1-3. (a) Vuxaka lebyi nga kona exikarhi ka vatswari ni n’wana wa vona, byi hi byela yini hi ntumbuluko wa vanhu? (b) I yini leswi hi ntumbuluko swi humelelaka loko munhu a hi kombisa rirhandzu, naswona hi xihi xivutiso xa nkoka lexi hi nga tivutisaka xona?

 VATSWARI va tsaka loko va vona ricece ra vona ri n’wayitela. Hakanyingi va ri tlakula, va ri ntswontswa va ri karhi va hlekelela. Va langutele ku ri vona ri n’wayitela na rona. Ku nga ri khale va vona marhama ma poveka, xinon’wana xi pfuleka kutani ri n’wayitela. Hi ku endla tano ri kombisa rirhandzu tanihi leswi vatswari va rona na vona va ri kombisaka rirhandzu.

² Ku n’wayitela ka n’wana ku hi tsundzuxa nchumu wun’wana wa nkoka malunghana ni vanhu. Loko hi rhandziwa na hina ha rhandza. Leyi i ndlela leyi hi tumbuluxiweke ha yona. (Pisalema 22:9) Loko hi ri karhi hi kula, hi ya hi kombisa ku wupfa eka ndlela leyi hi angulaka hayona loko hi kombisiwa rirhandzu. Kumbexana wa ha tsundzuka leswaku vatswari, maxaka kumbe vanghana a va ku kombisa njhani rirhandzu loko wa ha ri ntsongo. Mbilu ya wena yi sungule ku va ni rirhandzu, ri kula naswona u sungule ku ri kombisa van’wana. Xana vuxaka bya wena na Yehovha Xikwembu na byona byi ya byi kula hilaha ku fanaka?

³ Bibele yi ri: “Hi ni rirhandzu, hikuva hi xona xi nga sungula xi hi rhandza.” (1 Yohane 4:19) Eka Xiyenge 1 ku ya eka Xiyenge 3 xa buku leyi, u tsundzuxiwe leswaku Yehovha Xikwembu u tirhise matimba yakwe, vululami byakwe ni vutlhari byakwe hi rirhandzu leswaku u vuyeriwa.  Eka Xiyenge 4, u swi vonile leswaku u swi kombise hi tindlela leti hlamarisaka leswaku wa va rhandza vanhu—na wena wa ku rhandza. Xivutiso hi lexi. Kahlekahle, i xivutiso xa nkoka swinene lexi u nga tivutisaka xona: ‘Xana ndzi nga swi kombisa njhani leswaku ndza ri amukela rirhandzu ra Yehovha?’

4. Xana vanhu va pfilunganyiwe njhani malunghana ni leswi ku rhandza Xikwembu swi vulaka swona?

⁴ Yehovha, Xihlovo xa rirhandzu, wa swi tiva leswaku rirhandzu ri ni matimba lamakulu, lama nga humesaka vumunhu lebyinene eka vanhu van’wana. Hambileswi vanhu lava nga tshembekiki va hambeteke va xandzuka, kambe yena u tshame a ri ni ntshembo wa leswaku vanhu van’wana va ta ri amukela rirhandzu ra yena. Kunene vanhu va timiliyoni va ri amukerile. Kambe, lexi vavisaka, vukhongeri bya misava leyi yo homboloka byi pfilunganye vanhu, a va ha swi tivi leswaku ku rhandza Xikwembu swi vula yini. Vanhu va ntsandzavahlayi va vula leswaku va xi rhandza Xikwembu, kambe va anakanya leswaku leyi i mhaka yo helela enon’wini ntsena. Ku rhandza Xikwembu ku nga ha sungula hi ndlela yoleyo, ku fana ni n’wana loyi loko a sungula ku kombisa rirhandzu eka vatswari va yena, a n’wayitelaka kunene. Kambe, eka vanhu lava wupfeke, rirhandzu a ri kombisiwi hi ndlela leyi ntsena.

