Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! ME 2015

 TUMU PARAU MATAMUA | TE A‘O A TE METUA I TEIE MAHANA

E nafea ia a‘o maitai?

E nafea ia a‘o maitai?

E HOPOIA rahi te riroraa ei metua. Ia ore râ te tamarii ia a‘ohia, e ino roa ’tu â te tupuraa. Eaha te nehenehe e tupu? (1) E tamau oia i te faaroo ore e e rohirohi na metua. (2) Eita na metua e horoa i te aratairaa papu e eita te tamarii e taa faahou e nafea.

Ia a‘ohia râ te tamarii ma te here e ma te tano, e tauturuhia o ’na ia faaite i te mana‘o e te huru maitai. Eita atoa oia e taiâ a paari noa ’i. Ihea râ e ite ai i te aratairaa papu no te a‘o i ta oe tamarii?

Te faufaaraa o te mau aratairaa Bibilia

Te tiaturi nei te mau Ite no Iehova, te feia i pia i teie vea, ua riro ta te Bibilia e parau ra “e mea maitai ei haapiiraa, ei a‘oraa, ei faaiteraa hapa, ei faaite mai i te parau-tia.” (Timoteo 2, 3:16) E ere noa râ no te mau metua te Parau a te Atua. I roto atoa hoi e itehia ’i te mau aratairaa papu no te utuafare taatoa. A hi‘o na te tahi mau hi‘oraa.

TA TE BIBILIA E PARAU RA: “Ua mau roa te maamaa i roto i te aau o te tamarii.”—Maseli 22:15.

Noa ’tu mea maitai roa te tamarii, e nehenehe ratou e rave i te ohipa maamaa. E titauhia ïa ia a‘o atu. (Maseli 13:24) Ma te farii i tera mana‘o, mea ohie a‘e ia amo i ta oe hopoia ei metua.

TA TE BIBILIA E PARAU RA: “Eiaha e haamairi i te a‘o i te tamaiti.”—Maseli 23:13.

Eiaha ia mana‘o e nehenehe to tamarii e mauiui aore ra e inoino ia oe i muri a‘e ia a‘ohia oia ma te tano. Ia ravehia te reira na roto i te here, e tauturuhia te tamarii ia farii ma te haehaa i te a‘o. E faufaa-atoa-hia o ’na i tera huru ia riro oia ei taata paari.—Hebera 12:11.

 TA TE BIBILIA E PARAU RA: “Ta te taata e ueue ra, o ta ’na â ïa e ooti mai.”—Galatia 6:7.

E tia iho â ia hinaaro te metua ia paruru i ta ratou tamarii. E titauhia râ ia faaite i te mana‘o tano. Aita oe e tauturu atu ra mai te peu na oe noa ana‘e e amo i te mau faahopearaa o ta ’na mau hape. Na reira atoa, ia turu noa oe ia ’na ia faahapa te orometua aore ra te tahi atu taata i to ’na haerea ino. A farii e nehenehe ratou e tauturu atu. Ma te na reira, te haapii ra oe i to tamarii ia faatura ia vetahi ê, oia atoa ia oe.Kolosa 3:20.

TA TE BIBILIA E PARAU RA: “O te tamaiti râ i faatia noa hia tona ra mau hinaaro, e faatupu ïa i te haama no tona ra metua vahine.”—Maseli 29:15, Te Bibilia Mo’a V.C.J.S., 1976.

A a‘o ma te here, ma te papu e ma te tano

Eiaha te metua ia a‘o ma te etaeta. E titau-atoa-hia râ eiaha ia faatiatia noa. Ua papaihia i roto i te buka The Price of Privilege, “ia faatiatia-noa-hia te hinaaro o te tamarii, eita ratou e haapao na te taata paari i roto i te fare e faatere.” Mai te peu eita oe e faaite o oe te metua, e mana‘o te tamarii na ’na e faatere. E riro o ’na i te rave i te faaotiraa ino e ati ai o ’na e oe atoa.—Maseli 17:25.

TA TE BIBILIA E PARAU RA: ‘E ati te taata i tana vahine; e riro hoi raua ei hoê.’—Mataio 19:5.

Ia au i te Bibilia, ua faaipoipo te tane e te vahine hou a tamariihia ’i. E hoê noa raua a paari ai te tamarii e a faarue ai ratou i te fare. (Mataio 19:5, 6) E tane aore ra e vahine faaipoipo ïa oe na mua e muri a‘e, e metua atoa. Ma te haafaufaa na mua i to tamarii, te turai ra oe ia ’na ia ore ia haapao i teie a‘oraa, “eiaha ia hau te mana‘o ia ’na iho.” (Roma 12:3) E fifi atoa te taairaa o na hoa faaipoipo ia haafaufaa-a‘e-hia te tamarii.

Tauturu no te metua

No te amo i ta oe hopoia ei metua, a haapao i to muri nei mau aratairaa. A a‘o:

Ma te here. “Eiaha e faariri atu i ta outou tamarii, o te taiâ hoi ratou.”—Kolosa 3:21.

Ma te papu. “Ia riro râ ta outou oia ei oia, e ta outou aita ei aita.”—Mataio 5:37.

Ma te tano. “E a‘o [“tano,” Traduction du monde nouveau] noa ’tura vau ia oe.”—Ieremia 30:11. *

^ par. 21 No te ite atu â, a hi‘o i nia jw.org. A pata i nia LA BIBLE ET VOUS > COUPLES & PARENTS. E ite oe i te mau tumu parau mai teie, “L’éducation des enfants,” “Comment gérer les caprices,” “Inculquez des valeurs morales à vos enfants” e “Comment discipliner votre adolescent.”

No te ite atu â

E nafea to oe utuafare e oaoa ’i?

E Atua oaoa Iehova o te hinaaro ra ia oaoa te mau utuafare. Hi‘o i te mau aratairaa Bibilia faufaa no te mau tane, vahine, metua e tamarii.