Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA TENUARE 2013

 UA TAUI TE BIBILIA I TO ’U ORARAA

“Ua itea ia ’u te tiamâraa mau”

“Ua itea ia ’u te tiamâraa mau”
  • MATAHITI FANAURAA: 1981
  • FENUA: MARITE
  • AAMU: TAMAITI I HAERE Ê

NA MUA ’‘E:

Ua fanauhia vau i Moundsville, te hoê oire iti tapiri i te anavai Ohio i te pae apatoerau tooa o te râ o Virginie, i Marite. E maha tamarii matou, o vau te piti. E toru matou tamaroa, e ere iho â ïa to matou oraraa i te mea haumani. Mea itoito e mea maitai to ’u na metua e mea here i te taata. E ere matou i te mea moni, aita râ matou i ere noa ’‘e i te tahi mea. Ei Ite no Iehova, ua rave to ’u na metua i ta raua i nehenehe no te haapii mai i te mau faaueraa tumu Bibilia i to matou apî-roa-raa ra.

I to ’u taurearearaa mai, aita vau i haapao faahou i tei haapiihia mai. Ua haavare-ê-na-hia ïa to ’u aau. I uiui noa na vau, e auraa e mea oaoa anei te oraraa ia pee i te mau faaueraa tumu Bibilia. Ua mana‘o vau e o te tiamâ-roa-raa te ravea e oaoa roa ’i. Aita i maoro, ua faaea vau i te haere i te mau putuputuraa Kerisetiano. Ua na reira atoa to ’u tuaana e to ’u tuahine iti. Ua rave to matou na metua i tei nehenehe no te tauturu mai, aita râ matou i haafaufaa i ta raua mau tutavaraa.

Aita vau i mana‘o noa ’‘e e e aratai te tiamâraa ta ’u i hinaaro noa i roto roa i te peu ino. I te tahi mahana, a ho‘i mai ai au na te fare haapiiraa mai, ua pûpû mai te hoê hoa i te tahi avaava. Ua farii au. Mai reira mai, ua rahi atu â ta ’u peu iino mai te raveraa i te peu morare ore e te raau taero e te inu-hua-raa i te ava. I te mau matahiti i muri a‘e, ua rave au i te mau raau taero puai atu â a riro roa mai ai ei tîtî. No tera mau peu, haamata ’tura vau i te hoo i te raau taero ei imiraa moni.

Ua faahapa noa mai to ’u mana‘o haava no to ’u oraraa ino, e tautooraa ïa no ’u ia tâu‘a ore i te reira. Ua mana‘o vau, ‘Ua oti, aita e ravea faahou!’ Noa ’tu e mea rahi te taata na pihai ia ’u i te vahi arearearaa e himeneraa, mea pinepine au i te moemoe e te ahoaho. I te tahi taime, ia feruri au i te maitai o to ’u na metua, e uiui au, ‘No te aha vau i haere ê ai?’

 UA TAUI TE BIBILIA I TO ’U ORARAA:

Noa ’tu e aita e haapaoraa to ’u oraraa, aita vau i faaruehia. I 2000, ua titau manihini to ’u na metua ia ’u ia haere i te tairururaa mataeinaa a te mau Ite no Iehova. Ua haere au ma te faatia ture noa. Ua oaoa râ vau, ua tae atoa mai to ’u tuaana e to ’u tuahine iti tei haere ê.

I te tairururaa, ua haamana‘o a‘era vau e ua haere mai au i teie vahi no te hoê faata‘iraa upaupa rock i te matahiti i mairi. I taua taime ra, ua î tera vahi i te pehu e te auauahi avaava. E ere te rahiraa o te taata i te mea farii maitai e mea au ore hoi te upaupa. I te tairururaa râ, mea oaoa te taata e haaati ra ia ’u e ua farii popou mai noa ’tu e aita vau i ite ia ratou ahia ’tura matahiti. Mea mâ tera vahi e ua riro te poroi i horoahia mai ei tiaturiraa. Ua putapû roa vau no te taa-ê-raa. A ite ai au i ta te parau mau Bibilia e faatupu ra, ua mana‘o vau e ahani iho â vau i faaroo!—Isaia 48:17, 18.

“Ua faaitoito mai te Bibilia ia ’u ia faaea i te rave e i te hoo i te raau taero e ia riro ei taata maitai”

I muri noa iti a‘e i te tairururaa, ua opua vau e ho‘i i te amuiraa. Ua na reira atoa to ’u tuaana e to ’u tuahine iti. Ua farii matou tootoru atoa ra i te hoê haapiiraa Bibilia.

Ua putapû roa to ’u aau i te Iakobo 4:8 o te na ô ra: “E haafatata ’tu i te Atua, e na ’na e haafatata mai ia outou na.” Ua ite au e no te haafatata ’tu i te Atua, mea titauhia ia rave au i te mau tauiraa mai te faaearaa i te inu e te puhipuhi i te avaava e i te rave i te raau taero.—Korinetia 2, 7:1.

Aita vau i amui faahou i to ’u mau hoa tahito, e hoa apî râ to ’u no roto mai i te feia haamori ia Iehova. O te matahiapo i faatere i ta ’u haapiiraa Bibilia tei tauturu rahi mai ia ’u. Ua taniuniu e ua haere pinepine mai oia e hi‘o ia ’u. I teie mahana, o ’na hoê o to ’u mau hoa piri roa ’‘e.

I 2001, ua bapetizohia vau e ua na reira atoa to ’u tuaana e to ’u tuahine iti. A feruri na i te oaoa o to ’u na metua e o to ’u teina taiva ore a tahoê ai to matou utuafare i roto i te haamoriraa ia Iehova.

TO ’U FAUFAARAAHIA:

I mana‘o na vau e mea etaeta roa te mau faaueraa tumu Bibilia, i teie nei râ ua riro te reira ei parururaa. Ua faaitoito mai te Bibilia ia ’u ia faaea i te rave e i te hoo i te raau taero e ia riro ei taata maitai.

E fana‘oraa taa ê ta ’u e apiti i te huitaeae i te ao nei, te feia haamori ia Iehova. Te here mau nei ratou ia ratou e te tahoê nei no te haamori i te Atua. (Ioane 13:34, 35) Ua itea ia ’u te hoê haamaitairaa taa ê no roto mai i tera huitaeae, ta ’u ïa vahine o Adrianne ta ’u e here e poihere mau nei. Te oaoa rahi nei mâua i te tavini amui i to tatou Atua Poiete.

Aita vau e tapi faahou ra i te hoê oraraa miimii. Ei tavini taime taatoa, te tauturu nei au i te taata ia haafaufaa i te Parau a te Atua. Ua oaoa roa vau no teie ohipa. E nehenehe au e haapapu e ua taui te Bibilia i to ’u oraraa. Ua itea ia ’u te tiamâraa mau!