Kɔ emu nsɛm afã hɔ

Adɛn Nti na Yehowa Adansefo Kɔ Obi Nkyɛn na Ɔka sɛ “M’ani Nnye Ho” a, Yɛsan Kɔ ne Nkyɛn?

Yehowa Adansefo dɔ Onyankopɔn ne wɔn mfɛfo nnipa. Ɛno nti yɛn ani gye ho sɛ yɛbɛka Bible mu asɛm akyerɛ obiara. Wɔn a wɔaka akyerɛ yɛn pɛn sɛ “m’ani nnye ho” no mpo, yɛka bi kyerɛ wɔn. (Mateo 22:37-39) Ɔdɔ a yɛdɔ Onyankopɔn nti, yedi ahyɛde a ne Ba no de maa yɛn no so. Ɔkae sɛ “yenni adanse fefeefe.” (Asomafo Nnwuma 10:42; 1 Yohane 5:3) Sɛ yebetumi ayɛ wei a, ɛsɛ sɛ yɛde Onyankopɔn nkrasɛm no kɔ nkurɔfo nkyɛn mpɛn pii. Saa ara na Onyankopɔn adiyifo a wɔtenaa ase tete no nso yɛe. (Yeremia 25:4) Yɛdɔ yɛn mfɛfo nnipa. Enti yɛyɛ nea yebetumi biara ka “Ahenni ho asɛmpa” a egye nkwa no kyerɛ obiara. Wɔn a mfiase no na wɔn ani nnye asɛm no ho nso, yɛka bi kyerɛ wɔn.​—Mateo 24:14.

Baabi a mfiase no wɔantie yɛn no, yɛsan kɔ hɔ a, mpɛn pii no wotie. Nneɛma mmiɛnsa yi nti na yɛsan kɔ nkurɔfo nkyɛn:

  • Nnipa di atutena.

  • Nnipa foforo a wɔte fie hɔ tumi tie yɛn asɛm no.

  • Nnipa sesa. Ɛtɔ da a, nsɛm a esisi wɔ wiase anaa nsakrae a ɛba ebinom asetenam ma wohu sɛ ‘wohia honhom mu’ nneɛma bi, enti wotie Bible mu asɛm a yɛka no. (Mateo 5:3) Wɔn a wɔsɔretia yɛn no mpo betumi asesa sɛnea ɔsomafo Paulo yɛe no.​—1 Timoteo 1:​13.

Ne nyinaa mu no, yɛnhyɛ obiara sɛ ontie nea yɛwɔ ka no. (1 Petro 3:15) Yegye di sɛ ɛba ɔsom mu de a, nea odwan pɛ na ɔde ne fufuo bɔ.​—Deuteronomium 30:19, 20.