Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA MATI 2013

Mose—E taata î i te here

Mose—E taata î i te here

EAHA TE HERE?

O te taairaa piri roa ïa e vetahi ê. Ma ta ’na mau parau e haaraa e faaite ai te taata i to ’na here mau. Ia titauhia, e haapae o ’na ia ’na iho.

MEA NAFEA MOSE I FAAITE AI I TE HERE?

Ua here mau Mose i te Atua. Mea nafea oia i te faaiteraa? A haamana‘o na i tei parauhia i roto i te Ioane 1, 5:3: “Teie hoi te hinaaro i te Atua, o te haapao i ta ’na ra parau.” Ua ora noa Mose ia au i tera faaueraa. I te mau mea atoa ta te Atua i ani ia ’na ia rave, mai te hopoia rahi e farerei i te arii puai ra o Aiphiti e tae roa ’tu i te ohipa iti haihai e faatoro i to ’na rima i nia i te miti Uteute, ua auraro Mose. Mea fifi aore ra mea ohie anei, “te mau mea atoa ta Iehova i parau mai ia ’na ra, o ta [Mose] ïa i rave.”—Exodo 40:16.

Ua faaite atoa Mose i te here i nia i to ’na mau hoa Iseraela. Ua ite iho â teie nunaa e te faaohipa ra Iehova ia ’na no te aratai atu. No reira, ia fifi ratou, o ’na te farereihia ’tu. Te taiohia nei: “Ua tia noa ihora te mau taata i mua ia Mose mai te poipoi mai e ahiahi noa ’tura.” (Exodo 18:13-16) A feruri na i to ’na rohirohi i muri a‘e i to ’na faarooraa i te mahana taatoa ia faaite mai to Iseraela i to ratou mau fifi! Noa ’tu râ, ua oaoa noa Mose i te tauturu i te nunaa ta ’na i here.

I pure atoa na oia no tei herehia e ana e no tei faaino ia ’na. Ei hi‘oraa, a amuamu ai o ’na ia Mose, ua faautua Iehova ia Miriama, te tuahine o Mose, leperahia ’tura oia. Ua peapea Mose i tei tupu, na ô atura ia Iehova: “E faaora oe ia ’na i teie nei, e te Atua e, o to ’u ïa hinaaro ia oe.” (Numera 12:13) Eaha ’tu â tei turai ia Mose ia pure ma te haavare ore maori râ te here?

EAHA TE HAAPII MAI?

Mai ia Mose, e faatupu ana‘e i te here mau no te Atua. Na te reira e turai ia tatou ia haapao i ta ’na mau faaueraa “ma te aau atoa.” (Roma 6:17) E oaoa ïa to Iehova aau e e faufaa-atoa-hia tatou. (Maseli 27:11) Ia tavini tatou i te Atua ma te here mau, eita tatou e na reira noa no te mea e mea tia, no te mea râ ua oaoa tatou i te rave i te reira.—Salamo 100:2.

No te pee atoa i te hi‘oraa o Mose, e here ana‘e ia vetahi ê ma te haapae ia tatou iho. Ia faaite mai te mau hoa aore ra fetii i to ratou fifi, e turai mai te here (1) ia faaroo maitai atu, (2) ia tutava i te taa i to ratou mau mana‘o hohonu, e (3) ia faaite atu e te tâu‘ahia ra ratou.

Mai ia Mose, e pure ana‘e no te feia herehia e tatou. I te tahi taime, e faaite mai ratou i to ratou fifi, e mana‘o paha tatou e aita ta tatou e ravea a na ô atu ai: “E pure vau no oe, ta ’u noa ïa e nehenehe e rave.” A haamana‘o râ: “E mana rahi to te pure a te taata parauti‘a.” (Iakobo 5:16, Te Faufaa Api) Maoti ta tatou mau pure e rave ai paha Iehova i te tahi mea no teie taata. Peneia‘e tera te ravea ta ’na i maiti no te tauturu atu. Eaha ’tu â hoi ta tatou e nehenehe e rave no tei herehia e tatou maori ra o te pureraa no ratou? *

Mea rahi iho â ta Mose e haapii mai! E taata noa oia, e hi‘oraa faahiahia râ no te faaroo, haehaa e here. Rahi atu â tatou i te pee i to ’na hi‘oraa, rahi atu â tatou e vetahi ê i te faufaahia.—Roma 15:4.

^ par. 8 Ia faaroo mai te Atua i ta tatou mau pure, e mea tia ia haapao i ta ’na mau titauraa. No te ite atu â, a hi‘o i te pene 17 o te buka Eaha ta te Bibilia e haapii mau ra? piahia e te mau Ite no Iehova.