Sekarea 13:1-9
13 “Mo letsatsing leo+ go tla nna le sediba+ se se buletsweng ntlo ya ga Dafide le banni ba Jerusalema ka ntlha ya boleo+ le ka ntlha ya selo se se ilegang.+
2 “Mme go tla diragala mo letsatsing leo,” go bua Jehofa wa masomosomo, “gore ke tla kgaola maina a medingwana ke a tlosa mo lefatsheng,+ mme ga a kitla a tlhola a gakologelwa; le baporofeti+ le moya o o itshekologileng ke tla dira gore o fete o tswe mo lefatsheng.+
3 Mme go tla diragala gore fa motho a ka tlhola a re o a porofeta, rraagwe le mmaagwe, bone ba ba mmelegeng, ba tla mo raya ba re, ‘Ga o kitla o tshela, ka gonne o buile maaka mo leineng la ga Jehofa.’ Mme rraagwe le mmaagwe, bone ba ba mmelegeng, ba tla mo tlhaba ka ntlha ya go porofeta ga gagwe.+
4 “Mme go tla diragala mo letsatsing leo gore baporofeti ba tla tlhabisiwa ditlhong,+ mongwe le mongwe ke ponatshegelo ya gagwe fa a porofeta; e bile ga ba kitla ba apara seaparo se se boboa se se ba tlhaolang+ ka boikaelelo jwa go tsietsa.
5 Mme o tla re, ‘Ga ke moporofeti. Ke monna yo o lemang mmu, ka gonne motho wa mo lefatsheng o ne a ntsaya go tloga bosheng jwa me go ya pele.’
6 Mme motho o tla mo raya a re, ‘Dintho tse di mo go wena tseno fa gare ga diatla tsa gago ke tsa eng?’ Mme ene o tla re, ‘Ke tsa fa ke ne ke itewa mo ntlong ya ba ba nthatang thata.’”
7 “Wena tšhaka, tsogologela modisa wa me,+ le monna yo o nonofileng yo e leng mongwe ka ene,”+ go bua Jehofa wa masomosomo. “Itaya modisa,+ mme tsa letsomane di falale;+ mme ruri ke tla busetsa seatla sa me mo go tse e seng tsa sepe.”+
8 “Mme go tla diragala mo lefatsheng lotlhe,” go bua Jehofa, “gore dintlha di le pedi mo go lone di tla kgaolwa di bo di fela;+ mme fa e le ntlha ya boraro yone, e tla tlogelwa mo go lone.+
9 Mme ke tla fetisa ntlha ya boraro mo molelong;+ ke tla ba itshekisa jaaka fa go itshekisiwa selefera,+ ke bo ke ba tlhatlhoba jaaka fa go tlhatlhobiwa gouta.+ Fa e le yone, e tla bitsa leina la me, mme fa e le nna, ke tla e araba.+ Ke tla re, ‘Ke batho ba me,’+ mme le yone e tla re, ‘Jehofa ke Modimo wa me.’”+
