Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA MATI 2013

Mose—E taata faaroo puai

Mose—E taata faaroo puai

EAHA TE FAAROO?

Ia au i te Bibilia, o te tiaturiraa aueue ore ïa i te mau mea i haapapuhia. No te taata i faatupu i te faaroo i te Atua, e tupu iho â ta ’Na i fafau.

MEA NAFEA MOSE I FAAITE AI I TE FAAROO?

Ua ora Mose ia au i ta te Atua mau parau fafau. (Genese 22:15-18) E nehenehe o ’na e fana‘o i te hoê oraraa maitai i Aiphiti, aita râ oia i maiti i te reira. “Mea maitai ia ’na te rave atoa i te pohe i te amuiraa i te taata no te Atua ra; ia rave i te navenave poto noa o te parau ino.” (Hebera 11:25) Ua faaoti noa anei o ’na mai tera a tatarahapa ’tu ai i muri a‘e? Aita, te na ô ra hoi te Bibilia e ua “itoito maite atura [Mose] i te hi‘oraa ’tu i te Atua, i tei ore e itea ia hi‘o.” (Hebera 11:27) Aita Mose i tatarahapa noa ’‘e i te mau faaotiraa ta ’na i rave no to ’na faaroo.

Ua tutava Mose i te haapuai i te faaroo o vetahi ê. A hi‘o na i tei tupu a mana‘o ai Iseraela e aita ta ratou e ravea. To muri hoi te nuu o Pharao e to mua ’tu te miti Uteute. No to ratou riaria, pii hua a‘era to Iseraela ia Iehova e ia Mose. Ua nafea ihora oia?

Aita Mose i ite noa ’‘e e e vahi te Atua i te miti Uteute ia ora mai te mau Iseraela. Ua tiaturi râ oia e e rave Iehova i te tahi mea no te paruru i to ’Na nunaa. Ua hinaaro atoa Mose ia tiaturi atoa to ’na mau hoa Iseraela i te reira. Te taiohia ra: “Ua parau atura Mose i taua mau taata ra, Eiaha outou e mǎta‘u; e parahi noa, e hi‘o i te ora a Iehova, i ta ’na e rave no outou i teie nei mahana.” (Exodo 14:13) Ua haapuai anei Mose i te faaroo o to ’na mau hoa Iseraela? Oia mau. Eiaha noa no Mose, no te mau Iseraela taatoa râ, te na ô ra te Bibilia: “No te faaroo i tae ai ratou na raro i te miti uteute mai te mea e e fenua pâpâmǎrô.” (Hebera 11:29) E ere noa ïa Mose tei faufaahia i te faaroo, o te mau taata atoa râ te haapii i te faatupu i te faaroo ia Iehova.

EAHA TE HAAPII MAI?

E nehenehe tatou e pee ia Mose ma te ora ia au i ta te Atua mau parau fafau. Ei hi‘oraa, te fafau maira te Atua e e haapao oia i to tatou mau hinaaro i te pae materia ia tuu i ta ’na haamoriraa na mua roa i roto i to tatou oraraa. (Mataio 6:33) E ere iho â i te mea ohie ia na reira, te haafaufaa rahi nei hoi te rahiraa o te taata i te mau tao‘a materia. Tei papu râ, ia tutava tatou i te faaohie i to tatou oraraa ma te haafaufaa na mua roa i ta tatou haamoriraa, e horoa mai Iehova i tei hinaarohia. Te haapapu maira oia: “E ore roa vau e taiva ia oe, e ore roa vau e faarue ia oe, e ore, e ore roa ’tu.”—Hebera 13:5.

E tutava atoa ana‘e i te haapuai i te faaroo o vetahi ê. Ei hi‘oraa, na te mau metua te hopoia rahi e tauturu i ta ratou tamarii ia faatupu i te faaroo. A paari ai ratou, e mea tia ia ite te tamarii e te vai mau ra te Atua e ua horoa atoa mai oia i ta ’na mau faaueraa no nia i te mea maitai e te mea ino. Ia papu atoa ia ratou e e maitai te oraraa ia haapaohia ta ’na mau faaueraa. (Isaia 48:17, 18) Ia tauturu te mau metua i te tamarii ia faatupu i te faaroo i te Atua e “o oia te faautua [aore ra haamaitai] i te feia i imi papu ia ’na,” ua horoa ïa ratou i te tao‘a faufaa i ta ratou tamarii.—Hebera 11:6.