Te pahonoraa a te Bibilia

 E nehenehe te auhoaraa e tauturu ia tatou ia oaoa e ia manuïa te oraraa. E faatupu te mau hoa mau i te mea maitai roa ˈˈe i roto ia tatou e e tauturu atoa ratou ia tatou ia nuu i mua.—Maseli 27:17.

 No reira, te faaitoito ra te Bibilia ia maiti maitai tatou i to tatou mau hoa. Te faaara atoa ra te Bibilia i te mau faahopearaa ino mai te peu e amuimuiraa iino ta tatou. (Maseli 13:20; Korinetia 1, 15:33) Oia hoi, e nehenehe teie huru hoa e turai ia tatou ia rave i te mau faaotiraa maamaa aore ra e faaere i to tatou mau huru maitatai.

I roto i teie tumu parau

•  Eaha te hoê auhoaraa maitai?

•  Eaha te tahi mau hiˈoraa i roto i te Bibilia no nia i te hoê auhoaraa maitai?

•  Nehenehe anei te hoê taata e riro mai ei hoa no te Atua?

•  Te mau irava Bibilia no nia i te auhoaraa

 Eaha te hoê auhoaraa maitai?

 Te haapii ra te Bibilia e mea tia ia niuhia te hoê auhoaraa maitai i nia i te tahi mea hohonu aˈe i te raveraa i te hoê â faaanaanataeraa. Ei hiˈoraa, te faaite ra te Salamo 119:63: “E hoa vau no te taata atoa e mǎtaˈu ra ia oe a e te feia e haapao ra i ta oe mau faaueraa.” A tapao i ta te papai salamo e parau ra, e maiti oia i te mau hoa tei mǎtaˈu i te faaoto i te Atua e tei hinaaro e ora ia au i te ture aveia a te Atua.

 Te faaite atoa ra te Bibilia i te mau huru maitatai e titauhia i te hoê hoa maitai. Ei hiˈoraa:

•   “E faaite te hoê hoa mau i te here i te mau taime atoa e e taeae oia tei fanauhia no te taime ahoaho.”—Maseli 17:17.

•   “Te vai ra te hoa ua ineine i te taataahi te tahi i te tahi, te vai ra râ te tahi hoa mea piri aˈe i te hoê taeae.”—Maseli 18:24.

 Te haapii mai ra teie mau irava mea taiva ore, mea here, mea hamani maitai e mea horoa noa te hoê hoa maitai. E nehenehe tatou e tiaturi ia ˈna i roto i te tupuraa maitai aore ra ino. E faaite atoa mai te hoê hoa mau ia rave tatou i te tahi mea tano ore aore ra ia rave i te hoê faaotiraa ino.—Maseli 27:6, 9.

 Eaha te tahi mau hiˈoraa i roto i te Bibilia no nia i te hoê auhoaraa maitai?

 Te vai ra i roto i te Bibilia te tahi mau hiˈoraa maitai no nia e rave rahi auhoaraa maitai e te mau taata e ere i te hoê â matahiti, tupuraa, nunaa aore ra tiaraa. A tapao na 3 o ratou.

•   Ruta e Naomi. E hunoa vahine Ruta na Naomi, parau mau mea paari aˈe Naomi ia Ruta. Hau atu â, mea taa ê te mau peu a te nunaa a Ruta e a Naomi. Noa ˈtu teie mau taa-ê-raa, ua faatupu raua i te hoê auhoaraa piri î i te here.—Ruta 1:16.

•   Davida e Ionatana. Noa ˈtu ua hau atu 30 matahiti to Ionatana ia Davida, te parau te Bibilia no nia ia raua “e ati maite aˈera . . . raua . . . ei hoa piri.”—Samuela 1, 18:1.

•   Iesu e ta ˈna mau aposetolo. E tiaraa mana to Iesu i nia i ta ˈna mau aposetolo, no te mea o ˈna to ratou orometua e fatu. (Ioane 13:13) Tera râ, aita Iesu i manaˈo noa ˈˈe e ere roa ratou i te mea maitai no te riro mai ei hoa no ˈna. Mea piri roa râ Iesu i te feia tei pee i ta ˈna mau haapiiraa. Ua parau oia: “Ua parau vau ia outou e hoa, no te mea ua faaite atu vau ia outou i te mau mea atoa ta ˈu i faaroo i to ˈu Metua.”—Ioane 15:14, 15.

 Nehenehe anei te hoê taata e riro ei hoa no te Atua?

 E, e nehenehe te mau taata e riro ei hoa no te Atua. Te parau ra te Bibilia: “E hoa rahi . . . o ˈna no te taata afaro.” (Maseli 3:32) Oia hoi e faahoa te Atua i te mau taata tei tamata i te riro ei taata maitai, haavare ore, faatura e tei tamata i te ora ia au i ta ˈna mau ture aveia no nia i te mea tano aore ra te mea ino. Ei hiˈoraa, ua piihia Aberahama, te hoê tane taiva ore, ei hoa no te Atua i roto i te mau Papai.—Paraleipomeno 2, 20:7; Isaia 41:8; Iakobo 2:23.