Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  Tenuare 2013

 TUMU PARAU MATAMUA: E MEA TIA ANEI IA MǍTA‘U I TE HOPEA O TEIE NEI AO?

Te hopea o teie nei ao—Mǎta‘uraa, maereraa, e mauruuru-ore-raa

Te hopea o teie nei ao—Mǎta‘uraa, maereraa, e mauruuru-ore-raa

21 no Titema 2012 ia au i te tarena Maya, e taui te huru o teie nei ao i te mana‘o o te taata e rave rahi. Eaha to oe mana‘o? Ia au i te mea ta oe e tiai ra, e topa paha to oe hau, e inoino paha oe, aore ra eita oe e tâu‘a. E parau tohu tano ore anei â teie no nia i te hopea o teie nei ao?

Ia au i te Bibilia, eaha “te hopea o teie nei ao”? (Mataio 24:3) Te mǎta‘u ra vetahi ia taninahia te fenua. Te maere ra vetahi i te mau faatiaraa no nia i te taime hopea. Ua rohirohi noa paha vetahi ia parauhia mai e ua fatata te hopea. Mea tano aore ra mea hape anei teie mau huru o te taata?

E maere paha oe ia haapii i ta te Parau a te Atua e faahiti ra no nia i te hopea o teie nei ao. Te faaite ra te Bibilia i te mau tumu e tiai ru ai i te hopea. Tera râ, te faataa atoa ra te reira i te inoino e itehia ia ore te mea tiaihia e tupu oioi. Te anihia ’tu nei oe ia hi‘o i ta te Bibilia pahonoraa i te tahi mau uiraa matauhia no nia i te hopea o teie nei ao.

 E taninahia anei te fenua?

TA TE BIBILIA PAHONORAA: “Na [te Atua] i haamau i te tumu o te fenua, ia ore roa ia aueue.”SALAMO 104:5.

Eita te fenua e haamouhia e te auahi aore ra e te tahi atu mau mea. Te haapii ra te Bibilia e e nohoraa te fenua no te taata e a muri noa ’tu. Te na ô ra te Salamo 37:29: “E parahi te feia parau-tia i nia i te fenua, e parahi tamau â ratou i reira.”—Salamo 115:16; Isaia 45:18.

I muri a‘e i to te Atua poieteraa i te fenua, ua parau oia e “mea maitai roa” te reira. (Genese 1:31) Aita Iehova i opua noa ’‘e e haamou i te fenua, ua fafau râ oia e haapohe i te feia e tuino i te reira. Eita ïa te fenua e mou.—Apokalupo 11:18.

E feruri paha oe i te Petero 2, 3:7 o te na ô ra: “Area te ra‘i e te fenua e vai nei, te tapeahia nei ïa e taua parau ra no te auahi.” Aita anei te reira e faaite ra e e taninahia te fenua? I te tahi taime, te faaohipa ra iho â te Bibilia i te mau ta‘o “ra‘i,” “fenua,” e “auahi” i roto i te auraa taipe. Ei hi‘oraa, ia parau te Genese 11:1: “Hoê roa o to te ao nei reo,” te auraa o te ta‘o “ao,” o te huitaata ïa.

E auraa taipe atoa to te mau ta‘o ra‘i, fenua e auahi i roto i te Petero 2, 3:7. Te faaite ra te mau irava 5 e 6 e e taairaa to te reira i te diluvi i to Noa tau. O te hoê ïa ao i tahito ra tei haamouhia eiaha râ to tatou paraneta. Ua tamâ ïa te diluvi i te hoê totaiete ino, aore ra “fenua.” Ua tamâ atoa te reira i te “ra‘i,” oia hoi te feia faatere o tera totaiete taata. (Genese 6:11) Te tohu atoa ra te Petero 2, 3:7 i te hoê haamouraa taatoa na roto i te auahi o taua totaiete ino ra e to ’na mau faatere pi‘o.

Eaha te tupu i te hopea o teie nei ao?

TA TE BIBILIA PAHONORAA: “Te mou nei . . . teie nei ao, e ta to te ao atoa e hinaaro nei; o tei haapao râ i to te Atua ra hinaaro, e tia ïa i te oraraa e a muri noa ’tu.”IOANE 1, 2:17.

E mou “teie nei ao,” aore ra te taatoaraa o te taata aita e ora ra ia au i te hinaaro o te Atua, eiaha râ te fenua. Ia ora mai te tahi taata ma‘i ai taata, e tatara ê paha te taote tâpû i te hoê oru o tera ma‘i. Mai tera taote, e ‘tâpû ê’ te Atua i te feia ino  ia nehenehe te feia maitai e ora ma te oaoa i te fenua. (Salamo 37:9) I roto i tera auraa, e mea maitai “te hopea o teie nei ao.”

Ia au i te reira, ua faaohipa vetahi mau huriraa Bibilia i te Mataio 24:3 mai teie, “te hopea o te faanahoraa o te mau mea” aore ra “te hopea o te anotau.” I te mea e e ora ’tu te huitaata e eita te fenua e mou, e ere anei i te mea tano ia mana‘o e o te hoê anotau apî, te hoê faanahoraa apî o te mau mea te itehia i muri iho? Te pahono ra te Bibilia, e. No reira hoi oia i parau ai “te ao a muri nei.”—Luka 18:30.

