Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! ME 2015

 MEA POIETEHIA ANEI?

Te faanahoraa o te mau huruhuru utu o te mimi

Te faanahoraa o te mau huruhuru utu o te mimi

MEA pinepine a‘e te rahiraa o te mau mimi e ora ra piri atu i te mau fare i te itehia i te po. I muri a‘e i te toparaa mahana, na te mau huruhuru roroa e vai ra i nia i to ratou utu e tauturu ia ite i roto i te poiri e ia imi i te maa.

A hi‘o na: I raro a‘e i te iri o te mimi, e rave rahi uaua uira tei taaihia i to ’na mau huruhuru utu. Maoti te reira, e nehenehe te mimi e taa i te tahi ohipa ia puihau rii noa ’tu te mata‘i i nia ia ’na. E tia i te mimi ia taa i te tahi ohipa noa ’tu aita oia i ite i te reira. E fana‘oraa ïa no ’na ua poiri ana‘e.

No tera hamaniraa taa ê o te mau huruhuru utu o te mimi, e nehenehe oia e taa eaha te atearaa o te tahi tao‘a aore ra animara e te hauti ra anei te reira. E tia atoa ia ’na ia faito eaha te area o te tahi vahi hou a haere atu ai na reira. Ua faaite te tahi buka, “aita te faanahoraa taatoa o te mau huruhuru utu o te mimi (vibrisses) i taa-maitai-hia. Te mea papu râ, ia tâpûhia, eita te mimi e nehenehe e haa mai ta ’na i matau tae roa ’tu i te taime a tupu faahou ai te reira.”—Encyclopædia Britannica.

Te hamani ra te mau aivanaa i te mau ravea e au i te faanahoraa o te mau huruhuru utu o te mimi. Eaha te fa? E tauturu i te mau matini ia ite haaati a‘e ia ratou eaha te mea e nehenehe e haafifi atu. E aivanaa e e orometua Ali Javey i te haapiiraa tuatoru i Berkeley i Kalifonia. Ia au i to ’na mana‘o, e titauhia e rave rahi ravea mai tera no te faaohipa no te mau matini e haa mai te taata aore ra no tei faaterehia e te tahi taata e no te mono i te tahi mero o te tino o te taata.

Eaha to oe mana‘o? Mea tupu noa anei te faanahoraa o te mau huruhuru utu o te mimi aore ra mea poietehia?