Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA MATI 2013

Mose—E taata haehaa

Mose—E taata haehaa

EAHA TE HAEHAA?

Aita ïa e teoteo aore ra ahaaha. Eita te taata haehaa e mana‘o e mea faufaa a‘e o ’na ia vetahi ê. Ua ite te taata hara haehaa e e taotiaraa to ’na.

MEA NAFEA MOSE I FAAITE AI I TE HAEHAA?

E pinepine e ite-mau-hia te huru o te hoê taata ia noaa ia ’na te tahi mana. E taata haehaa anei aore ra aita. Ia au i te reira, ua papai Robert Ingersoll: “E nehenehe te rahiraa o te taata e faaruru i te mau fifi. Ia hinaaro râ oe e ite eaha mau te huru o te hoê taata, a horoa ’tu ïa i te mana.” Aita Mose i teoteo no te mea e mana to ’na. I roto i tera tuhaa, e hi‘oraa maitai ïa o ’na. No te aha?

A faaue ai Iehova ia Mose ia aratai ia Iseraela, e mana rahi ta ’Na i horoa ’tu. Aita râ Mose i teoteo a‘e. A hi‘o na i to ’na haehaa a faatitiaifaro ai oia i te tahi fifi no nia i te tufaraa faufaa. (Numera 27:1-11) E ere taua tupuraa i te mea ohie, e riro hoi te reira ei hoho‘a no te mau ui i muri a‘e.

E nafea ïa Mose? E mana‘o anei o ’na e ei aratai o Iseraela, e tia ia ’na ia rave i te faaotiraa? E tiaturi anei oia i to ’na aravihi, i tei tupu i roto i to ’na oraraa aore ra i ta ’na i taa no nia i te mana‘o o Iehova?

E na reira paha te taata teoteo, o Mose râ aita ïa. Te faatia maira te Bibilia: “Ua hopoi a‘era Mose i t[er]a parau na ratou ra i mua i te aro o Iehova.” (Numera 27:5) A feruri na! Noa ’tu e ua aratai oia i te nunaa Iseraela fatata e 40 matahiti, ua tiaturi noâ Mose ia Iehova eiaha râ ia ’na iho. Te papu maitai ra ia tatou e e taata haehaa mau Mose.

Ua mana‘o anei oia no ’na ana‘e te tiaraa aore ra mana? Aita. Ua oaoa oia a farii ai Iehova ia riro mai te tahi atu mau Iseraela ei peropheta. (Numera 11:24-29) A parau ai to ’na metua tane hoovai ia maiti i te tahi atu mau taata no te tauturu ia ’na, ma te haehaa ua farii atu oia. (Exodo 18:13-24) I te pae hopea o to ’na oraraa, noa ’tu e te itoito noa ra to ’na tino, ua ani Mose ia Iehova ia faatoroa i te tahi mono no ’na. A maiti ai Iehova ia Iosua tei apî a‘e ia ’na, ua turu maitai atu Mose ma te faaitoito i te nunaa ia pee i ta Iosua aratairaa i te Fenua tǎpǔhia. (Numera 27:15-18; Deuteronomi 31:3-6; 34:7) No Mose, e fana‘oraa taa ê iho â ia aratai i to Iseraela i roto i te haamoriraa. Aita râ oia i haafaufaa i te tiaraa aore ra mana na mua ’‘e i te maitai o vetahi ê.

EAHA TE HAAPII MAI?

Eiaha roa e faateitei ia tatou no te tahi tiaraa aore ra aravihi. A haamana‘o: No te rave maitai i ta Iehova ohipa, mea faufaa a‘e to tatou haehaa i te aravihi. (Samuela 1, 15:17) Ei taata haehaa mau, e tutava tatou i te haapao i teie a‘oraa paari o te Bibilia: “E tiaturi ia Iehova ma to aau atoa ra; eiaha râ e tiaturi i to oe ihora haapao [aore ra ite].”—Maseli 3:5, 6.

Te haapii atoa maira te hi‘oraa o Mose e eiaha e haafaufaa rahi roa i to tatou tiaraa aore ra mana.

E faufaahia anei tatou i te haehaa o Mose? E! Mea ohie a‘e no te taata ia here mai ia faaite tatou i te haehaa mau. Te mea faufaa roa râ, ia auhia mai tatou e Iehova, o ’na hoi te faaite i taua huru maitai ra. (Salamo 18:35) “E patoi . . . te Atua i tei teot[e]o, e horoa maira i te maitai no tei haehaa.” (Petero 1, 5:5) E ere anei tera te tahi tumu papu ia pee i te hi‘oraa o te haehaa o Mose?