Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! ME 2015

 TUMU PARAU MATAMUA | TE A‘O A TE METUA I TEIE MAHANA

Teihea ’tura te a‘o a te metua i teie mahana?

Teihea ’tura te a‘o a te metua i teie mahana?

Ua taui roa te oraraa o te mau utuafare i te mau fenua o te pae tooa o te râ i te mau matahiti i mairi. Na mua ’‘e, e haapao te mau tamarii i te aratairaa a to ratou na metua. I roto râ i te tahi mau utuafare i teie nei, e au ra na te tamarii e faatere. A hi‘o na i to muri nei mau tupuraa.

  • I te fare toa, ua rave mai hoê tamaiti e maha matahiti i te tahi hauti. No te ore e faatia i to ’na hinaaro, parau atura te mama: “Mea rahi ê na ta oe mau hauti.” Aita i maoro, ua taa te mama e ere na ’na te parau hopea. Taparu atura te tamaiti e ua na ô: “Hinaaro vau!” I te mea ua matau oia i te faariri, ua taiâ te mama e ua faatia i to ’na hinaaro.

  • A paraparau ai te papa e te tahi taata, tâpû atura ta ’na tamahine e pae matahiti i ta ’na parau ma te na ô: “Fiu roa vau, mai ho‘i ana‘e i te fare!” Tuu a‘era te papa ia ’na i raro e ua pahono ma te mǎrû: “Heru na maa taime iti.”

  • Ua parau faahou James, 12 matahiti, ua tama‘ihia o ’na e te orometua. Aita te papa i riri ia ’na, i te orometua râ. Na ô atura oia: “Mai tera noa hoa o ’na i nia ia oe. E haere au e faaite i te faatere haapiiraa!”

E ere anei tera te tupu nei? Te faaite ra te reira te vai ra te fifi i roto i te mau utuafare ua faatia hanoa te metua i te hinaaro o te tamarii. Aita atoa i vaiiho ia ratou ia amo i te utua o to ratou haerea ino. Ia au i te tahi buka, “pinepinehia te ite ua vaiiho te mau metua na te tamarii e faatere. Na mua ’‘e râ, mea papu no te tamarii e ere roa ’tu na ratou e faatere.”—The Narcissism Epidemic.

 E rave rahi metua e tutava ra i te haapii i ta ratou tamarii ia rave i te mea maitai. Eita noa ratou e horoa i te hi‘oraa, e a‘o atoa râ ma te here e ma te papu ia titauhia. Ia au i te buka i faahitihia ’tu na, e ere mai tera te mana‘o o te rahiraa i teie mahana. E ere ïa i te mea ohie no te mau metua o te farii ra mea faufaa ia a‘o i te tamarii.

No te aha i tae roa ’i i tera faito? Teihea ’tura te a‘o a te metua i teie mahana?

Mea paruparu te mau metua no te a‘o i te tamarii

Ua parau vetahi mea paruparu te mau metua i tera paeau mai 1960 mai. I tera mau matahiti, i faaitoito na te feia îite i te mau metua ia haere mǎrû noa i nia i ta ratou tamarii. Ua parau teie feia: “Ia riro outou ei hoa eiaha râ ei faatere.” “Mea maitai a‘e ia haapopou, eiaha râ ia a‘o.” “Eiaha ia tama‘i ia rave oia i te mea ino, a tapea noa mai i te maitai ta ’na e rave ra.” Aita te feia îite i horoa i te mana‘o tano ia haapopou e ia a‘o. Ua turai râ ratou ia mana‘o ua a‘o-ana‘e-hia, e fifi te tamarii e e nehenehe atoa oia e inoino i to ’na na metua i muri a‘e.

Aita i maoro, ua haafaufaa te feia îite i te mau maitai ia ore te tamarii ia taiâ. Mai te mea ra, ua ite-taue-hia ia ratou te ravea no te riro ei metua maitai na roto i teie mau parau: Ia mauruuru to tamarii i to ’na huru. Mea faufaa iho â ia ore te tamarii ia taiâ, ua faarahi roa râ te feia îite i to ratou parauraa i te metua: “Eiaha e faahiti i te parau aita, oia atoa mea ino” e “A parau noa i ta outou tamarii mea taa ê roa oia e e nehenehe o ’na e rave i te mau mea atoa ta ’na e hinaaro.” E au ra e, mea faufaa a‘e ia mana‘o te tamarii mea maitai oia i te riro ei taata maitai.

Ua turai tera huru feruriraa i te tamarii ia mana‘o o ratou te mea faufaa a‘e

I te pae hopea, ua parau vetahi ua turai tera huru feruriraa i te tamarii ia mana‘o o ratou te mea faufaa a‘e. Mai te huru, e tia ia vetahi ê ia faatia i to ratou hinaaro. Ia au i te tahi buka, aita atoa te reira i tauturu i te tamarii ia ineine i te farii e hape iho â o ’na e e nehenehe ta vetahi ê e parau  atu. (Generation Me) Teie te parau a te tahi papa faahitihia i roto i tera buka: “Aita te mauruuru e itehia ra i te vahi raveraa ohipa. . . . Aita ana‘e oe i rave maitai i ta oe ohipa, eita te paoti e parau mai: ‘Ua au roa vau te û o te papie ta oe i maiti!’ Mai te peu mai tera to tatou huru i nia i te tamarii, aita roa tatou i tauturu ia ’na.”

Ua taui noa te mana‘o o te taata

I te roaraa o te mau matahiti, e pinepine, ua faaite te huru faatereraa a te mau metua ua tauiui noa te mana‘o o te taata. Teie ta te orometua haapii Ronald Morrish i papai: “Ua taui noa te huru a‘oraa ia au i te mana‘o o te taata.” * Mai ta te Bibilia i parau, mea ohie no te mau metua “ia aueue noa i te mata‘i ra, i tera parau, i tera parau.”—Ephesia 4:14.

Aita ïa te mau tamarii i maitai mai i te mana‘o o te rahiraa no nia i te a‘o i teie mahana. Aita te reira i tauturu i te mau metua ia a‘o atu. Ua ere atoa hoi te mau tamarii i te aratairaa no te rave i te mau faaotiraa maitatai e no te faaruru i te mau fifi o te oraraa.

Eaha te ravea maitai a‘e no te a‘o?

^ par. 15 Na matou i haameumeu i te papai. No roto mai i te buka Ravea no te a‘o: 12 mana‘o ia riro te tamarii ei taata paari (Beretane).

No te ite atu â

E nafea ia a‘o i ta oe tamarii?

Te faaite ra te Bibilia e toru mana‘o faufaa no te a‘o maitai.

E nafea ia a‘o i to tamarii?

Te a‘oraa, te haapiiraa ’tu ïa. E tauturu atu te mau faaueraa Bibilia ia haapii te tamarii ia auraro eiaha râ ia orure hau atu.

E nafea to oe utuafare e oaoa ’i?

E Atua oaoa Iehova o te hinaaro ra ia oaoa te mau utuafare. Hi‘o i te mau aratairaa Bibilia faufaa no te mau tane, vahine, metua e tamarii.