Rutu 2:1-23
2 Orgen lu, u due ken tsombor u Elimeleki, u lu a inyaregh kpishi yô; i yilan un ér Boashi,+ un lu anmgbian u nom u Naomi.
2 Tsô Rutu wankwase u ken Moabi la kaa a Naomi ér: “De m za ken ishule m za yar twar+ hen asagher a samuyia, m zaan ken ijime i or u a doo nan a mo cii.” Nahan Naomi kaa a na ér: “Za, wan wam.”
3 Tsô a yem a gba za yaren twar ken sule, zan mbasundav ken ijime. Kwagh ka a er yô, lu hen sule u Boashi,+ or u hen tsombor u Elimeleki+ la za ye.
4 Boashi di gema mough ken Betelehem va nyôr, maa a sugh mbasundav mbara, a kaa ér: “Yehova a lu a ven.” Ve di ve kaa ér: “Yehova a ver u.”
5 Boashi maa pine gumor u lu nengen sha mbasundav la ér: “Ka gumkwase u han laa?”
6 Gumor u lu nengen sha mbasundav la kaa a na ér: “Ka wankwase u ken Moabi+ u yange mough ken tar u Moabi hide vea Naomi yô.+
7 A kaa ér, ‘Nea lumun yô, ma m yar twar+ hen asagher* a samuyia, a mbasundav ve tende ve undu ken ijime la.’ Man er ashen a ve heen pepe je, ngu eren tom zan zan, ka hegen a za tem hen mure ér una mem kpuaa ye.”
8 Nahan Boashi kaa a Rutu ér: “Nenge, wan wam, de yemen za yaren twar hen sule ugen ga, shi de ze mape ugen môm ga; luun ikyua a agumaukase a am.+
9 Ver ashe nengen ape ve lu sundan zan la, we kpa zaan ve ken ijime. M kaa a agumaior ne mer a de ze u iyol ga.* Shighe u imura i ker u yô, za hen mtem mara za ma mngerem ma agumaior ne a kese a ver la.”
10 Tsô Rutu gure suwa ityough inya, kaa a na ér: “Er nan i doo u a mo yum nahana? Man hii nan u wem ikyo, mo u m dugh ken ikyurior igen nee?”+
11 Boashi gema kaa a na ér: “I ôrom hanma kwagh u u er a ngô u nomou, zum u nomou kpe kera la cii, man er u undu teru man ngôu kua anmgbianev ou ken tar wou, u ve hen ior mba u lu a vande fan ve ga ne yô.+
12 Yehova a ver u doo doo sha kwagh u u er ne,+ shi Yehova Aôndo u Iserael, un u u va ker ijiir i yeren hen a na ne,* a na u injar i vesen.”*+
13 Tsô a kaa ér: “Ma i ze hemen u doon we a mo her terem, gadia u surum ishima shi u lam a wanyekwase wou kundu kundu,* shin er m lu môm ken mbatomov ou ga nahan kpaa.”
14 Ka kom shighe u yan kwagh yô, Boashi kaa a na ér: “Hide keen, va ya beredi. Civ ivurugh ki beredi wou shin viniger.”* Tsô Rutu va tema inya a mbasundav mbara imôngo. Maa Boashi na un samuyia u mgbaghen, a ya a ide je, a shi a ver her.
15 Va moughon ngur yaren twar yô,+ Boashi kaa a agumaior a na la ér: “De un nen a yar twar hen asagher* a samuyia la je kpaa, de nzughul nen a na ga.+
16 Shi dughun nen asagher ken aile la kenden nen ken ijime sha er una yar twar yô. De ôron nen kwagh môm sha u yangen un ga.”
17 Nahan a yar twar hen sule la zan zan iyange kar been.+ Va gbidyen barli u yar twar la yô, nôngo u kuman efa* jimin.
18 Tsô a tôô samuyia la a hide ken gar, nahan ngô u nom na kpa nenge a kwagh u za yar twar zua a mi la. Shi Rutu na un kwaghyan u ashen a ye a idi, a shi a ver her la.+
19 Tsô ngô u nom na pine un ér: “Ka han u za yar twar nyiana? Man ka han u er tomo? Aôndo a ver or u nan we u ikyo la doo doo.”+ Nahan Rutu ôr ngô u nom na kwagh u or u un yar hen sule u nan la, a kaa ér: “Iti i or u m yar hen sule na nyian la ér, Boashi.”
20 Nahan Naomi kaa a kwase u wan na ér: “Yehova, un u erdoo na a mbaumav man mbakpenev a been mayange ga la, a ver un doo doo.”+ Shi Naomi kaa ér: “Or la ka or u hen tsombor wase.+ Shi ngu môm ken mba vea fatyô u paan se, duen a vese ken ican yô.”+
21 Nahan Rutu wankwase u ken Moabi la kaa ér: “Or la shi kaa a mo ér, ‘Luun imôngo vea mbatomov av mba ve lu sundan mo iyiav la zan zan vea kar sundan iyiav yav been.’”+
22 Tsô Naomi kaa a Rutu kwase u wan na la ér: “Guda nahan wan wam. Hemba doon u lun a agumaukase a na, a u or a za nzughul a we hen sule ugen la.”
23 Nahan a za hemen u lun vea agumaukase a Boashi shi yaren twar zan zan i kar sundan barli+ kua alakema been. Shi a lu vea ngô u nom na her zan zan.+
Ngeren mba shin kpe
^ Shin a fatyô u kaan ér, “Aile.”
^ Shin “benden we uwegh iyol ga.”
^ Shin “Injar i kuman gbing gbing.”
^ Zwa Heberu, “Un u u va yer ken akper a na ne.”
^ Zwa Heberu, “kôr un ken ishima.”
^ Ka wain u angen je la.
^ Shin a fatyô u kaan ér, “Aile.”
^ Efa môm yange a nôngo u kuman ulita 22. Nenge Ngeren u Seer u B14 la.
