Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA No 3 2016

 UA TAUI TE BIBILIA I TO ’U ORARAA

Ua haapii au i te haafaufaa i te vahine e ia ’u iho

Ua haapii au i te haafaufaa i te vahine e ia ’u iho
  • MATAHITI FANAURAA: 1960

  • FENUA: FARANI

  • AAMU: TAATA INO, RAVE I TE RAAU TAERO E TE FAATURA ORE I TE VAHINE

NA MUA ’‘E:

Ua fanauhia vau i Mulhouse, i te pae apatoerau hitia o te râ o Farani, i te hoê oire matauhia no te mau ohipa iino. I to ’u tamariiraa, mea pinepine te tatama‘iraa i roto i te mau utuafare o tera vahi. I te fare, e haafaufaa-ore-hia te vahine e e pinepine to ’na mana‘o i te ore e tâu‘ahia. Ua matau roa vau i te faariro i te vahine mai tei tunu noa i te maa e tei tavini i te tane e te tamarii.

E ere te mea ohie te oraraa i to ’u tamariiraa. E taata inu rahi i te ava to ’u metua tane, no tera tumu o ’na i pohe ai i te ahururaa o to ’u matahiti. Pae matahiti i muri iho, ua haapohe to ’u taeae ia ’na iho. I tera noâ matahiti, ua taparahi-pohe-hia te tahi taata i muri a‘e i te hoê taputôraa fetii e ua ite mata roa vau i te reira. Ua oti roa vau, haapii a‘era te fetii ia ’u ia faaohipa i te tipi, te pupuhi e nafea atoa ia taputô no te paruru ia ’u. No tera huru oraraa fifi mau, ua haamata vau i te tatau i to ’u tino e te inu i te ava.

I te 16raa o to ’u matahiti, ua haamata vau i te inu 10 e tae atu 15 mohina pia i te mahana. Aita i maoro, haamata ’tura vau i te rave i te raau taero. E pee te reira ia ’u ia hoo vau i te auri faaruehia e ia eiâ atoa. I te 17raa o to ’u matahiti, ua mau a‘ena vau i te fare auri. I te pae hopea, no te eiâ e ta ’u mau ohipa iino, 18 faautuaraa ta ’u.

Ua ino roa ’tu â to ’u oraraa i te 20raa o to ’u matahiti. Hau atu 20 omou raau taero ta ’u e puhipuhi i te mahana. I muri iho, ua rave atoa i te raau taero puai a‘e, e te tahi atu o te opanihia e te ture. Ehia a‘enei taime, ua fatata roa vau i te pohe. Ua haamata atoa vau i te hoo i te raau taero e e tapea noa vau i te hoê tipi e pupuhi i nia ia ’u. I te hoê mahana, ua pupuhi au i nia i te hoê taata. Auaa o te tapea auri o to ’na hatua tei puta! I te 24raa o to ’u matahiti, ua pohe to ’u metua vahine e ua riro vau ei taata ino roa ’tu â. E ape mai te taata no to ratou riaria ia ’u. No te ohipa taputô, pinepine au i te haere i te aua mutoi aore ra i te fare ma‘i no te nira i to ’u mau pepe.

E 28 matahiti to ’u a faaipoipo ai au. Ua taa paha ia outou, aita vau i faaite i te faatura i ta ’u vahine. E parau ino e e tupai na vau ia ’na. Aita hoê a‘e ohipa ta mâua e rave amui. No ’u, e navai noa o ’na i te mau tao‘a faaunauna ta ’u i eiâ mai. E ohipa râ tei tupu i muri a‘e. Ua haamata ta ’u vahine i te haapii i te Bibilia e te mau Ite no Iehova. I muri a‘e iho â i te taime matamua o ta ’na haapiiraa, ua faaea oia i te puhipuhi i te avaava, i te farii i te moni i eiâhia mai e ua faaho‘i mai i te mau tao‘a ta ’u i horoa ’tu. Ua riri roa vau, faaue atura  ia faaea o ’na i te haapii i te Bibilia e ua puhipuhi i te auauahi o te avaava i nia i to ’na hoho‘a. Ua faaooo a‘ena atoa vau ia ’na i mua i to mâua mau taata tapiri.

I te tahi po, ua taero roa vau e ua tutui i to mâua fare i te auahi. Na ta ’u vahine i faaora ia ’u e ta mâua tamahine e pae matahiti. I te peeraa to ’u taero, ua faahapa noa vau ia ’u. I roto i to ’u aau, ua mana‘o vau eita roa te Atua e faaore i ta ’u hara. Ua haamana‘o i te parau a te tahi perepitero, e haere te feia iino i roto i te po auahi. Ua na ô roa mai te taote no te feia ma‘i roro e haapao ra ia ’u: “Aita e ravea faahou no oe! Eita e nehenehe e taui ia oe.”

