Pfukelani kha mafhungo

Tshiṱhavhelo Tsha Yesu Ndi ‘Tshirengululi Tsha Vhanzhi’ Nga Nḓila-Ḓe?

Tshiṱhavhelo Tsha Yesu Ndi ‘Tshirengululi Tsha Vhanzhi’ Nga Nḓila-Ḓe?

Bivhili i a fhindula

Mudzimu u shumisa tshiṱhavhelo tsha Yesu u itela u tshidza vhathu kha tshivhi na lufu. Bivhili i fanyisa malofha a Yesu na mutengo wa u rengulula. (Vhaefesa 1:7; 1 Petro 1:18, 19) Nga zwenezwo, Yesu o amba uri o ḓa “u ṋekedza vhutshilo hawe uri vhu vhe tshirengululi a tshi itela vhanzhi.”​—Mateo 20:28.

Ndi ngani ho vha hu tshi ṱoḓea ‘tshirengululi tsha vhanzhi?’

Adamu, munna wa u thoma o sikwa o fhelela, e si na tshivhi. O vha e na tshilavhelelwa tsha u tshila tshoṱhe, fhedzi tsho xela musi a tshi khetha u sa thetshelesa Mudzimu. (Genesi 3:17-19) O beba vhana nahone vha mamela tshivhi. (Vharoma 5:12) Nga nṱhani ha zwenezwo, Bivhili i sumbedza uri Adamu na vhana vhawe vho mbo ḓi vha phuli dza tshivhi na lufu. (Vharoma 7:14) Nga nṱhani ha u sa fhelela, a hu na na muthihi wavho we a vha a tshi nga kona u rengulula vhathu.​—Psalme ya 49:7, 8.

Mudzimu o pfela vhuṱungu vhana vha Adamu kha tshiimo tshe vha vha vhe khatsho. (Yohane 3:16) Naho Mudzimu e na khaṱulokwayo o vha a nga si kone u tsinya ḽiṱo hu si na tshiitisi tshi pfalaho. (Psalme ya 89:14; Vharoma 3:23-26) Mudzimu u funa vhathu nga maanḓa ndi ngazwo o ita ndugiselelo ya u hangwela na u fhelisa zwivhi zwavho. (Vharoma 5:6-8) Tshirengululi tsho ita uri zwenezwo zwi konadzee.

Tshirengululi ndi mini?

Bivhilini, ipfi “tshirengululi” ḽi katela zwi tevhelaho:

  1. Ndi mbadelo.​Numeri 3:46, 47.

  2. Tshi ḓisa mbofholowo kana u tshidzwa.​—Ekisodo 21:30.

  3. Tshi eḓana kokotolo na mulandu. *

Ṱhogomelani nḓila ine zwenezwi zwa tshimbidzana ngayo na tshiṱhavhelo tshi rengululaho tsha Yesu Kristo.

  1. Mbadelo. Bivhili i amba uri Vhakriste vho “rengwa nga mutengo muhulu.” (1 Vhakorinta 6:20; 7:23) Wonoyo mutengo ndi malofha a Yesu, e ngao a “rengululela Mudzimu vhathu vha bvaho kha tshaka dzoṱhe na ndimi dzoṱhe.”​—Nzumbululo 5:8, 9.

  2. Mbofholowo. Ro “vhofhololwa nga tshirengululi” tsha Yesu kha tshivhi.​—1 Vhakorinta 1:30; Vhakolosa 1:14; Vhaheberu 9:15.

  3. U eḓana. Tshiṱhavhelo tsha Yesu tshi eḓana kokotolo na vhutshilo he Adamu a vhu xedza​—vhutshilo ho fhelelaho. (1 Vhakorinta 15:21, 22, 45, 46) Bivhili i amba uri: “Samusi u sa thetshelesa ha muthu muthihi [Adamu] ho ita uri vhanzhi vha vhe vhaitazwivhi, nga hu fanaho na u thetshelesa ha muthu muthihi [Yesu Kristo] ho ita uri vhanzhi vha pfi vho luga.” (Vharoma 5:19) Zwenezwi zwi ṱalusa nḓila ine lufu lwa muthu muthihi lwa nga vha ngayo tshirengululi tsha vhaitazwivhi. Ngoho ndi ya uri, tshiṱhavhelo tsha Yesu ndi “tshirengululi tsha vhoṱhe” vhane vha ita zwo fanelaho uri vha vhuyelwe ngatsho.​—1 Timotheo 2:5, 6.

^ phar. 11 Bivhilini, maipfi a u thoma a ṱalutshedzwaho uri “tshirengululi” a ambela kha mutengo kana tshithu tsha ndeme, tshine tsha badelwa. Sa tsumbo, ḽiiti ḽa Luheberu ka·pharʹ ḽi amba u ‘fukedza.’ (Genesi 6:​14) Kanzhi ḽi ambela kha u fukedza tshivhi. (Psalme ya 65:3) Dzina ḽi tshimbidzanaho naḽo koʹpher ḽi ambela kha mutengo une wa badelwa u itela u fukedza kana u rengulula. (Ekisodo 21:30) Nga hu fanaho, ipfi ḽa Lugerika lyʹtron, ḽine kanzhi ḽa ṱalutshedzelwa uri “tshirengululi,” ḽi nga ambela kha “mutengo wa u rengulula.” (Mateo 20:28; The New Testament in Modern Speech, nga R. F. Weymouth) Vhaṅwali vha Vhagerika vho shumisa wonoyo mubulo u itela u ambela kha mbadelo ya u rengulula tshivhotshwa tsha nndwani kana phuli.