5. Xana Bibele yi ku hlamusela njhani ku rhandza Xikwembu, naswona ha yini nhlamuselo leyi yi fanele yi hi tsakisa?

⁵ Yehovha u hlamusela leswi ku n’wi rhandza swi vulaka swona. Rito rakwe ri ri: “Ku rhandza Xikwembu swi vula ku yingisa swileriso swa xona.” Kutani ke, loko hi rhandza Xikwembu hi fanele hi swi kombisa hi swiendlo. Ina, vanhu vo tala a va swi rhandzi ku yingisa. Kambe  ndzimana leyi fanaka ya engetela: “Naswona swileriso swa [Xikwembu] a swi tiki.” (1 Yohane 5:3) Milawu ya Yehovha yi endleriwe ku pfuna hina, ku nga ri ku hi tikisela vutomi. (Esaya 48:17, 18) Rito ra Xikwembu ri tele hi misinya ya milawu leyi yi hi pfunaka ku tshinela eka xona. Njhani? A hi pfuxeteni tinhla tinharhu leti khumbaka vuxaka bya hina ni Xikwembu. Tona hi leti, ku vulavurisana, ku xi gandzela ni ku xi tekelela.

6-8. (a) Hi nga yingisa Yehovha hi ku endla yini? (b)  Loko hi hlaya Matsalwa, hi nga ma endla njhani leswaku ma hanya?

⁶ Ndzima 1 yi pfule hi xivutiso lexi nge, “Xana wa tivona u ri karhi u vulavula ni Xikwembu?” Hi swi vonile leswaku leswi a ku nga ri norho. Phela Muxe u tshame a vulavula na xona. Ku vuriwa yini hi hina? Lowu a hi wona nkarhi wa leswaku Yehovha a rhumela tintsumi takwe ti ta vulavula ni vanhu. Kambe Yehovha u ni ndlela ya kahle swinene leyi a vulavulaka na hina hayona namuntlha. Hi nga n’wi yingisa njhani Yehovha?

⁷ Leswi “Matsalwa hinkwawo ma huhuteriwe[ke] hi Xikwembu,” hi yingisa Yehovha hi ku hlaya Rito rakwe, ku nga Bibele. (2 Timotiya 3:16) Mupisalema u khutaze malandza ya Yehovha leswaku ma ri hlaya “vusiku ni nhlikanhi.” (Pisalema 1:1, 2) Leswi swi lava leswaku hi tikarhata swinene. Kambe ku endla matshalatshala yo tano, a hi ku tlanga hi nkarhi. Hilaha hi swi voneke hakona eka Ndzima 18, Bibele yi fana ni papila ra risima leri humaka eka Tata wa hina wa le tilweni. Kutani loko hi ri hlaya, a hi fanelanga hi hlayela ku hetisisa nawu. Loko hi hlaya Matsalwa hi fanele hi ma endla ma hanya. Xana hi nga swi endla njhani sweswo?

⁸ Yi vone hi mahlo ya mianakanyo mhaka leyi u yi hlayaka eBibeleni. Ringeta ku vona vanhu lava ku vulavuriwaka  ha vona eBibeleni, va ri va xiviri. Ringeta ku vona ndhawu, swiyimo ni leswi swi va endlaka va endla swo karhi. Kutani, anakanyisisa hi leswi u swi hlayaka, u tivutisa swivutiso leswi: ‘Xana mhaka leyi yi ndzi dyondzisa yini hi Yehovha? Hi byihi byin’wana bya vumunhu bya yena lebyi ndzi byi vonaka? Hi wihi nsinya wa nawu lowu Yehovha a lavaka leswaku ndzi wu tiva, naswona ndzi nga wu tirhisa njhani evuton’wini bya mina?’ Hlaya, u anakanyisisa u tlhela u swi tirhisa—loko wo endla sweswo, Rito ra Xikwembu ri ta hanya eka wena.—Pisalema 77:12; Yakobo 1:23-25.

9. Xana i mani “nandza wo tshembeka ni wo tlhariha,” naswona ha yini swi ri swa nkoka ku yingiserisisa “nandza” yoloye?

⁹ Yehovha u tlhela a vulavula na hina hi ku tirhisa “nandza wo tshembeka ni wo tlhariha.” Hilaha Yesu a vuleke ha kona, ku ni ntlawa lowutsongo wa vavanuna va Vakreste lava totiweke lowu vekiweke leswaku wu phamela “swakudya hi nkarhi lowu faneleke” emasikwini lawa yo hetelela, ya mangava. (Matewu 24:45-47) Loko hi hlaya tibuku leti lunghiseleriweke ku pfuna hina leswaku hi kuma vutivi lebyi kongomeke bya Bibele, ni loko hi ya etinhlengeletanweni ta vandlha ta Vukreste ni le tinhlengeletanweni ta swifundzha, hi va hi ri eku phameriweni ka swakudya swa moya hi hlonga rero. Leswi ri nga hlonga ra Kreste, hi endla leswi Yesu a swi vuleke: “Xiyani ndlela leyi mi yingisaka ha yona.” (Luka 8:18) Hi yingiserisisa hi vukheta hikuva ha swi tiva leswaku ndlela yin’wana leyi Yehovha a vulavulaka na hina hayona i ku tirhisa nandza wo tshembeka.

