Rutu 3:1-18
3 Tsô Noami, ngô u nom na kaa a na ér: “Wan wam, de m ker u nom,*+ sha er u tema kundu kundu hen ya wou yô.
2 Boashi ka anmgbian wase.+ Ka ônkasev nav je ashen u lu vea ve la. Una lu tan barli aikighe ne sha vande u gbidyen iyiav.
3 Nahan ôô iyol shighe mkurem ma human doon, wuha iyol,* u been yô, za shin vande u gbidyen iyiav la. A de fe ér u za heela ga zan zan una kar yan kwagh shi man kwagh ve.
4 Una za yaven inya yô, ver ishima fa ape a yav la; maa za bugh ikyondo shin angahar a na yav her. Tsô una ôr u kwagh u u er yô.”
5 Nahan Rutu kaa ér: “Me er hanma kwagh u u kaam cii.”
6 Tsô a za shin vande u gbidyen iyiav la, a za er hanma kwagh u ngô u nom na kaa a na ér a er la cii.
7 Hen shighe ne, Boashi ya kwagh shi ma kwagh, nahan saan un iyol. Tsô a kar a za yav ape i ta tihi u samuyia la. Rutu maa kar ving za bugh ikyondo shin angahar a na yav her.
8 Ka kom atôutu yô, Boashi hii u kunden wuhe, maa a mough a tema sha; gem ashe yô, a nenge kwase yav shin angahar a na.
9 Tsô Boashi pine ér: “Ka we ana?” A gema a kaa ér: “Ka mo Rutu, wanyekwase wou. Er u lu anmgbian u nomom yô, u fatyô u paan se duen a vese ken ican kera. Nahan cir wanyekwase wou ikyondo.”+
10 Tsô Boashi kaa ér: “Yehova a ver u doo doo wan wam. Erdoo u u tese hegen ne hemba u yange u vande tesen la,+ sha ci u u yem u keren gumor u nan gbe ican shin nan lu a kwagh ave wer nana vôso u ga.
11 Hegen yô wan wam, de cie ga. Hanma kwagh u u kaa cii me er,+ sha ci u hanma or ken gar* fa er u lu kwase u fan kwagh kpishi yô.
12 Ka mimi, m ngu orpaan,+ kpa orpaan ugen gema ngu, u a hembe lun anmgbian wen u ikyua ikyua yô.+
13 Tsa heen tugh mbun, aluer kper pepe a paa u yô, doo! A paa u.+ Mimi je, er Yehova a lu u uma ne, aluer a soo u paan we ga yô, mo me paa u iyol yam. Yav heen zan zan sha use.”
14 Tsô Rutu yav shin angahar a na zan zan va mough sha use shighe u or a nenge a na kpa nana fa ga yô. Nahan Boashi kaa ér: “Or a de fe ér kwase va hen vande u gbidyen iyiav ga.”
15 Boashi shi kaa ér: “Va a ikyondo i u cir iyol la, samber i.” Samber i yô, a haa un uikyaren mba barli ataratar,* maa a kôr a tôô un, been yô, a kar a yem ken gar.
16 Rutu di kar yem hen ngô u nom na, maa ngô u nom na pine un ér: “Wan wam, u za nahan ka nena?” Tsô a ôr un hanma kwagh u or la er a na cii.
17 Shi a kaa ér: “A nam barli ne uikyaren ataratar, a kaa ér, ‘De hiden yemen hen ngô u nom u ave ave ga.’”
18 Tsô a kaa a na ér: “Wan wam, tema heen zan zan nenge er ikyaa ne ia za kure yô; sha ci u or la una mem ga zan zan una kar kuren ikyaa ne nyian.”
Ngeren mba shin kpe
^ Shin “ya.”
^ Shin “haa akondo iyol.”
^ Zwa Heberu, “hunda u ior av cii.”
^ Nôngo u kuman ulita 44. Nenge Ngeren u Seer u B14 la.
