Malaki 2:1-17
2 “Hegen yô, ne upristi, tindi ne ngu sha ci wen.”+
2 Yehova u akum a sha kaa ér, “Aluer ne venda u keghen ato shi wan tindi ne ikyo, nahan ne va iti yam a icivir ga yô, me va a ifyan+ sha a ven, shi me gema averen a en aa hingir afan.+ Een, m gema averen la hingir afan, sha ci u ne mba wan tindi la ikyo ga.”
3 “Nenge! Ne na yô, me vihi* ivor yen i ne lee la,+ shi me miase ambi a uile sha ishiv yenev, ka ambi a ilev mbi ka ne na iniav a mi sha uiniongo enev je la; a kura ne a yem a mi her.*
4 Nahan ne fa er i lu mo m we ne tindi ne sha er ikyur i m ye a Levi la, ia za hemen yô,”+ kape Yehova u akum a sha a kaa la.
5 “Ikyur i yange m ya a na la, lu i uma man i bem mba m na un sha u a cia* yô. Een, yange ciam, shi iti yam cier un iyol.
6 Tindi* u mimi lu ken zwa na,+ shi i zua a kwaghôron u ifer sha ityumbujôôgh na ga. Yange zende vea mo ken bem man sha mimi,+ shi na ior kpishi gema ijime a kwaghbo.
7 Gadia gba u pristi nana luun a mfe sha ityumbujôôgh i nan hanma shighe, shi gba u ior vea keren tindi* sha zwa u nan,+ sha ci u nan ngu orôron-loho u Yehova u akum a sha.
8 “Kpa ne ayol a en ne undu gbenda la. Ne er ior kpishi nôngo gbeev sha kwagh u tindi.*+ Ne vihi ikyur i yange m ya a Levi la,”+ kape Yehova u akum a sha a kaa la.
9 “Nahan me er ne, ne hingir ibumekwagh, shi hen ior cii ne gba ijime, sha ci u yange ne dondo igbenda yam ga, shi a va sha kwagh u dondon tindi kpa, ne sangen sha dooshima.”+
10 “Ka ter môm se cii se lu a mi gaa?+ Ka Aôndo môm yange gba se gaa? Nahan er nan se lu nzughul a mbagen,+ vihin ikyur i uter asev ya laa?
11 Yuda er kwagh sha mimi ga, shi i er kwagh u ndôhôrshima ken Iserael man ken Yerusalem; sha ci u Yuda laha Yehova, un u icighankwagh*+ a doo un ishima la, shi a vôso kwase u a lu wan u aôndo ugen yô.+
12 Yehova una wua hanma or u nan er kwagh ne ken utenti mba Yakob cii, nana lu nyi or,* shin nana va na Yehova u akum a sha nagh je kpaa.”+
13 “Shi kwagh ugen* kpa ngu u ne lu eren, u ka a na atse a nan nagh a Yehova la a iv a mliam man kwelegh man ijungwen, nahan kwagh a kera gba Aôndo a nagh enev ga, shin a lumun kwagh môm u ne ve a mi kpaa ga yô.+
14 Kpa ka ne pine ner, ‘Ka sha nyi gbenda?’ Ka sha ci u Yehova lu shiada hen atô wou man kwase u u vôso shighe u u lu gumor la. Er kwase ne a lu ikyar u shi a lu kwase u yange u ya ikyur a na*+ nahan kpa, u nzughul a na.
15 Kpa orgen ngu u yange nan er nahan ga yô, sha ci u nan pande nan lu a icighan jijingi u Aôndo ken a nan. Kpa lu nyi nan lu kerene? Nan lu keren tsombor* u Aôndo. Sha nahan yô, wa nen ikyo sha ieren yen, shi de nzughul a kwase u yange u vôso shighe u u lu gumor la ga.”
16 Gadia Yehova Aôndo u Iserael kaa ér, “M kôr ivaapaven ihyom,*+ kua or u nan cirin ipila sha ikyondo i nan la,”* kape Yehova u akum a sha a kaa la. “Nahan wa nen ikyo sha ieren yen, shi eren nen kwagh sha mimi.+
17 “Ne na Yehova vôr a akaaôron a en.+ Kpa ne pine ner, ‘Se na un a vôr nena?’ Ka sha ci u ka ne kaa ner, ‘Hanma or u nan eren kwagh u bo yô, nan ngu or u dedoo sha ishigh ki Yehova, shi doo un a nan,’+ shi ka ne pine ner, ‘Aôndo u a er ijir sha mimi la ngu hana?’”
Ngeren mba shin kpe
^ Zwa Heberu, “zôhô.”
^ Ka ijiir i yange i haa ambi a uzendenya mba i ne nagh a mi je la.
^ Shin “civir mo.”
^ Shin “kwaghwan.”
^ Shin “kwaghwan.”
^ Shin a fatyô u kaan ér, “sha kwaghwan wen.”
^ Shin a fatyô u kaan ér, “icighanjiir.”
^ Zwa Heberu, “or u nan lu per shi nan vengese yô.”
^ Zwa Heberu, “u sha uhar.”
^ Shin “kwase wou u sha tindi.”
^ Zwa Heberu, “vor.”
^ Zwa Heberu, “a kôr ivaapaven ihyom.”
^ Shin “or u nan eren ipila la.”
