Rutu 1:1-22
1 Sha ayange a mbaajiriv+ lu ôron ajir ken Iserael la, ijen gba ken tar shon. Tsô orgen vea kwase na man ônov nav mba nomso uhar mough ken Betelehem+ u ken Yuda, yem twev ken tar u Moabi.+
2 I yilan or la ér Elimeleki,* i yilan kwase na ér Naomi,* gema ônov nav mba nomso mba uhar mbara di, i yilan ve ér Malon* man Kilion.* Ve lu ior i Eferata ken Betelehem u ken Yuda. Ve za tema ken tar u Moabi ve lu ker.
3 Shighe kar yô, Elimeleki nom u Naomi la kpe, undu un a ônov mba nomso mba uhar mbara.
4 Ônov nav mba nomso mbara va vôso ônkasev mba Moabi; u môm vôso Orpa, ugen la vôso Rutu.+ Ve tsa ker er anyom pue nahan.
5 Maa Malon man Kilion, ônov nav mba nomso mba uhar mban kpa va kpe, nahan kwase ne kera lu a nom ga, mbayev nav mba uhar mbara kpa kera lu ga.
6 Tsô a mough ken tar u Moabi vea kasev mba ônov nav mbara, ve gba hiden sha ci u a ungwa shighe u lu ken Moabi la ér, Yehova umbur ior nav, a na ve kwaghyan.
7 Tsô a mough hen ijiir i a lu la vea kasev mba ônov nav mbara, mba ngur hiden ken Yuda yô,
8 Naomi kaa a kasev mba ônov nav ér: “Hide nen, za kohol nen ungôôv enev ken ya. Yehova a er a ven doo doo,+ vough er ne er a noov enev mba ve kpe la, shi ne er a mo nahan.
9 Yehova a na hanmô wen nom, tema nen kundu kundu hen uya mba noov enev.”+ Tsô a suse ve zwa, ve gba vaan genger genger.
10 Ve lu kaan a na ér: “Ei, se yem vea we hen ior ou.”
11 Kpa Naomi kaa a ve ér: “Hide yem nen ônov av. Ne yem vea mo ner nyi? Me fatyô u shi maren ônov mba vea vôso ne yôô?+
12 Hide yem nen ônov av. Yem nen, gadia m bee iyol gande u eren nom. Aluer ka u me zua a nom tugh mbun shi me mar ônov je kpa,
13 ne fatyô u keghen zan zan vea vesee? Ne kera er noov ga, ne lu keghen vee? Doo nahan ga ônov av. Ishima vihim tsung sha kwagh u a er ne ne, gadia Yehova ngu num a mo.”*+
14 Tsô shi ve gba vaan genger genger. Mba been yô, Orpa suse ngô u nom na zwa maa a yem. Kpa Rutu yô, var a na her.
15 Nahan Naomi kaa ér: “Nenge, wuhe u hide yem hen ior nav kua hen mbaaôndo nav. We kpa hide yem vea na”.
16 Kpa Rutu kaa ér: “De zamber a mo wer, m undu u m hide m yem ga; ape u lu zan cii mo kpa me za, shi ape u lu tsan cii mo kpa me tsa her, ior ou vea lu ior av, shi Aôndo wou kpaa una lu Aôndo wam.+
17 Ape u kpe la, mo kpa me kpe her, shi ka her a iim ye. Ka ku tseegh ua pavem a we ye. Aluer ka nahan ga yô, Yehova a tsaham tsung.”
18 Naomi nengen er Rutu lu sendegh u yemen vea na yô, a de u yangen un.
19 Tsô ve va zan zan ve va nyôr ken Betelehem.+ Mba va nyer yô, ior mba ken gar cii gba kpiligh iyol, kasev lu pinen ér: “Ka Naomi nee?”
20 Nahan lu kaan a kasev mbara ér: “De yilan nen mo ner Naomi* ga. Yilam nen ner Mara* sha ci u Uhembanagee Cii er kwagh a mo vihi je gande.+
21 Shighe u m lu yemen la m lu a hanma kwagh, kpa Yehova erem m hide ave ave. Er Yehova a hendan a mo, shi Uhembanagee Cii a erem ican tsung nahan kpa, ne mba yilan mo ner Naomi ner nyi?”+
22 Kape Naomi mough ken tar u Moabi hide la.+ Yange hide vea Rutu, wankwase u ken Moabi u wan na vôso la. Ve hide ken Betelehem sha shighe u ka i hii u sundan barli la.+
Ngeren mba shin kpe
^ Inja na yô ér, “Aôndo Wam Ka Tor.”
^ Inja na yô ér, “Mdoom Av.”
^ A̱ shi nan kpa, i zua a iti ne ken ishember igen ken zwa Heberu. Inja i i ér “vôr” shin “gba angev.”
^ Inja na yô ér, “Or u Kwagh a Lu Hemban Nan Yô,” shin “Or u Kwagh u Nan a Lu Been Yô.”
^ Zwa Heberu, “uwegh ku Yehova ku ihyom a mo.”
^ Inja na yô ér, “Mdoom av.”
^ Inja na yô ér, “Yua.”