10-12. (a) Ha yini xikhongelo ku ri nyiko yo saseka yo huma eka Yehovha? (b) Xana hi nga khongerisa ku yini hi ndlela leyi nga ta tsakisa Yehovha, naswona ha yini hi tiyiseka leswaku wa swi tsakela swikhongelo swa hina?

¹⁰ Kambe ku vuriwa yini hi ku vulavula ni Xikwembu?  Xana hi nga vulavula na Yehovha? Swa chavisa hakunene ku anakanya ha swona. A hi nge, u boheka ku ya vulavula ni hosi etikweni ra ka n’wina hi timhaka leti ku dyaka, xana u ehleketa leswaku a a yi ta ku nyika nkarhi wo vulavula na yona? Mikarhi yin’wana, ku endla sweswo swi nga ha va ni khombo! Emasikwini ya Estere na Mordekayi, munhu a a ta dlayiwa loko o ya eka hosi ya Muperesiya a nga rhambiwanga hi va le vuhosini. (Estere 4:10, 11) Sweswi, ehleketa u ya eka Hosi Leyi Lawulaka vuako hinkwabyo, leyi loko vanhu va matimba swinene va pimanisiwa na yona va ngo “fana ni tinjiya.” (Esaya 40:22) Xana hi fanele hi chava ku vulavula na yona? Nikatsongo!

¹¹ Yehovha u hi lunghiselele ndlela yo olova yo vulavula na yena—ku nga xikhongelo. Hambi ku ri n’wana lontsongo a nga khongela eka Yehovha hi ripfumelo, hi ku tirhisa vito ra Yesu. (Yohane 14:6; Vaheveru 11:6) Kambe, xikhongelo xi tlhela xi hi pfuna leswaku hi phofula leswi nga embilwini—ni timhaka leti swi tikaka ku ti boxa ni leti hi twisaka ku vava. (Varhoma 8:26) A swi pfuni nchumu ku ringeta ku tsakisa Yehovha hi swikhongelo leswi sasekisiweke swo leha. (Matewu 6:7, 8) Hi hala tlhelo, Yehovha a nga hi pimeli leswaku hi fanele hi vulavula na yena nkarhi wo tanihi kwihi kumbe kangani. Rito ra yena ri tlhela ri hi byela leswaku hi “khongel[a] mikarhi hinkwayo.”—1 Vatesalonika 5:17.

¹² Tsundzuka leswaku Yehovha hi yena ntsena a vuriwaka “Mutwi wa xikhongelo,” naswona u yingisela hi rirhandzu. (Pisalema 65:2) Xana swikhongelo swa malandza yakwe u swi yingisela ntsena leswaku a hetisisa nawu? Doo, kahlekahle wa swi tsakela ku twa swikhongelo swa vona. Rito ra yena ri fanisa swikhongelo swo tano ni murhi wa risuna, lowu loko wu hisiwa wu humesaka musi lowu nun’hwelaka kahle, lowu tsakisaka. (Pisalema 141:2; Nhlavutelo 5:8; 8:4) Xana a swi tsakisi ku tiva leswaku swikhongelo  swa hina leswi humaka embilwini na swona swi tlhandlukela etilweni naswona swi tsakisa Hosi leyi Lawulaka? Kutani ke, loko u lava ku tshinela eka Yehovha, tshama u ri karhi u khongela eka yena hi ku titsongahata siku ni siku. Phofula hinkwaswo leswi nga embilwini ya wena; u nga tumbeti nchumu. (Pisalema 62:8) N’wi byele leswi ku karhataka, leswi ku tsakisaka, u n’wi khensa, u dzunisa Tata wa wena wa le tilweni. Loko wo endla tano, vuxaka bya wena na yena byi ta ya byi kula.

