Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA MATI 2013

 UA TAUI TE BIBILIA I TO ’U ORARAA

“Ua hinaaro raua e na ’u iho e ite i te parau mau”

“Ua hinaaro raua e na ’u iho e ite i te parau mau”
  • MATAHITI FANAURAA: 1982
  • FENUA: REPUPIRITA DOMINICAINE
  • AAMU: UA PAARI I ROTO I TE HAAPAORAA MOMONI

NA MUA ’‘E:

I Saint-Domingue, Repupirita Dominicaine, to ’u fanauraahia, e maha matou tamarii. O vau te hopea. E taata maitai to ’u na metua. I hinaaro na raua ia riro matou ei taata haapii-maitai-hia. E maha matahiti hou to ’u fanauraa, ua farerei to ’u na metua i te mau mitionare Momoni. Ua faahiahia raua i ta ratou huru faaahuraa mâ e peu maitai. Ua faaoti atura raua e o matou te utuafare matamua o te motu te riro ei melo o Te Ekalesia a Iesu Mesia i te feia mo‘a i te mau mahana hopea nei aore ra haapaoraa Momoni.

A paari noa ’i au, mea au na ’u te mau ohipa a te haapaoraa. Mea faufaa atoa no ’u tei haapiihia no nia i te oraraa utuafare e te haerea tia. Ua teoteo vau i te riro ei Momoni. No reira, o te taviniraa mitionare ta ’u fa.

A tia ’i to ’u 18 matahiti, ia nehenehe au e haere i te fare haapiiraa teitei, ua tere atu matou i Marite. Fatata hoê matahiti i muri a‘e, ua haere mai to mama tuahine e ta ’na tane e farerei ia matou i Floride. E Ite no Iehova hoi raua. Ua titau manihini mai raua ia matou i te tahi tairururaa mataeinaa. Ua faahiahia vau i te mau taata atoa e haaati ra ia ’u e taio ra i te Bibilia e e tapaopao ra. Ua ani atura vau i te hoê penitara e papie a na reira ’toa ’i.

I muri a‘e i te tairururaa, ua parau mai to mama tuahine e ta ’na tane e i te mea e te hinaaro ra vau e riro ei mitionare, e nehenehe raua e haapii mai i te Bibilia. Ua mana‘o vau e mea maitai te reira. I tera taime, mea rahi a‘e iho â to ’u ite i te buka a Moromona i te Bibilia.

UA TAUI TE BIBILIA I TO ’U ORARAA:

A haapii noa ’i au i te Bibilia na roto i te niuniu paraparau e to mama tuahine  e ta ’na tane, ua faaitoito noa mai raua ia faaau i ta ’u mau tiaturiraa e ta te Bibilia e haapii ra. Ua hinaaro raua e na ’u iho e ite i te parau mau.

Ua farii au e rave rahi tiaturiraa a te haapaoraa Momoni. Aita râ vau i ite e ua tuea anei te reira i ta te Bibilia e haapii ra. Ua hapono mai to mama tuahine i te vea A ara mai na! o te 8 no Novema 1995, piahia e te mau Ite no Iehova. E tumu parau no nia i te mau tiaturiraa Momoni to roto. Ua maere au e aita vau i matau i te rahiraa o te mau haapiiraa. Ua rave atura vau i te mau maimiraa i nia i te reni haamanahia a te Momoni. Mea mau iho â tei parauhia i roto i te vea. Ua papu roa ’tu â vau i te reira a mataitai ai au i te mau fare vairaa taihaa tahito a te Momoni i Utah.

I tiaturi noa na vau e ua tuati te buka a Moromona e te Bibilia. A taio maite ai râ vau i te reira, ua itea ia ’u te taa-ê-raa.

Hau atu â, i huru ê atoa na vau i te mau mana‘o here ai‘a haapiihia e te mau Momoni. Ei hi‘oraa, te haapii ra ratou e tei te mataeinaa Jackson i Missouri, i Marite, te ô Edene. Te parau atoa ra te mau peropheta Momoni e i te hoê mahana e faatere te Atua i te fenua taatoa na roto i te Hau Marite.

Ua mana‘o atura vau e, eaha te tupu no to ’u fenua aore ra te tahi atu? Ua tauaparau vau i te reira i te hoê po a niuniuhia mai ai au e te tahi taata apî Momoni tei faaineinehia ei mitionare. Aita vau i taiâ i te ani atu e, ia tupu te tama‘i, e farii anei oia i te aro i te mau Momoni o te tahi atu fenua. Ua maere roa vau i to ’na pahonoraa mai e e! Ua imi â vau i te mau haamaramaramaraa i roto i te mau haapiiraa a ta ’u haapaoraa. Ua uiui atoa vau i to matou mau tia faatere. Ua na ô mai ratou e e miterio te mau pahonoraa o ta ’u mau uiraa, i te hoê râ mahana e noaa mai ia ’u i te maramarama.

Aita vau i mauruuru i ta ratou faataaraa, hi‘opoa ’tura vau ia ’u e te tumu e tapi ai au i te riro ei mitionare Momoni. Taa ’tura ia ’u e ua hinaaro vau i te reira no te tauturu i te taata. O te tiaraa atoa te tahi tumu. No nia râ i te Atua, aita vau i ite o vai mau na o ’na. Noa ’tu e e rave rahi taime to ’u taioraa i te Bibilia, aita vau i haafaufaa mau i te reira. Aita atoa vau i ite noa ’‘e i te opuaraa a te Atua no te fenua aore ra huitaata.

TO ’U FAUFAARAAHIA:

Maoti ta ’u haapiiraa Bibilia e te mau Ite no Iehova i taa ’i ia ’u e rave rahi mea mai, o vai to te Atua i‘oa, eaha te tupu ia pohe tatou e e nafea Iesu e faatupu ai i te opuaraa a te Atua. Ua matau maitai au i teie buka faahiahia, te Bibilia, e te oaoa nei au i te faaite ia vetahi ê i ta ’u i haapii. Ua ite noa iho â vau e mea mau te Atua, i teie nei râ e nehenehe au e paraparau ia ’na mai to ’u hoa rahi roa ’‘e na roto i te pure. Ua bapetizohia vau ei Ite no Iehova i te 12 no Tiurai 2004. E ono ava‘e i muri a‘e, ua riro vau ei tavini taime taatoa.

A pae atura matahiti i teie nei, te ohipa ra vau i te pu a te mau Ite no Iehova i Brooklyn, i New York. Te mauruuru nei au i te turu i te ohipa neneiraa i te mau Bibilia e papai Bibilia no e mirioni taata na te ao. Te oaoa atoa nei au i te tauturu ia vetahi ê ia ite i te Atua.