UA TAUI TE BIBILIA I TO ’U ORARAA:

I muri a‘e i tera ati auahi, ua haere mâua e faaea i te metua ra o ta ’u vahine. I to te mau Ite no Iehova haereraa mai e farerei i ta ’u vahine, ua ani atu vau: “E nehenehe anei te Atua e faaore i ta ’u mau hara atoa?” Ua faaite mai raua i te Korinetia 1, 6:9-11 i roto i te Bibilia. Te faahiti ra tera mau irava i te mau peu ta te Atua e ore e au e te na ô atoa ra râ: “Mai te reira hoi te hoê pae o outou na.” Ua haapapu mai te reira e nehenehe au e taui. I muri iho, ua taio atoa mai i te Ioane 1, 4:8 o tei faaite mai te here ra te Atua ia ’u. Ua faaitoito mai te reira e ua ani au ia haapii ia ’u i te Bibilia e piti taime i te hebedoma. Haamata ’tura vau i te haere i te mau putuputuraa Kerisetiano e ua pure tamau ia Iehova.

Aita i hope hoê ava‘e, ua faaoti au i te faaea i te rave i te raau taero e te inu i te ava. Aita i maoro, ua taa ia ’u e tupu te aroraa i roto i to ’u nei tino! E moemoeâ riaria mau ta ’u e ite ia taoto vau, e mauiui noa te upoo e e huti atoa te mau uaua. Mai te feia e tamata i te faarue i tera na peu iino, ua rau atu â te mau ohipa ta ’u i faaoromai. I te hoê â râ taime, e taa ia ’u te tapea ra o Iehova i to ’u rima e te faaitoito atoa maira ia ’u. No te tauturu ta ’na i fana‘o no ǒ mai i te Atua, ua papai Paulo: “E tia ia ’u te mau mea atoa nei i . . . tei tauturu mai ia ’u ra.” (Philipi 4:13) Ua tia atoa ia ’u ia faaea i te puhipuhi i te avaava.—Korinetia 2, 7:1.

Ua tauturu mai te Bibilia ia faarue i te mau peu iino, oia atoa râ ia here i to ’u utuafare. Ua taui to ’u huru i nia i ta ’u vahine. Ua faatura ’tu â ia ’na e tae roa atoa i te paraparau mǎrû atu e te haamauruuru ia ’na. Ua haamata atoa i te haapao i ta ’u hopoia ei metua tane no ta mâua tamahine. Ua haapii au i te Bibilia hoê matahiti e muri iho, ua pûpû i to ’u ora ia Iehova e ua bapetizohia mai ta ’u vahine.

TO ’U FAUFAARAAHIA:

Ua papu ia ’u ahiri aita te mau aratairaa Bibilia, ua pohe a‘ena vau. Tera atoa te mana‘o o to ’u mau fetii e ere i te Ite no Iehova. Ua parau hoi ratou, ahiri aita, ua pohe paha vau no te raau taero aore ra i te taparahihia.

Ua taui roa to ’u oraraa utuafare maoti te mau haapiiraa Bibilia o tei faaite mai i ta ’u hopoia ei tane e ei metua tane. (Ephesia 5:25; 6:4) I teie nei, e rave amui matou i te ohipa. E ere atura ta ’u vahine no te tunu noa i te maa, te oaoa nei hoi au i te tauturu ia ’na i roto i ta ’na taviniraa ei taata poro evanelia ma te taime taatoa. E te oaoa atoa nei oia i te turu mai ia ’u ia amo i ta ’u hopoia i roto i te amuiraa ei matahiapo.

Ua taui roa to ’u oraraa i te here o Iehova e to ’na aroha hamani maitai. E hinaaro rahi to ’u ia faaite i to ’na mau huru maitatai i te feia mai ia ’u na mua ’‘e. Te mana‘o ra hoi te rahiraa aita e ravea faahou no ratou, tera hoi to ’u tupuraa na mua ’‘e! Ua ite au e nehenehe te Bibilia e tauturu i te taata atoa ia faarue i te mau peu iino e ia ite i te oaoa mau. Aita noa te Bibilia i haapii mai ia here e ia faatura ia vetahi ê, te tane e te vahine, ua tauturu atoa mai râ te reira ia haafaufaa ia ’u.

No te ite atu â

Eaha te maitai o te mau ture a te Atua?

Ua faataa Iesu no te aha e hinaarohia ’i te aratairaa e eaha na faaueraa Bibilia faufaa roa.