13, 14. Xana swi vula yini ku gandzela Yehovha, naswona ha yini swi fanela ku endla tano?

¹³ Loko hi vulavula na Yehovha Xikwembu, a hi n’wi yingisi kumbe ku vulavula na yena hilaha hi nga vulavulaka hakona ni munghana kumbe xaka ra hina. Kahlekahle hi va hi gandzela Yehovha, hi n’wi kombisa xichavo lexi n’wi faneleke. Vutomi bya hina hinkwabyo byi lawuriwa hi vugandzeri bya ntiyiso. Leyi i ndlela leyi hi kombisaka Yehovha hayona leswaku ha n’wi rhandza hi mbilu hinkwayo nileswaku hi tinyiketele eka yena, naswona yi endla swivumbiwa hinkwaswo swa Yehovha swo tshembeka etilweni ni le misaveni swi va ni vun’we. Exivonweni, muapostola Yohane u twe ntsumi yi twarisa xileriso lexi nge: “Gandzelani Loyi a endleke tilo ni misava ni lwandle ni swihlovo swa mati.”—Nhlavutelo 14:7.

¹⁴ Hikwalahokayini hi fanele hi gandzela Yehovha? Ehleketa hi vumunhu lebyi hi buleke ha byona, byo tanihi ku kwetsima, matimba, ku tikhoma, vululami, xivindzi, tintswalo, vutlhari, ku titsongahata, rirhandzu, ntwelavusiwana, ku tshembeka ni vunene. Hi swi vonile leswaku Yehovha hi yena xihlovo xa vumunhu hinkwabyo lebyinene. Loko hi ringeta ku twisisa vumunhu byakwe hinkwabyo, ha swi vona leswaku a ngo va Munhu wo  hlawuleka ntsena. Wa kwetsima swinene naswona u tlakuke hi ndlela leyi nga pimekiki. (Esaya 55:9) Handle ko kanakana, Yehovha hi yena a nga Hosi ya hina naswona swa fanela leswaku hi n’wi gandzela. Kambe, xana hi nga n’wi gandzela njhani Yehovha?

15. Xana hi nga n’wi gandzela njhani Yehovha “hi moya ni ntiyiso,” naswona tinhlengheletano ta vandlha ta Vukreste ti hi nyika nkarhi wo endla yini?

¹⁵ Yesu u te: “Xikwembu i Moya, naswona lava xi gandzelaka va fanele ku xi gandzela hi moya ni ntiyiso.” (Yohane 4:24) Leswaku hi gandzela Xikwembu “hi moya,” hi fanele hi va ni moya wa xona ni ku tlhela hi kongomisiwa hi wona. Swi tlhela swi vula ku gandzela hi ku pfumelelana ni ntiyiso, ku nga vutivi lebyi kongomeke lebyi kumekaka eRitweni ra Xikwembu. Hi ni nkateko wa risima wo gandzela Yehovha “hi moya ni ntiyiso,” nkarhi wun’wana ni wun’wana loko hi hlengeletana ni vagandzerikulorhi. (Vaheveru 10:24, 25) Loko hi yimbelelela Yehovha swidzuniso, hi khongela swin’we eka yena, naswona hi yingisela ni ku hlamula loko ku vulavuriwa hi Rito ra yena, hi va hi kombisa leswaku ha n’wi rhandza evugandzerini lebyi tengeke.

16. Hi xihi xin’wana xa swileriso leswikulu lexi byarhisiweke Vakreste va ntiyiso, naswona ha yini hi titwa hi boheka ku xi yingisa?

¹⁶ Nakambe hi gandzela Yehovha loko hi vulavula ha yena eka van’wana, hi n’wi dzunisa erivaleni. (Vaheveru 13:15) Ina, ku chumayela mahungu lamanene ya Mfumo wa Yehovha i xin’wana xa swileriso leswikulu leswi byarhisiweke Vakreste va ntiyiso. (Matewu 24:14) Hi n’wi yingisa swinene Yehovha hikwalaho ka leswi hi n’wi rhandzaka. Loko hi anakanya hi ndlela leyi “xikwembu xa misava leyi,” Sathana Diyavulosi, ‘a dlayeke mianakanyo ya lava nga riki vapfumeri’ hayona, a vula mavunwa hi Yehovha, xana a hi swi naveli ku va Timbhoni ta Xikwembu  xa hina leswaku hi kaneta mavunwa wolawo? (2 Vakorinto 4:4; Esaya 43:10-12) Naswona loko hi anakanyisisa hi vumunhu bya Yehovha lebyi hlamarisaka, xana a hi tikumi hi navela ku byela van’wana ha yena? A wu kona ntirho lowukulu wo tlula ku pfuna vanhu van’wana leswaku va tiva ni ku rhandza Tata wa hina wa le tilweni, hilaha na hina hi n’wi rhandzaka ha kona.