No nia i tera tau no a muri a‘e, ua parau Iesu o “te faahouraa” te reira, aore ra i roto i te tahi atu huriraa o “te faaapîraa o te mau mea atoa” ïa. I reira, e ora faahou te huitaata ia au iho â i te opuaraa matamua a te Atua. (Mataio 19:28) E fana‘o ïa tatou i reira i

  • Te hoê fenua paradaiso hau e ruperupe no te taatoaraa.—Isaia 35:1; Mika 4:4.
  • Te hoê ohipa papu e te oaoa.—Isaia 65:21-23.
  • Te oreraa o te mau ma‘i atoa.—Isaia 33:24.
  • Te apî-faahou-raa o te tino.—Ioba 33:25.
  • Te tia-faahou-raa mai te pohe mai.—Ioane 5:28, 29.

Ia rave tatou i “to te Atua ra hinaaro,” i ta ’na e ani maira, eita tatou e mǎta‘u i te hopea o teie nei ao. E tiai ru râ tatou i te reira.

Ua fatata iho â anei te hopea o teie nei ao?

TA TE BIBILIA PAHONORAA: “Ia hi‘o outou i taua mau mea nei i te tupuraa, ua fatata ïa te basileia o te Atua.”LUKA 21:31.

I roto i ta ’na buka (The Last Days Are Here Again), ua papai o Richard Kyle e “ua faatupu te tauiraa taue e te arepurepu totiare i te hoê tupuraa e mana‘o ai te taata i te mau tohu o te hopea o teie nei ao,” mai te peu iho â râ e mea fifi ia faataa i te reira.

Aita te mau peropheta tei parau no nia i te hopea i faataa i te mau tupuraa peapea o to ratou tau. Ua faaurua te Atua ia ratou ia faataa i te mau tupuraa o te haapapu e ua fatata mai te hopea o teie nei ao. E hi‘o ana‘e i te tahi mau parau tohu, e na oe e ite e te tupu ra te reira i to tatou tau.

Ua parau Iesu, ia ite outou i “taua mau mea nei,” e haapapu mai te reira e ua fatata te hopea o teie nei ao. (Mataio 24:33) Te tiaturi nei te mau Ite no Iehova e te tupu nei iho â tera mau mea, e te faaite nei ratou i to ratou faaroo i te taata ma te poro i roto e 236 fenua.

I te mea e aita te mau tiairaa no nia i te hopea i tupu, te auraa anei ïa eita roa ’tu te reira e tae mai?

TA TE BIBILIA PAHONORAA: “E parau hoi te taata e, E hau, e aita e ino, ei reira ra ratou e roohia-noa-hia mai ai e te pohe oioi, mai te vahine hapu ia roohia i te mauiui ra, e e ore roa ratou e ora.”TESALONIA 1, 5:3.

Te taai ra te Bibilia i te haamouraa o teie nei ao i te mauiui fanau, e tupu taue iho â te mauiui o te hoê mama fanau. E au atoa te taime e tae atu ai i te hopea i te fanauraa. E ite te mama hapû i te mau tapao e te fatata ra oia i te fanau. E horoa paha to ’na taote i te taio mahana fanauraa e e maorohia paha te reira, ua papu râ ia ’na e e tae mai iho â to ’na aiû. Oia atoa, eiaha te mau tiairaa tei ore i tupu ia taui i te mau haapapuraa e o te mau mahana hopea teie.—Timoteo 2, 3:1.

‘Mai te peu e e mea papu e te fatata maira te hopea,’ e ui paha oe, ‘no te aha te taata e ore ai e farii i te reira?’ Te faaite ra te Bibilia e ia piri mai te hopea, eita e rave rahi e tâu‘a i te mau haapapuraa o te reira. Eita ratou e ite i te mau tauiraa faufaa i te anotau hopea, e tâhitohito ratou ma te parau e, “Te vai noa nei â hoi te mau mea atoa mai te taotoraa mai â o te feia metua ra, mai te hamaniraa mai â i te matamua ra.” (Petero 2, 3:3, 4) Mea papu te mau tapao o te mau mahana hopea, e rave rahi râ te ore e haapao i te reira.—Mataio 24:38, 39.

 I roto i teie tumu parau, tau irava noa tei hi‘ohia mai no nia i te hopea o teie nei ao. * E hinaaro anei oe e ite atu â? Mai te peu e e, a farerei atu i te mau Ite no Iehova. E farii ratou i te faatere i te hoê haapiiraa Bibilia tamoni ore e oe. E nehenehe te reira e tupu i to oe fare, aore ra i te tahi atu vahi ta oe e hinaaro, aore ra na roto i te niuniu paraparau. To oe noa taime te titauhia, te mau maitai râ ta oe e fana‘o aita ïa e faaauraa.

^ par. 39 No te mau haamaramaramaraa hau, a hi‘o i te pene 9, “Te ora ra anei tatou i ‘te anotau hopea’?” i roto i te buka Eaha ta te Bibilia e haapii mau ra? piahia e te mau Ite no Iehova.