Eaha to roto?

Mau faaho'iraa ê

Tapura tumu parau

Ite no Iehova

Tahiti

A ara mai na!  |  Me 2015

 TAUTURU NO TE UTUAFARE | NO TE FEIA APÎ

E nafea ia mo‘emo‘e oe?

E nafea ia mo‘emo‘e oe?

TE FIFI

“E piti hoa to ’u te farerei pinepine e te ore e haapao mai ia ’u. Faarooroo noa vau no nia i ta raua mau taime faaanaanataeraa. I te tahi mahana, ua niuniu atu vau e tei te fare raua toopiti. E taata ê tei pahono mai e ua faaroo vau ia raua ia paraparau e ia ata. O raua ana‘e te arearea ra, o vau râ, ua mo‘emo‘e atu â ïa!”—Maria. *

Ua tuuhia anei oe i te hiti e mo‘emo‘e atura oe? Mai te peu e, e nehenehe ta te Bibilia a‘oraa e tauturu atu. Na mua râ, e hi‘opoa ana‘e eaha te tia ia ite no nia i tera huru.

TE TIA IA ITE

E mo‘emo‘e paatoa tatou i te tahi taime. Oia atoa te feia mea rahi te haaati ra ia ratou. E pinepine, noa ’tu mea rahi te feia e haaati ra ia ’na, e nehenehe hoê e mo‘emo‘e no te huru o to ’na mau taairaa e vetahi ê. Mea rahi paha te feia ta ’na i matau, aita râ to ’na e hoa mau e e mo‘emo‘e oia.

E nehenehe to ea e ino ia mo‘emo‘e noa oe. I muri a‘e 148 hi‘opoaraa, ua mana‘o te feia îite, aita ana‘e to te taata hoa piri, e nehenehe oia e pohe oioi. Mea ma‘ima‘i a‘e te taata mo‘emo‘e i te taata e amu rahi i te maa. Hoê â tupuraa to ’na i to te feia e puhipuhi 15 avaava i te mahana.

E rave oioi i te faaotiraa no te mo‘emo‘e. E nehenehe te reira e turai ia faariro i te taata na mua mai ei hoa. Ua parau te taurearea ra o Alan: “Ua mo‘emo‘e ana‘e oe, e imi oe i te ravea ia tâu‘ahia oe. E haamata oe i te mana‘o, ‘Mea au a‘e hoê hoa i te ore roa.’ E nehenehe râ oe e fifihia i muri a‘e.”

Eita te mau ravea apî e faaore i te mo‘emo‘e. Te na ô ra te taurearea Natalie: “Noa ’tu hanere taata ta ’u i papai maoti te vini aore ra Internet, e mo‘emo‘e noa vau.” Tera atoa te mana‘o o Tyler, ua na ô oia: “A hapono ai i te poroi, e au te amuamu ra oe. Ia farerei tia roa ’tu râ oe i te taata, e au te tamaa ra oe. Mea au ia amuamu, e mâha a‘e râ to poia ia tamaa oe!”

 TA OE E NEHENEHE E RAVE

A faaite i te mana‘o maitai. A feruri na i to muri nei tupuraa. A haere ai i nia i te Internet, e ite oe te mau hoho‘a o to mau hoa i te tahi farereiraa aita oe i titau-manihini-hia. I tera taime, e nehenehe oe e parau ua tuuhia oe i te hiti aore ra e faaite i te mana‘o maitai. I te mea aita oe i ite i te taatoaraa o te tupuraa, eiaha e mana‘o ino. Mea maitai a‘e ia feruri te vai ra te tahi tumu ê i ore ai ratou i ani mai ia oe. E pinepine, no to huru feruriraa oe e mo‘emo‘e ai, e ere râ no te tahi tupuraa.—Aratairaa Bibilia: Maseli 15:15.

Eiaha ia faarahi roa ino. No te mo‘emo‘e, e mana‘o paha oe mai teie, ‘Eita iho â vau e titau-manihini-hia’ aore ra ‘E ape noa te taata ia ’u.’ No tera mau mana‘o iino, e mo‘emo‘e atu â oe. No oe, ua tuuhia oe i te hiti, e faataa ê mai oe ia vetahi ê a mo‘emo‘e atu ai. Mai tera noa oe i te mau taime atoa.—Aratairaa Bibilia: Maseli 18:1.

A maiti i te feia paari a‘e ei hoa. Te faatia ra te Bibilia, e taurearea Davida a riro ai ei hoa no Ionatana. E 30 matahiti e faataa ê ra ia raua. Noa ’tu râ, ua riro raua ei hoa piri mau. (Samuela 1, 18:1) E nehenehe atoa oe e maiti i te taata paari a‘e ei hoa. Te na ô ra Kiara, 21 matahiti: “Aita i maoro a‘enei, ua ite au i te maitai ia maiti i te hoa paari a‘e ia ’u. Te vai ra vetahi hoa ahuru matahiti hau to ratou ia ’u, auê au i te faahiahia i to ratou feruriraa paari e te papu.”—Aratairaa Bibilia: Ioba 12:12.

A haafaufaa i te mau maitai ia faaea oe ana‘e. E mo‘emo‘e vetahi i te taime iho â a faaea ’i ratou ana‘e. Eiaha râ oe ia riro mai tera. A hi‘o na ia Iesu. Noa ’tu mea rahi to ’na mau hoa piri, mea au atoa na ’na ia faaea o ’na ana‘e. (Mataio 14:23; Mareko 1:35) A pee i to ’na hi‘oraa. A faaea ’i oe ana‘e, a haafaufaa i tera taime no te feruri i te mau maitai ta oe e fana‘o ra. E turai te reira ia vetahi ê ia hinaaro e riro ei hoa no oe.—Maseli 13:20.

^ par. 4 Ua tauihia te tahi mau i‘oa.