17. Xana ku gandzela ka hina Yehovha ku katsa yini, naswona ha yini hi fanele hi gandzela hi vutshembeki?

¹⁷ Ku gandzela ka hina Yehovha ku katsa ni swin’wana. Ku khumba vutomi bya hina hinkwabyo. (Vakolosa 3:23) Loko hi teka Yehovha a ri Hosi ya hina leyi Lawulaka hakunene, hi ta tsakela ku endla ku rhandza ka yena eka hinkwaswo—evuton’wini bya hina bya ndyangu, emitirhweni ya hina ya ku tihanyisa, eku hanyisaneni ka  hina ni van’wana ni loko hi ri eku tihungaseni. Hi ta tikarhatela ku tirhela Yehovha hi ku tshembeka, “hi mbilu hinkwayo.” (1 Tikronika 28:9) Vugandzeri byo tano a byi twanani ni vutomi bya mikoka mimbirhi—ku nga vukanganyisi lebyi endlaka munhu a vonaka onge u gandzela Yehovha kasi hi hala tlhelo u endla swidyoho leswikulu exihundleni. Ku tshembeka a ku twanani ni vukanganyisi byo tano; rirhandzu ri endla vukanganyisi byi nyenyetsa. Ku chava Xikwembu na kona ka pfuna. Bibele yi vula leswaku ku chava koloko ku fambisana ni vuxaka bya hina lebyikulu na Yehovha.—Pisalema 25:14.

18, 19. Hikwalahokayini swi nga hlamarisi leswaku vanhu lava nga hetisekangiki va nga swi kota ku tekelela Yehovha Xikwembu?

¹⁸ Xiyenge xin’wana ni xin’wana xa buku leyi xi gimete hi ndzima leyi hi pfunaka leswaku ‘leswi hi nga vana lava rhandzekaka hi va vatekeleri va Xikwembu.’ (Vaefesa 5:1) I swa nkoka ku tsundzuka leswaku hambileswi hi nga hetisekangiki, hi nga yi tekelela ndlela leyi hetisekeke ya Yehovha yo tirhisa matimba, vululami, vutlhari ni ya ku kombisa rirhandzu. Xana hi swi tivisa ku yini leswaku swa koteka ku tekelela Lowa Matimba Hinkwawo? Phela, leswi vito ra Yehovha ri vulaka swona swi hi dyondzisa leswaku u tiendla a va leswi a hlawulaka ku va swona leswaku a hetisisa swikongomelo swakwe. Vuswikoti bya yena byo endla sweswo bya hlamarisa, kambe xana leswi swi vula leswaku a swi koteki ku n’wi tekelela? Doo!

¹⁹ Hi endliwe hi xifaniso xa Xikwembu. (Genesa 1:26) Xisweswo vanhu a va fani ni swivumbiwa leswin’wana swa laha misaveni. A hi lawuriwi hi swilo swa ntumbuluko, xitekela kumbe ndhawu leyi hi tshamaka eka yona. Yehovha u hi nyike nyiko ya risima—ku nga ntshunxeko wo tihlawulela. Ku nga khathariseki ku tsana ni ku nga hetiseki  ka hina, hi ntshunxekile ku hlawula leswi hi nga ta va swona. Ku engetela kwalaho, tsundzuka leswaku vito ra Xikwembu ri vula leswaku xi nga endla vagandzeri va xona va va leswi xi hlawulaka leswaku va va swona. Xana wa swi lava ku va munhu la nga ni rirhandzu, wa vutlhari, wo lulama, la tirhisaka matimba ya yena kahle? Moya wa Yehovha wu nga ku pfuna leswaku u va tano! Anakanya hi swilo leswinene leswi u nga kotaka ku swi endla.

