhukhakhi ha Bileamu+ vha tshi ri zwi ḓo vha vhuyedza, vha shandukela Mudzimu u fana+ na Kora,+ ndi ngazwo vha tshi ḓo fheliswa.
12 Vhenevho vhane vha ḽa na inwi zwimimani zwaṋu,* vha nga matombo a re fhasi ha maḓi,+ vha nga vhalisa vhane vha humbulela vhone vhaṋe;+ vha nga makole ane a iswa ngeno na ngei nga muya, fhedzi mvula i si ne;+ vha nga miri i sa aṋwi nga tshifhinga tsha u aṋwa, yo faho, ya tupulwa;
13 vha nga magabelo a lwanzhe ane a bvisela nnḓa mashika, vha ita zwithu zwi shonisaho na zwi nengisaho;+ vha nga ṋaledzi dzi sa imi fhethu huthihi, vha ḓo dzula swiswini ḽihulu lwa tshoṱhe.+
14 Na Henoxe+ wa vhusumbe u bva kha Adamu, o porofita nga havho a ri: “Yehova* o ḓa na mavhuthu+ awe a vharuṅwa vhakhethwa,
15 uri a ḓivhadze vhukhakhi+ ha vhavhi vhoṱhe na u haṱula vhoṱhe vha sa mu ofhi. Mudzimu u ḓo vha haṱula ngauri vha ita vhuvhi hoṱhe na u mu sema.”+
16 Vhenevho vhanna vha a gungula,+ a vha fushei nga zwine vha vha nazwo, vha langwa nga nyemulo dzavho,+ vha a zuwa, vha ḓiita u nga vha khou khoḓa vhaṅwe vha tshi itela u ḓivhuyedza.+
17 Vhafunwa, ni songo hangwa zwe na vhudzwa nga vhaapostola vha Murena washu Yesu Kristo,
18 musi vha tshi ni vhudza uri: “Maḓuvhani a vhufhelo hu ḓo vha na vhane vha ni goḓa, vha tshi langwa nga nyemulo mmbi.”+
19 Vhenevho vhanna vha fhandekanya tshivhidzo,+ vha tshila sa zwipuka, a vha livhiswi nga muya wa Mudzimu.
20 Vhafunwa, khwaṱhisani lutendo lwaṋu lukhethwa, ni rabele ni tshi livhiswa nga muya mukhethwa,+
21 ni dzule ni tshi ita zwine zwa ita uri Mudzimu a ni fune,+ musi no lindela u khathutshelwa nga Murena washu Yesu Kristo, zwine zwa ita uri ni wane vhutshilo vhu sa fheli.+
22 Zwiṅwe hafhu, dzulani ni tshi khathutshela+ vhane vha timatima;+
23 vha tshidzeni+ nga u vha bvisa muliloni. Ni dzule ni tshi khathutshela vhaṅwe, fhedzi ni ṱhogomele uri vha si ni tshikafhadze nga zwivhi zwavho.* Vhengani vhuvhi havho.+
24 Mudzimu u a kona u ni tsireledza uri ni si khukhulwe na u ita uri ni dzule ni sa solei+ phanḓa ha vhugala hawe, zwine zwa ita uri ni takale zwihulu.
25 Ndi ene Mudzimu e eṱhe ane a ri tshidza nga Yesu Kristo Murena washu. Vhugala, vhuhulu, maanḓa na vhuvhusi, zwoṱhe ndi zwawe u bva kale na zwino na nga hu sa fheli. Amen.
Ṱhaluso dzi re magumoni a siaṱari
^ Nga Tshigerika ndi aselgeia. Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Kana “zwimimani zwa u sumbedza uri ni funa vhahashu.”
^ Thevhedz., “ni vhenge na tshiambaro tsho tshikafhadzwaho nga mishumo mivhi.”
