Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA MATI 2013

 E HAAFATATA ’TU I TE ATUA

‘E Atua no te taata ora’

‘E Atua no te taata ora’

Mea puai a‘e anei te pohe i te Atua? Eita ïa. E nafea te pohe—aore ra te tahi atu “enemi”—e puai a‘e ai i te “Atua manahope”? (Korinetia 1, 15:26; Exodo 6:3) E mana to te Atua no te faaore i te pohe maoti te tia-faahou-raa. Te fafau ra oia i te na reira i roto râ i ta ’na ao apî. * Mea papu anei tera parau fafau? Na Iesu iho, te Tamaiti a te Atua, e haapapu maira i tera tiaturiraa.—A taio i te Mataio 22:31, 32.

I te mau Sadukea tei ore i tiaturi i te tia-faahou-raa, ua parau Iesu: “I te parau râ o te ora-faahou-raa o tei pohe ra, aita outou i taio i ta te Atua i parau mai ia outou na, a na ô mai ai ra e, O vau to Aberahama nei Atua, e to Isaaka nei Atua, e to Iakoba nei Atua? E ere hoi te Atua i te Atua no te taata pohe, no te taata ora râ.” I ǒ nei, ua faahiti Iesu i ta te Atua i parau ia Mose i te pu aihere e ama noa ra fatata a 3 500 matahiti a‘enei. (Exodo 3:1-6) Ia au i ta Iesu mau parau, ua na ô Iehova ia Mose: “O vau to Aberahama nei Atua, e to Isaaka nei Atua, e to Iakoba nei Atua.” Te auraa ïa e tupu iho â te parau fafau o te tia-faahou-raa. E nafea ïa?

I te tau a paraparau ai Iehova ia Mose, ua pohe ê na te patereareha ra o Aberahama a 329 matahiti a‘enei, o Isaaka a 224 matahiti e o Iakoba a 197 matahiti a‘enei. Noa ’tu râ, ua parau Iehova “O vau nei” eiaha râ “I riro na vau” ei Atua no ratou. No ’na, te ora noa ra na patereareha e toru. No te aha?

Ua faataa Iesu: “E ere hoi te Atua [Iehova] i te Atua no te taata pohe, no te taata ora râ.” A feruri na i te auraa o tera mau parau. Mai te peu e aita e tia-faahou-raa eita ïa Aberahama, Isaaka e Iakoba e ora faahou mai. Ahani te reira iho â, e Atua ïa Iehova no te taata pohe. Te auraa atoa ïa e ua puai a‘e te pohe i te Atua. Aita atoa ïa to ’na e mana no te faaora i ta ’na mau tavini taiva ore mai te pohe mai.

Eaha ’tura te parau no Aberahama, Isaaka, Iakoba e te mau tavini taiva ore atoa a Iehova tei pohe? Mea puai mau ta Iesu parau: “Te ora ana‘e ra hoi ratou ia ’na.” (Luka 20:38) Ma tera mau parau, e au ra e no Iehova, te ora noa ra ratou. Mea papu ïa ta ’na tia-faahou-raa no tei tavini ia ’na ma te taiva ore. (Roma 4:16, 17) Aita e otia to Iehova. E haamana‘o maitai atu ïa o ’na i tei pohe e tae roa i te taime e faatia faahou mai ai oia ia ratou.

Mea puai roa ’‘e Iehova i te pohe

E hinaaro anei oe e farerei faahou i tei herehia e oe? Mai te peu e e, a haamana‘o ïa e mea puai roa ’‘e Iehova i te pohe. Aita hoê a‘e mea e nehenehe e tapea ia ’na ia faatupu i ta ’na parau fafau e faatia faahou i te feia pohe. A haapii atu â no nia i te tia-faahou-raa e no nia i te Atua o te faatupu i te reira! E haafatata ’tu â ïa oe i “te Atua . . . no te taata ora.”

Taioraa Bibilia

Mataio 22-28Mareko 1-8

^ par. 3 No te ite atu â i te parau fafau a te Atua o te hoê tia-faahou-raa no te ora i roto i te hoê ao apî parau-tia, a hi‘o i te pene 7 o te buka Eaha ta te Bibilia e haapii mau ra? piahia e te mau Ite no Iehova.