20. I yini leswi hi kotaka ku swi endla loko hi tekelela Yehovha?

²⁰ U ta tsakisa mbilu ya Tata wa wena wa le tilweni. (Swivuriso 27:11) U nga “n’wi tsakisa hilaha ku heleleke” hikuva wa ku tiva ku tsana ka wena. (Vakolosa 1:9, 10) Loko u ri karhi u aka vumunhu lebyinene, u tekelela Tata wa wena la rhandzekaka, u ta kuma mikateko yo tala. U ta va ku vonakala emisaveni leyi yi nga le munyameni, leyi yi nga ekule ni Xikwembu. (Matewu 5:1, 2, 14) U ta hoxa xandla eku twariseni ka vumunhu bya Yehovha lebyi kwetsimaka emisaveni hinkwayo. Wa nga vona nkateko wonghasi!

21, 22. Xana i yini leswi hinkwavo lava rhandzaka Yehovha va nga ta ya emahlweni va swi endla hilaha ku nga heriki?

²¹ Xikhongotelo xo olova lexi tsariweke eka Yakobo 4:8, a xi heleriwi hi nkarhi. I riendzo. Loko hi tshama hi tshembekile, riendzo rero a ri nge heli. A hi nge tshiki ku ya hi tshinela eka Yehovha. Kahlekahle hi ta tshama hi ri karhi hi dyondza ha yena. A hi fanelanga hi anakanya leswaku buku leyi yi hi dyondzise hinkwaswo leswi hi faneleke hi swi tiva hi Yehovha. Phela, hi lo tsongola kunene eka leswi Bibele yi swi vulaka hi Xikwembu xerhu! Hambi ku ri Bibele hi yoxe a yi hi byeli hinkwaswo leswi hi faneleke hi swi tiva hi Yehovha. Muapostola Yohane u ringanyete  leswaku loko swilo hinkwaswo leswi Yesu a swi endleke evutirhelini bya yena bya laha misaveni, a swi lo tsariwa, “misava a yi nga ta va ni ndhawu yo veka tibuku leti.” (Yohane 21:25) Loko ku vuriwa sweswo hi N’wana, a ha ha vuli hi Tatana!

²² Hambi ku ri vutomi lebyi nga heriki a byi nge endli leswaku hi heta ku dyondza hi Yehovha. (Eklesiasta 3:11) Hakunene i swinyingi leswi hi nga ta swi dyondza. Loko se hi hanye malembe ya madzana, ya magidi, ya timiliyoni, hambi ku ri ya tibiliyoni, hi ta va se hi tiva swo tala hi Yehovha Xikwembu ku tlula leswi hi swi tivaka sweswi. Kambe hi ta va ha ha swi vona leswaku swa ha ri swinyingi leswi ha ha faneleke hi swi dyondza. Hi ta hisekela ku ya hi dyondza swo tala, hikuva mikarhi hinkwayo hi ta titwa hi ndlela leyi mupisalema a titweke ha yona loko a yimbelela a ku: “Ku tshinela eka Xikwembu i swinene eka mina.” (Pisalema 73:28) Vutomi lebyi nga heriki byi ta tsakisa swinene naswona ku ta endliwa swilo swo hambanahambana —naswona ku tshinela eka Yehovha mikarhi hinkwayo hi kona ku nga ta endla leswaku vutomi byebyo byi tsakisa.

23. Xana u khutaziwa ku endla yini?

²³ Onge u nga amukela rirhandzu ra Yehovha sweswi, hi ku n’wi rhandza hi mbilu ya wena hinkwayo, hi vutomi hinkwabyo, hi mianakanyo hinkwayo ni hi matimba ya wena hinkwawo. (Marka 12:29, 30) Onge u nga va ni rirhandzu leri tiyeke, leri tshembekaka. Onge swiboho hinkwaswo leswi u swi endlaka masiku hinkwawo, hambi i switsongo kumbe i swikulu, swi nga lawuriwa hi nsinya lowu wa nawu—leswaku mikarhi hinkwayo u ta hlawula ndlela leyi nga ta endla leswaku vuxaka bya wena ni Tata wa wena wa le tilweni byi kula. Eka hinkwaswo, onge u nga tshinela eka Yehovha, naswona onge na yena a nga tshinela eka wena—hi masiku ni masiku!