Rutu 4:1-22
4 Tsô Boashi yem hen hundagar+ za tema her. Maa orpaan u Boashi ôr kwagh na la+ gba va karen. Nahan Boashi kaa ér: “Via, va tema heen.” Tsô a kar a za tema inya.
2 Boashi kua a mbatamen mba ken gar la pue,+ kaa a ve ér: “Tema nen heen.” Tsô ve tema.
3 Boashi kaa a orpaan la ér:+ “Gba u Naomi u a mough ken tar u Moabi a hidi la+ una tee inya i anmgbian wase, Elimeleki.+
4 Nahan m soo mer me ter u kwagh sha mi, shi me ôr u mer, ‘Yam i sha ishigh ki ior mban, man sha ishigh ki mbatamen mba ior av.+ Wea paan i yô, paa i. Kpa wea paan i ga yô, ôrom m fa, sha ci u ka we i gbe u u paa i ye. Dugh we sha yô, shi ka mo.’” Or la gema kaa ér: “Mo me paa i.”+
5 Nahan Boashi kaa ér: “Sha iyange i u lu yamen inya la a Naomi la, fa wer u ngu yamen i vea Rutu wankwase u ken Moabi, kwase u or u a kpe la kpaa, sha er a ver or u a kpe la tse, dyako na a de saan ga yô.”+
6 Ôron nahan yô, orpaan la kaa ér: “Me fatyô u paan i ga, sha ci u dyako wam una va saa. M na u ian, we paa i, mo me fatyô u paan i ga.”
7 Sha ayange a tsuaa, ken tar u Iserael la, hanma kwagh u or nan paan shin nan musan cii, i lu kwagh u nan er u tesen ér nan er kwagh sha tindi je ne: Yange nan tsua ikyôvough ki nan+ nan na orgen la, nahan i lu gbenda u tesen ér i lumun a kwagh u i er la je la.
8 Nahan orpaan la kaan a Boashi ér, “We yam i” yô, a tsua ikyôvough nagh a na Boashi.
9 Tsô Boashi kaa a mbatamen man ior cii ér: “Ne mba mbashiada+ nyian, er m lu yamen hanma kwagh u Elimeleki man u Kilion man u Malon cii hen Naomi yô.
10 Shi m ngu tôôn Rutu wankwase u ken Moabi, kwase u Malon la una hingir kwase wam, nahan a ver or u a kpe la tse, dyako na a de saan ga,+ sha er anmgbianev mba or u a kpe la vea hungur iti na ga, shi hen hundagar u ya na kpa, a hungur iti na her ga yô. Ne mba mbashiada nyian.”+
11 Nahan ior mba hen hundagar man mbatamen cii kaa ér: “Se mba mbashiada! Yehova a ver kwase u u lu van a mi hen ya wou ne, a lu er Rahel man Lea nahan, ve mba uhar mba ve mar ikyurior i Iserael la.+ I kpe u iyol ken Eferata,+ shi iti you i za gwa ken Betelehem.+
12 Ônov mba Yehova una na u hen gumkwase ne la,+ ve na ya wou a hingir er ya u Pereshi+ u Tamar mar a Yuda la nahan.”
13 Tsô Boashi tôô Rutu hingir kwase na. A tsa a na, nahan Yehova na a wa iyav a mar wan u nomso.
14 Nahan kasev mba ken gar la kaa a Naomi ér: “I̱ wuese Yehova u a lu a we, a ne u orpaan nyian ne. I ungwa iti i wan ne ken Iserael cii!
15 A* hide a na u agee, shi una nenge sha a we ken iyolbeen you, sha ci u ka kwase u wan wou u u doo un ishima+ shi a hembe u ônov mba nomso utaankaruhar la, a mar un ye.”
16 Naomi kôr wan la wa shin ikyum na, maa a gba nengen sha a na.*
17 Tsô kasev mba ve wa ndor a na la ii wan la iti. Ve kaa ér: “I mar Naomi wan u nomso,” nahan ve ii un iti ér Obedi.+ Un ka ter u Yese,+ ter u Davidi.
18 Mban ka ônov mba Pereshi+ je ne: Pereshi mar Heseron;+
19 Heseron mar Ram; Ram mar Aminadabi;+
20 Aminadabi+ mar Nashon; Nashon mar Salmon;
21 Salmon mar Boashi; Boashi mar Obedi;
22 Obedi mar Yese;+ Yese gema mar Davidi.+
